މާލޭގައި ޕްރެކްޓިސް ކުރުމަށްފަހު ޕާކިސްތާން ޓީމު ލާމަށް

މާލޭގައި މިއަދު ހެނދުނު ޓާފް ދަނޑުގައި ޕްރެކްޓިސް ކުރުމަށްފަހު ޕާކިސްތާނުގެ ގައުމީ ފުޓްބޯޅަ ޓީމު ލާމު އަތޮޅަށް ހިނގައްޖެ އެވެ.

ދިވެހިރާއްޖެ އާއި ޕާކިސްތާން ކުޅޭ މެޗު އޮންނާނީ މާދަމާ ހަވީރު ގަމު ޒޯން ސްޓޭޑިއަމުގަ އެވެ.

ޕާކިސްތާން ޓީމާއެކު އިނގިރޭސި ޑިފެންޑަރު ހާރޫން ހާމިދާއި ރާއްޖޭގެ އެކި ޓީމުތަކަށް ކުޅެމުން އަންނަ ގޯލްކީޕަރު ސާގިބް ހަނީފް ވެސް މާލެ އައެވެ. މީގެ އިތުރުން މުޅިން އަލަށް ޓީމުން ޖާގަދިން ޑެންމާކަށް އުފަން ދެ ކުޅުންތެރިން ކަމަށްވާ އަބްދުއްސަމަދު ޝެހެޒާދް އާއި ޑިފެންޑަރު އަބްދުﷲ އިގްބާލް ވެސް ރާއްޖެ އައިސްފައިވެ އެވެ.

ޕާކިސްތާން ޓީމުގެ ކޯޗު ޝަހްޒާދު އަންވަރު ބުނީ ޑެންމާކަށް އުފަން ދެ ކުޅުންތިން ވެސް ރާއްޖެ މެޗުގައި ކުޅޭނެ ކަމަށެވެ. އަދި ރާއްޖެ މެޗަކީ ކުރިއަށް އޮތް ސާފް ޗެމްޕިއަންޝިޕާއި ވޯލްޑްކަޕް ކޮލިފައިން އަށް ޓީމު ބިނާކުރުމުގެ ފެށުން ކަމަށެވެ.

އެއްވެސް ވަރަކަށް ޕްރެކްޓިސް ނުކޮށް ތިބުމަށްފަހު މި މެޗަށް ޓީމުއެކުލަވާލައިގެން ރާއްޖޭގެ ގައުމީ ޓީމު ގަމަށް ދިޔައީ އިއްޔެ އެވެ. އަދި ހަވީރު ފުރަތަމަ ފަހަރަށް ކޯޗާއެކު ކުޅުންތެރިން ޕްރެކްޓިހަށް ނުކުތެވެ.