މާދަމާ އަހަރުގެ އެންމެ ރީތި އެއް ތާރީހު، އެކަމަކު ކައިވެނި މަދު!
22 މާރިޗު 2023 | ބުދަ 12:59ރީތި ތާރީހުތަކުގައި ކައިވެނިކުރުމަކީ މިހާރުގެ ޓްރެންޑެއް
ގިނަ ކައިވެނިތަކެއް އޮތް ދުވަހެއްގައި ފެމިލީ ކޯޓު ބޭރު
މާދަމާއަކީ ރީތި ތާރީހެއް ނަމަވެސް ކައިވެނިތައް މަދުކަން އެނގިއްޖެއެވެ.
ބުރާސްފަތި ދުވަހަކީ މި އަހަރު އަންނަ ރީތި ތާރީހުތަކުގެ ތެރެއިން އެއް ތާރީހެވެ. އެހެން ނަމަވެސް، 23-03-23ގައި ކައިވެނި ކުރާ މީހުންގެ އަދަދު މަދުކަން ފެމިލީކޯޓުގެ އޮފިޝަލަކު ވަނީ "ރާއްޖެއެމްވީ"އަށް ކަށަވަރު ކޮށްދެއްވައިފައެވެ. އޮފިޝަލް ވިދާޅުވި ގޮތުގައި ފެމިލީ ކޯޓުން މާދަމާ ކޮށްދޭން ހަމަޖެހިފައިވަނީ 12 ކައިވެންޏެކެވެ. އޮފިޝަލް ވިދާޅުވި ގޮތުގައި ރީތި ތާރީހަކަށް ވީ ނަމަވެސް ކައިވެނި މާދަމާ މަދު ވެފައިވަނީ ރޯދަ މަހުގެ ފުރަތަމަ ދުވަހާ ދިމާވުމުންނެވެ.
ރީތި ތާރީހުތަކުގައި ކައިވެނިކުރުމަކީ މިހާރު ދިވެހީންގެ ތެރޭގައި އާންމުވެފައިވާ ކަމެކެވެ. އެންމެ ފަހުން ރީތި ތާރީހެއްގައި ގިނަ ބަޔަކު ކައިވެނިކޮށްފައިވަނީ ނިމިދިޔަ ފެބްރުވަރީ މަހުގެ 23 ވަނަ ދުވަހުއެވެ. އެ ގޮތުން، 23/03/2023ގައި މާލޭގައި 38 ކައިވެނި ވަނީ ކޮށްފައެވެ.
ފަހުގެ ތާރީހެއްގައި އެންމެ ގިނަ ކައިވެނި ފެމިލީ ކޯޓުން ކޮށްދީފައިވަނީ މިދިޔަ އަހަރުގެ ޑިސެމްބަރު މަހުގެ 22 ވަނަ ދުވަހުއެވެ. 22/12/22ގައި ވަނީ 58 ކައިވެނި ފެމިލީ ކޯޓުގައި ކޮށްދީފައެވެ.
ނިމިދިޔަ ފެބްރުވަރީ މަހު މާލޭގައި 178 ކައިވެނި ކުރިއިރު، 98 ވަރިކޮށްފައިވާކަމަށް ފެމިލީ ކޯޓުގެ ތަފާސްހިސާބުތަކުން ދައްކައެވެ.
