އާޒިމް ޖޭޕީ ދަފްތަރުގައި ނެތް، ސުވާލުކުރުމުން ވިދާޅުވީ ރައީސް އެދިވަޑައިގަންނަވާހާ ހިނދަކު މަގާމުގައި ހުންނަވާނެކަމަށް

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ ސީއީއޯ އާދަމް އާޒިމް ޖުމްހޫރީ ޕާޓީގެ ދަފްތަރުގައި ނެތްކަން ރާއްޖެއެމްވީއަށް ކަށަވަރުވެއްޖެއެވެ.

ޖުމްހޫރީ ޕާޓީން ކުރިއަށް އޮތް ރިޔާސީ އިންތިޚާބުގައި ވަކިން ވާދަކުރުމަށް ނިންމުމާއި ގުޅިގެން ސަރުކާރުގެ އެކި މަގާމުތަކުގައި ތިބި ޖުމްހޫރީ ޕާޓީގެ މެމްބަރުން ގެންދަވަނީ އެޕާޓީން ވަކިވަމުންނެވެ. މިގޮތުން އާޒިމްވެސް ޖުމްހޫރީ ޕާޓީން ވަކިވާން އުޅޭކަމަށް ވަނީ މައުލޫމާތުލިބިފައެވެ.

އެކި ގޮތްގޮތަށް ދެކެވެމުންދާ ވާހަކަތަކާ ގުޅިގެން ރާއްޖެ އެމްވީން ބެލި ބެލުމުން އާޒިމް ޖުމްހޫރީ ޕާޓީގެ ދަފްތަރުގައި ނެތްކަން ވަނީ ހާމަވެފައެވެ. އަދި މިކަމާ ގުޅިގެން ރާއްޖެ އެމްވީން އާޒިމްއާ ސުވަލުކޮށްލުމުން ވިދާޅުވީ އޭނާ އެމަގާމަށް އައްޔަންކުރެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ކަމަށެވެ. އޭނާގެ މަސައްކަތްތަކާއިމެދު ރައީސް ހިތްޕުޅު ހަމަޖެހިވަޑައިގަންނަވާހާ ހިނދަކު އެ މަގާމުގައި ހުންނަވާނެ ކަމަށާއި، ހިތްޕުޅު ހަމަޖެހިވަޑައިނުގަންނަވާނަމަ މަގާމުން ވަކިވާނެ ކަމަށް އާޒިމް ވިދާޅުވިއެވެ.

ޖޭޕީން ރިޔާސީ އިންތިޚާބުގައި ވަކިން ވާދަކުރަން ނިންމާފައިވަނީ ކޯލިޝަން އެކުލަވާލުމަށް ރައީސް އިބްރާހީމް މުހައްމަދު ސާލިހު، ސަރުކާރުގެ ކޯލިޝަން ޕާޓްނަރުންނަށް ދައުވަތު ފޮނުއްވާފައިވަނިކޮށެވެ. ޖޭޕީއަކީ މިހާރު ސަރުކާރު ޕާޓްނަރެކެވެ. އަދި މިމަހުގެ 16 ވީ ބުރާސްފަތި ދުވަހު ޖޭޕީގެ ފަރާތުން، ކުރިއަށް އޮތް ރިޔާސީ އިންތިޚާބުގައި ކުރިމަތިލާން ބޭނުންވާ ފަރާތްތަކަށް އެ ފުރުސަތުވެސް ވަނީ ހުޅުވާލާފައެވެ.