މިއަދު ފުލުހުންގެ މުއައްސަސާއަކީ، ޒަމާނީ ފުލުހުންގެ މުއައްސަސާއެއްގެ ގިނަ ކަންކަން ފުރިހަމަ ތަނެއް: ކޮމިޝަނަރ
މިއަދުގެ ފުލުހުންގެ މުއައްސަސާއަކީ ބިނާކުރަނިވި ފާޑުކިޔުމަށް މަރުހަބާކިޔާނެ މުއައްސަސާއެއް ކަމަށް ވިދާޅުވި
ކޮމިޝަނަރ އޮފް ޕޮލިސް، މުހައްމަދު ހަމީދު
މިއަދު ފުލުހުންގެ މުއައްސަސާއަކީ ޒަމާނީ ފުލުހުންގެ މުއައްސަސާއެއްގައި ހުންނަންޖެހޭ ގިނަ ކަންކަން ފުރިހަމަވެފައިވާ މުއައްސަސާއެއް ކަމަށް, ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.
ޕޮލިސް ރިސަރޗް އެންޑް އިނޮވޭޝަން ކޮންފަރެންސް ފެށުމުގެ ރަސްމިއްޔާތުގައި ހޮނިހިރު ދުވަހު ވާހަކަފުޅުދައްކަވަމުން ކޮމިޝަނަރ ވިދާޅުވީ، ފުލުހުންގެ ޚިދުމަތުން ރައްޔިތުން އެދޭ އެދުންތައް ވަރަށް ބޮޑު ކަމަށެވެ. އަދި މިއަދު ފުލުހުންނަކީ ޒަމާނީ، ޑިމޮކްރެޓިވް ވެއްޓެއްގައި މަސައްކަތްކުރަން ގިނަ މަސައްކަތްތަކެއް ކުރަމުން އަންނަ މުއައްސަސާއެއް ކަމަށާއި، ފުލުހުންގެ މަސައްކަތް ފުރިހަމައަށް އަދާކުރެވޭނީ އައު ވިސްނުންތަކާއެކު، ކިޔަންޖެހޭ ފާޑު ކިޔައިގެން ކަމަށްވެސް އޭނާ ވިދާޅުވިއެވެ.
ކޮމިޝަނަރ ވިދާޅުވިގޮތުގައި މިއަދުގެ ފުލުހުންގެ މުއައްސަސާއަކީ ބިނާކުރަނިވި ފާޑުކިޔުމަށް މަރުހަބާކިޔާނެ މުއައްސަސާއެކެވެ.
ފުލުހުންގެ ރިސަރޗް އެންޑް އިންވޭޝަން ކޮންފަރެންސްގެ މުހިންމުކަމާ ގުޅޭގޮތުން ވާހަކަފުޅުދައްކަވަމުން ކޮމިޝަނަރ ވިދާޅުވީ، ޒަމާނަށް އަންނަ ބަދަލުތަކާއެކު ފުލުހުންގެ މަސައްކަތްތައް އަންނަނީ ވަރަށް ބޮޑަށް ބަދަލުވަމުންކަމަށެވެ. އެގޮތުން، ކުށުގެ ހާލަތާއި ކުށްކުރާ ގޮތްތަކާއި، ކުށްވެރިން ގެންގުޅޭ އުކުޅުތައް ޒަމާނާއެކު ބަދަލުވަމުން އަންނަކަމަށް އޭނާ ވިދާޅުވިއެވެ. އަދި މި ބަދަލުތައް އެންމެ ރަނގަޅަށް ދިރާސާކޮށް، އިލްމީ މައުލޫމާތުގެ އަލީގައި ފުލުހުންގެ މަސައްކަތްތައް ބައްޓަންކުރަމުން ދިއުމަކީ ޒަމާނީ ފުލުހުންގެ މުއައްސަސާއެއްގައި ހުންނަންޖެހޭ ސިފައެއްކަމަށް އޭނާ ވިދާޅުވިއެވެ.
މީގެ އިތުރުން ކޮންފަރެންސްގައި އެކި މައުޟޫތަކަށް ޕެނަލް ޑިސްކަޝަންތައް ކުރިއަށްދިއުމާއި، ސެކިއުރިޓީ އެކްސްޕޯއެއް ޚާއްޞަކޮށްފައި އޮތުމުގެ ސަބަބުން މުހިންމު މަގުސަދުތަކެއް ހާސިލްވާނެ ކަމަށްވެސް ކޮމިޝަނަރ ވިދާޅުވިއެވެ.
އައްޑޫ ސިޓީގައި ގާއިމްކޮށްފައިވާ ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓްގެ އޮނިގަނޑުގައި ރިސަރޗް ކުރުމުގެ މަސްއޫލިއްޔަތު ހިމެނޭއިރު، މި ކޮންފަރެންސްގައި އެ ކޮލެޖުގެ ކަރުދާހެއް ހުށަހެޅުމަކީ އުފާފުޅުވާ ކަމެއް ކަމަށާއި، ކުރިއަށް އޮތްތަނުގައި ދިރާސާތައް އިތުރުކުރާނެ ކަމަށް އުއްމީދުކުރައްވާ ކަމަށްވެސް ކޮމިޝަނަރ ވިދާޅުވިއެވެ.
