ހުސްވެފައިވާ ގުރައިދޫ ދާއިރާގެ ރައްޔިތުންގެ މަޖިލިހުގެ ގޮނޑީގެ ބައި އިލެކްޝަންގެ ކެމްޕޭން ވެރިކަންކުރާ ޕާޓީ, އެމްޑީޕީން ފަށައިފިއެވެ.

މިގޮތުން އެމްޑީޕީން މިދާއިރާއަށް ކުރިމަތިލުމަށް, އެޕާޓީގެ ޕްރައިމަރީ ކާމިޔާބު ކުރި އިބްރާހިމް ޝާޒްއާއި މިނިސްޓަރުންގެ އިތުރުން، ރައްޔިތުންގެ މަޖިލިހުގެ މެންބަރުންނާއި ސަރުކާރުގެ އެހެނިހެން އިސްވެރިން ހިމެނޭ ޕާޓީގެ ވަފުދެއް މިދާއިރާގެ 3 ރަށަށް ހޯމަ ދުވަހު ވަނީ ދަތުރުކުރައްވާފައެވެ.

މިދަތުރުގައި މިދާއިރާގެ 3 ރަށުގެ ކެމްޕޭނު ޓީމުތަކުން ރައްޔިތުންނާ ބައްދަލުކޮށް، ދޮރުން ދޮރަށް ހިނގައި ކެމްޕޭނު ކުރިއަށް ގެންގޮސްފައިވެއެވެ.

އެމްޑީޕީގެ ސަރުކާރުގެ މި 4 އަހަރުތެރޭގައި މިދާއިރާގެ 3 ރަށުގައި ވަނީ ބޮޑެތި ތަރައްގީގެ މަޝްރޫއުތައް ހިންގާފައެވެ. އޭގެތެރޭގައި ގުޅީގައި ފެނާ ނަރުދަމާގެ މަސައްކަތް އެއްކޮށް ނިމި، މާފުށީގެ ބިން ހިއްކުމާއި ޕިކްނިކް އައިލެން ފަދަ މަޝްރޫއުތައް ވަނީ ނިންމާފައެވެ.

ގުރައިދޫ ދާއިރާ ބައި އިލެކްޝަންގެ ވޯޓުލުން އޮންނާނީ އޭޕްރިލް މަހުގެ 15 ވާ ހޮނިހިރު ދުވަހެއެވެ. މިދާއިރާއަށް ދެން ވާދަކުރަނީ އިދިކޮޅު ޕީޕީއެމްއާއި އެމްއެންޕީންނެވެ.