މުއިއްޒުގެ މައްޗަށް ކުރާ، ދޮގު ބަޔާން ދިނުމުގެ ދައުވާގެ މައްސަލަ: ޚުލާޞާ ބަޔާން އިއްވުން ރޯދަ މަހު
19 މާރިޗު 2023 | އާދީއްތަ 11:13މުއިއްޒުގެ މައްޗަށް ދައުލަތުން ދައުވާ އުފުލާފައިވަނީ 2019 ވަނަ އަހަރު ޖޫން މަހުގެ 25 ވަނަ ދުވަހު
ކުރީގެ ހައުސިންގ މިނިސްޓަރު އަދި މިހާރުގެ މާލެ ސިޓީގެ މޭޔަރު ޑރ. މުހައްމަދު މުއިއްޒު
ނޫމަޑި މައްސަލާގައި ކުރީގެ ހައުސިންގ މިނިސްޓަރު އަދި މާލެ ސިޓީގެ މޭޔަރު ޑރ. މުއިއްޒުގެ މައްޗަށް، ދޮގު ބަޔާން ދެއްވިކަމަށް ތުހުމަތުކޮށް ކޮށްފައިވާ ދައުވާގެ ޚުލާޞާ ބަޔާން އިއްވުން އަންނަ ރަމަޟާން މަހުގެ ދުވަހެއްގައި ބާއްވާނެ ކަމަށް، އެ މައްސަލަ ބަައްލަވާ ފަނޑިޔާރު ސަފްވަތު ހަބީބް ވިދާޅުވެއްޖެއެވެ.
އާދިއްތަ ދުވަހު މި މައްސަލާގައި ދިފާއީ ވަކީލު އާދަމް ޝަމީމް އެދިފައިވަނީ، ޚުލާޞާ ބަޔާން އިއްވުމުގެ މަރުހަލާ އަވަސްކޮށްދިނުމަށެވެ.ދައުލަތުން 2019 ވަނަ އަހަރު ޖޫން މަހުގެ 25 ވަނަ ދުވަހުމުއިއްޒުގެ މައްޗަށް އުފުލާފައިވާ، ދޮގު ބަޔާން ދިނުމުގެ މައްސަލާގައި ދައުލަތުން ވަނީ އާދިއްތަ ދުވަހު ގިނަ ކަންތައްތަކެއް ފާހަގަކޮށްފައެވެ.
އާދިއްތަ ދުވަހު އޮތީ ހެތްކާ ގުޅޭގޮތުން ފާހަގަކުރަން ހުރި ކަންކަން ފާހަގަކުރުމެވެ. ހެތްކާ ގުޅޭގޮތުން ފާހަގަކުރަން ހުރި ކަންކަމަށް ވާހަކަދައްކަން ވަކި އަޑުއެހުމެއް ބާއްވަން އެދިފައިވަނީ ދައުލަތުންނެވެ. ދައުލަތުގެ ވަކީލު ވިދާޅުވީ، މި މައްސަލައާ ގުޅޭގޮތުން ހުށަހަޅާފައިވާ ކިތާބީ ހެކިން، ނޫމަޑި މައްސަލާގައި ދިވެހި ސަރުކާރާ ދެކޮޅަށް ނެދަލޭންޑްސްގެ ދަހޭގްގައި ހުންނަ ޕަރމަނަންޓް ކޯޓް އޮފް އާބިޓްރޭޝަނަށް ހުށަހަޅާފައިވާ މައްސަލާގައި، އެކުންފުނީގެ ހެކިވެރިއަކަށްވެ، ހައުސިންގ ޔުނިޓް މަޝްރޫއާ ގުޅިގެން ނޫމަޑިއާއެކު ދިވެހި ސަރުކާރުން 2011ވަނަ އަހަރު ވެފައިވާ ފޭސް 1ގެ އެއްބަސްވުމާއި، 2013ގައި ވެފައިވާ ފޭސް 2ގެ އެއްބަސްވުމުގެ މަސައްކަތް އެކުންފުނިން ޝެޑިއުލްއާ އެއްގޮތަށް ލަސްތަކެއްނުވެ ކުރަމުން ގެންދިޔަކަމަށް ވިދާޅުވެފައިވާކަން އެނގޭކަމަށެވެ. އަދި ނޫމަޑިއަށް ލަގްޒަރީ ވިލާ އެޅުމަށް ދިވެހި ސަރުކާރުން ދޫކޮށްފައިވާ ޅ. ދިއްފުށިމާދޫ، ސަރުކާރުގެ ބޭނުމަށް ނެގުމުގެ މަޝްވަރާގައި ބައިވެރިވެފައި ނުވާކަމަށް ބުނެ، ދޮގު ބާޔަނެއް ދެއްވާފައިވާކަންވެސް އެނގޭކަމަށެވެ.
އެގޮތުން ނޫމަޑިން ޝެޑިއުލަށްވުރެ އަވަހަށް މަސައްކަތް ކުރިއަށް ދާކަމަށް އާބިޓްރޭޝަނަށް ދެއްވި ސްޓޭޓްމެންޓްގައި ފާހަގަކޮށްފައިވާ ވާހަކަތަކަކީ ދޮގު ވާހަކަތަކެއް ކަމަށް ދައުލަތުން ވަނީ ބުނެފައެވެ. އަދި ނޫމަޑި މައްސަލާގައި، މަސައްކަތް ލަސްވެގެން ރައީސް އޮފީހާއި އެޓަރނީ ޖެނެރަލްގެ އޮފީހާ ކޮށްފައިވާ މުއާމަލާތްތަކާ ގުޅުންހުރި ސިޓީތަކަށް ބެލުމުން އެކަން އެނގޭކަން ދައުލަތުން ވަނީ ފާހަަގަކޮށްފައެވެ. ހަމައެހެންމެ އީވައިސީ ޔައުމިއްޔާއިން ސަރުކާރުގެ ބޭނުމަށް ޅ. ދިއްފުށިމާދޫ ނަގަން އުޅޭކަން އެނގޭއިރު، އެ ބައްދަލުވުމުގައި ޑރ. މުއިއްޒު ބައިވެރިވެވަޑައިގެންފައި ވާކަމަށް ދައުލަތުން ބުނެއެވެ.
މި މައްސަލާގައި ދިފާއީ ވަކީލު ބުނީ، ހެތްކާ ގުޅޭގޮތުން ވާހަކަދެއްކުމަށް ވަކި އަޑުއެހުމެއް ބާއްވައިދިނުމަށް އެދުނީ ދައުލަތުންކަމަށް ވުމާއެކު، ދިފާއުން ހެތްކާ ގުޅޭގޮތުން ވާހަކަދައްކާނީ ޚުލާޞާކޮށްކަމަށެވެ. އަދި ޚުލާޞާ ބަޔާނުގައި އެކަމުގެ އިތުރު ތަފްސީލް ހިއްސާކުރާނެކަމަށް ބުނެފައިވެއެވެ. ދިފާއުން ބުނީ މި މައްސަލާގައި ހުށަހަޅާފައިވާ ބައެއް ލިޔުންތައް ހުށަހަޅާފައިވަނީ ހެކީގެ ގޮތުގައި ނޫންކަމަށެވެ. އޭގެތެރޭގައި މުއިއްޒުގެ ދެ ބަޔާން ހިމެނޭކަމަށް ވަނީ ބުނެފައެވެ. މީގެ އިތުރުން ދިއްފުށިމާދޫ އެގްރީމެންޓާ އެއްގޮތަށް މަސައްކަތް ނުދާތީ، އެއްބަސްވުން އުވާލަން މަޝްވަރާކުރި ބައްދަލުވުމެއްގައި މުއިއްޒު ހުންނެވިކަން ސާބިތުވާ ވަރަށް ހެކިވެސް ހުށަހަޅާފައި ނުވާކަމަށް ދިފާއުން ބުނެއެވެ.
މީގެ އިތުރުން މި މައްސަލާގައި ހެކިބަސް ދިން ހެތްކެއް، މުއިއްޒުގެސޮޔާ ބެހޭގޮތުންހެކިބަސް ދީފައިވާއިރު، އެ ހެކިބަހުން، މި މައްސަލައާ ގުޅުންހުރި ބައެއް ލިޔުންތަކުގައި ވަނީ މުއިއްޒުގެ ސޮއި ނޫންކަން އެނގޭކަމަށްވެސް ދިފާއުން ވަނީ ބުނެފައެވެ.
ނޫމަޑި ރިސޯޓްސް އެންޑް ރެސިޑެންސް އޭޖީ (ނޫމަޑި)ން ދިވެހި ސަރުކާރުގެ މައްޗަށް އާރބިޓްރޭޝަން މައްސަލަ ހުށަހެޅިއިރު، އޭރު ޑރ. މުހައްމަދު މުއިއްޒު ހުންނެވީ ހައުސިންގ މިނިސްޓަރުގެ މަގާމުގައެވެ. އޭރު ޑރ. މުއިއްޒު ދޮގު ބަޔާން ދެއްވުމާ ގުޅިގެން ދައުލަތަށް ވަނީ ބޮޑެތި ގެއްލުންތަކެއް ލިބިފައެވެ.
