މެންޗެސްޓަރ ޔުނައިޓެޑްގެ އުއްމީދީ ވިންގަރ އަލެހަންދްރޯ ގާނާޗޯ އެނބުރި ކުޅުމުގެ ތެރެއަށް އައުން އަވަސް ނުވާނެކަމަށް ރިޕޯރޓްތައް ބުނެފިއެވެ.
18 އަހަރުގެ ގާނާޗޯގެ ލިގަމެންޓަށް ލިބުނު އަނިޔާގެ ސަބަބުން ހަފްތާތަކަށް ކުޅުމާ ދުރުގައި ހުންނަން ޖެހޭނެކަމަށް ރިޕޯރޓްތައް ބުނެއެވެ. މެންޗެސްޓަރ ޔުނައިޓެޑްގައި ތަފާތު މޮޅަށް ކުޅެމުން, ނަތީޖާ ތަކުގައިވެސް މުހިއްމު ދައުރެއް އަދާކުރަމުން އަންނަ އާޖެންޓީނާގެ ގާނާޗޯއަށް އަނިޔާވީ މިމަހު ޤައުމީ ޓީމްގެ މެޗުތަކުންވެސް ފުރުޞަތު ލިބޭނެކަން ޔަޤީންވެފައި ވަނިކޮށެވެ. އޭނާއަށް އަނިޔާވީ އާދިއްތަ ދުވަހު ސައުތްހެމްޓަންއާ ވާދަކޮށް ލަނޑެއް ނުޖެހި އެއްވަރުވި މެޗުގައެވެ. އެމެޗުގައި ގާނާޗޯ ކުޅެން ނިކުތީ ބަދަލެއްގެ ގޮތުގައި 73 ވަނަ މިނިޓްގައެވެ. އަނިޔާވީ ކައިލް ވޯލްކާ-ޕީޓާރސްއާ ކުރި ޗެލެންޖެއްގައެވެ. ވަގުތުން އޭނާ ވަނީ ބަދަލުކޮށްފައެވެ.
އަނިޔާއާ ގުޅިގެން ގާނާޗޯ ބުނީ މެންޗެސްޓަރ ޔުނައިޓެޑަށް ވަރަށް މުހިއްމު ވަގުތެއްގައި ކްލަބަށް އެހީނުވެވޭތީ ވަރަށް ބޮޑަށް ދެރަވާކަމަށެވެ. އަދި ޤައުމީ ޓީމުން ލިބެން އޮތް ފުރުޞަތުގެ ބޭނުން ނުކުރެވުމަކީވެސް އޭނާއާ އާއިލާއަށްވެސް ލިބޭ މާޔޫސްކަމެއް ކަމަށެވެ. މެންޗެސްޓަރ ޔުނައިޓެޑަށް ކުރިއަށް އޮތީ ޔޫރޮޕާ ލީގުގެ ގަދަ ސޯޅަ ޓީމް ވާދަކުރާ ބުރުގެ ދެވަނަ ލެގުގައި ރެއާލް ބެޓިސްއާ ވާދަކުރާ މެޗެވެ. އޭގެފަހުން އެފްއޭކަޕްގައި ފުލަމްއާ ވާދަކުރާ މެޗެވެ.
ގާނާޗޯ ވަނީ މިސީޒަންގައި މެންޗެސްޓަރ ޔުނައިޓެޑަށް ހަތަރު ގޯލް ޖަހައިދީފައެވެ.
