ގަވާއިދަށް ގެނައި އިސްލާހުން "އޮޓޯ ރިކްޝާ" އަދި "އޮޓޯ" އަށް ހުއްދައެއް ނުދޭ: ޓްރާންސްޕޯޓް މިނިސްޓްރީ
ކުރިޔަށް އޮތްތާގައިވެސް މި ބާވަތުގެ އުޅަނދު ރަޖިސްޓަރީ ކުރުމަށް ހުއްދަކުރެވިގެން ނުދާނެ
ޓްރާންސްޕޯޓް މިނިސްޓަރު އައިޝަތު ނަހުލާ
އެއްގަމު އުޅަނދުފަހަރު ދުއްވުމުގެ ލައިސަންސް ދޫކުރުމާބެހޭ ގަވާއިދަށް ގެނައި އިސްލާހާއެކު "އޮޓޯ ރިކްޝާ" އަދި "އޮޓޯ" ގެ ގޮތުގައި ބެލެވޭ އުޅަނދުފަހަރު ރަޖިސްޓަރީ ކުރުމުގެ ފުރުސަތު ނެތްކަމަށް ޓްރާންސްޕޯޓް މިނިސްޓްރީން ބުނެފިއެވެ.
ގަވާއިދަށް ގެނައި އިސްލާހުގައި ތިން ފުރޮޅުލީ އުޅަނދު ދުއްވުމުގެ ހުއްދަދެވޭ ގޮތަށް ޚާއްސަ ކެޓަގަރީއެއް ވަނީ އިތުރުކޮށްފައެވެ. އެކަމާއި ގުޅޭގޮތުން ޓްރާންޕޯޓް މިނިސްޓްރީން ބުނީ 3 ފުރޮޅުލީ އުޅަނދުގެ ގޮތުގައި "އޮޓޯ ރިކްޝާ" އަދި "އޮޓޯ" ގެ ގޮތުގައި ބޭނުންކުރާ އުޅަނދުތައް ދިވެހިރާއްޖޭގެ އެއްވެސް ރަށެއްގައި މިހާތަނަށް އޮޕަރޭޓް ކުރުމަށް ހުއްދަ ދީފައި ނުވެއެވެ. އަދި ކުރިޔަށް އޮތްތާގައިވެސް މި ބާވަތުގެ އުޅަނދު ރަޖިސްޓަރީ ކުރުމަށް ހުއްދަކުރެވިގެން ނުދާނެކަމަށް އެމިނިސްޓްރީން ބުނެއެވެ.
މީގެއިތުރުން 15 ޖުލައި 2021 ގައި ގެޒެޓްކޮށް އަމަލުކުރަމުންދާ އެއްގަމު އުޅަނދުފަހަރު ދުއްވުމުގެ ލައިސަންސް ދޫކުރުމާބެހޭ ގަވާއިދުގެ 14 ވަނަމާއްދާގައި ބަޔާންކޮށްފައި ވަނީ ލައިސަންސް ކެޓަގަރީތައް ކަމަށް މިނިސްޓްރީން ބުނެއެވެ. މި ކެޓަގަރީ ތަކުގައި B3 ، B4 ، C3 އަދި C4 އުޅަނދު ބަޔާންކޮށްފައި ވުމާއި އަދި މި އުޅަނދުތަކުގެ ކެޓަގަރީތައް ރަޖިސްޓްރޭޝަން ގަވާއިދުގައި ބަޔާންކޮށްފައި ނެތުމުގެ ސަބަބުން ރަށްރަށުގައި ބޭނުންކުރާ 3 ފުރޮޅުލީ މީހުން އުފުލާ "ބަގީ" ތަކާއި ރަށު ޕިކަޕް ރަޖިސްޓަރީ ކުރުމުގައި ދަތިތައް ދިޔައީ ކުރިމަތިވަމުންކަމަށް އެމިނިސްޓްރީން ބުނެއެވެ.
ލައިސަންސްއިން ގަވާއިދުގައި B3 ކެޓަގަރީގައި ހިމެނޭނީ، މީހުން އުފުލުމަށް ބޭނުންކުރާ، އިށީނުމުގެ ޖާގަ ތިން މީހުންނަށް ވުރެ އިތުރުނުވާ، ފަސިންޖަރުން އުފުލާ، 3 ތިން ފުރޮޅުލީ އުޅަނދެވެ. އެގޮތުން މި އުޅަނދުތަކަކީ މިހާރުވެސް މީހުން އުފުލާ "ބަގީ" ގެ ގޮތުގައި ފަސިންޖަރުން އުފުލުމަށް ރާއްޖޭގެ ރިޒޯޓުތަކުގައާއި ބައެއް ރަށްރަށުގައި ބޭނުންކުރާ އުޅަނދުތަކެވެ.
މި ގަވާއިދަށް މި ގެނެ ވުނު އިސްލާހުގެ މައިގަނޑު ބޭނުމަކީ ލައިސަންސް ކެޓަގަރީގައި 3 ފުރޮޅުލީ އުޅަނދުފަހަރަށް ލައިސަންސް ދެމުންގެންދާއިރު މި އުޅަނދުތަކަކީ ކޮބައިކަން ރަޖިސްޓްރޭޝަން ގަވާއިދުން ބަޔާންކޮށް އެ ކެޓަގަރީތައް ރަޖިސްޓަރީތަކުން ފެންނާނެގޮތަށް ކެޓަގަރައިޒު ކުރުމެވެ. މިކަން މިގޮތަށް ކަނޑައެޅުމުގެ ކުރިން ލައިސަންސް ގަވާއިދާއި ރަޖިސްޓްރޭޝަންގަވާއިދާއި ފުށުއެރުންތައް ހުރުމާއި އަދި 3 ފުރޮޅުލީ މީހުން އުފުލާ "ބަގީ" އުޅަނދު ރަޖިސްޓަރީ ކުރުމުގައި ބޮޑެތި ފުށުއެރުންތަކެއް ރަޖިސްޓްރޭޝަން ސިސްޓަމުގައިވަނީ ފާހަގަކުރެވިފައިކަމަށް ޓްރާންސްޕޯޓް މިނިސްޓްރީން ބުނެއެވެ. ހަމައެހެންމެ ގަވާއިދުން 3 ފުރޮޅުލީ "ބަގީ" ތަކަށް ވަކި ކެޓަގަރީއެއް ނެތި އޮތް އޮތުމުގެ ސަބަބުން ރިޒޯޓުތަކުގައާއި ރަށްރަށުގައި މިހާރުވެސް ބޭނުންކުރަމުންދާ މިފަދަ އުޅަނދުތައް ވަނީ ރަޖިސްޓަރީ ނުކުރެވިއެވެ. މިގެނެވުނު ބަދަލާއެކު މިކަމަށް ހައްލެއް ގެނެވިގެން ދާނެއެވެ.
ސިޓީ ކައުންސިލްތަކާއި ރަށު ކައުންސިލްތަކުން ގަރާޖުގެ ގޮތުގައި ޕާމިޓު ދޫކުރަމުންދާނީ 4 ފުރޮޅު ލީ އުޅަނދު ފަހަރަށެވެ. އަދި މިހާރު މިނިސްޓްރީއިން އުޅަނދުތައް ރަޖިސްޓަރީ ކުރާއިރު އެ އުޅަނދުގެ ފޮޓޯ ބަލައި އެ އުޅަނދަކީ ކޮންކަހަލަ އުޅަނދެއްކަން ޔަގީން ކުރަމުންދެއެވެ.
