އީރާނާ ގުޅުން އިޔާދަކުރުމާ މެދު ސަޢުދީ ރައްޔިތުން ބުނަނީ ކީކޭ؟

ނިމިގެން މިދާ މަރޗްމަހު، މެދުއިރުމަތީގެ މަސްރަހުން ލިބުނު އެންމެ ހައިރާން ކުރަނިވި އެއް ޚަބަރަކީ ޒަމާންވީ ހަތުރުންގެ ގޮތުގައި އޮތް އީރާނާއި ސަޢުދީ ޢަރަބިއްޔާއާ ދެމެދު އެކުވެރިކަމުގެ ގުޅުމެއް ބަދަހިވުމާ ދިމާއަށް މިޞްރާބު ބަދަލުވަމުންދާ ކަމުގެ ޚަބަރެވެ. ޗައިނާ މެދުވެރިއެއްގެ ގޮތުގައި އޮވެގެން ކުރި މަސައްކަތުގެ ނަތީޖާއެއްގެ ގޮތުން، އީރާނާއި ސަޢުދީ ޢަރަބިއްޔާއާ ދެމެދު ޑިޕްލޮމެޓިކް ގުޅުންތައް ބަދަހިކޮށް، އެމްބަސީތައް ހުޅުވުމަށްވެސް މިހާރުވަނީ އެއްބަސްވުމަކަށް އައިސްފައެވެ. ކަން މިހެން އޮތް އިރު، ބަދަހިވަމުންދާ މި ގުޅުމާ މެދު، ސަޢުދީގެ ރައްޔިތުންގެ ޚިޔާލު ހުރި-ނެތް ގޮތެއް ބަލާލުންވެސް މުހިންމެވެ.

އެތައް އަހަރަކަށް ދިގުލާ ގޮސްފައިވާ ކޯޅުންތަކަށް ލުޔެއް ލިބިދާނެ ކަމުގެ އިޝާރާތެއް ލިބުނީ، މެދުއިރުމަތީގެ ޝީޢީ އަދި ސުންނީ ބާރުތަކުގެ ގޮތުގައި އޮތް އީރާނާއި ސަޢުދީ ޢަރަބިއްޔާއިން ޑިޕްލޮމެޓިކް ގުޅުންތައް ބަދަހިކޮށް، 2 މަސް ދުވަހުގެ ތެރޭގައިއެމްބަސީތައް ހުޅުވުމަށް މަރޗް 10 ވަނަ ދުވަހު އެއްބަސްވީ ހިސާބުންނެވެ.

ސަޢުދީގެ ރައްޔިތެއް ކަމަށް ވާ ޢަބްދުﷲ އަލް-ރަކަފް ބުނި ގޮތުގައި މި އެއްބަސްވުމަކީ، ދެ ޤައުމުގެ އިޤްތިޞާދަށްވެސް ފައިދާތަކެއް ކުރުވާނެ އެއްބަސްވުމެކެވެ.

އިންޓަރނޭޝަނަލް އިންސްޓިޓިއުޓް ފޮރ އިރާނިއަން ސްޓަޑީޒްގެ ނައިބު ރައީސް، އަލް-އަހުމަދު އަލް ގަރްނީ ސިފަ ކުރި ގޮތުގައި، ބަދަހިވަމުންދާ މި ދަނޑިވަޅަކީ، ސަރަޙައްދީ މިޞްރާބު ބަދަލު ކުރަނިވި ދަނޑިވަޅެކެވެ.

މަރޗް 19 ވަނަ ދުވަހު އީރާނުގެ ސަރުކާރުން ވަނީ ސަޢުދީ ޢަރަބިއްޔާގެ ފޮރިން މިނިސްޓަރާއެކު މަޝްވަރާތައް ކުރިއަށް ގެންދަން ފެންނަ 3 ސަރަޙައްދެއް ހުށަހަޅާފައެވެ.

އީރާނާއެކު އޮތް ގުޅުން ސަޢުދީ ޢަރަބިއްޔާއިން އެންމެ ފަހުން މެދު ކަނޑާލާފައި ވަނީ 2016 ވަނަ އަހަރުގެ ތެރޭގައެވެ. އެއީ ސަޢުދީ ސަރުކާރުން، ޝީޢީ އިމާމަކު މަރާލި މައްސަލާގައި، ދެ ޤައުމުގެ ދެމެދުގައި އުފެދުނު ދެބަސްވުންތައް ހޫނުވެ، ތެހްރާންގައި ހުރި ސަޢުދީ އެމްބަސީއަށް ބަޔަކު ހަމަލާ ދިން ހިސާބުންނެވެ.

ދުނިޔޭގެ އެކި ކަންކޮޅުތަކުން ދަނީ، ސައުދީއާއި އީރާނުގެ ގުޅުންތައް އިޔާދަ ކުރަން ނިންމި ނިންމުމަށް މަރުޙަބާ ކިޔަމުންނެވެ.

ސައުދީއާއި އީރާނުގެ ގުޅުންތައް ހީނަރުވެގެން ދިއުމުގައި ސީރިއަސް ސަބަބުތަކެއް އޮތެވެ. އެގޮތުން އިސްލާމް ދީނުގެ ފިކުރުގައި ދެ ޤައުމު ގެންގުޅޭ ރަޢުޔުގައި ތަފާތުތަކެއް ހުރުމާ، އިސްލާމީ ދުނިޔޭގެ ވެރިކަން ހޯދުމަށް ދެ ޤައުމުންވެސް ބޭނުންވުމާ، ތެޔޮ އެކްސްޕޯޓް ކުރުމުގެ ސިޔާސަތުތަކުގެ އިތުރުން، އެމެރިކާއާއި ހުޅަނގުގެ ޤައުމުތަކާ އެކު ދަމަހައްޓާ ގުޅުންތަކާ ބެހޭ މައްސަލަތައް ފަދަ އެތައް ކަމެއް ހިމެނެއެވެ.