މިދިޔަ އަހަރު އެކަނި ވެސް ކައްކާ ގޭހުގެ ސަބަބުން 49 އަލިފާނުގެ ހާދިސާ ހިނގާފައިވޭ: އެމްއެންޑީއެފް
12 މާރިޗު 2023 | އާދީއްތަ 06:14އަލިފާނުގެ ގިނަ ހާދިސާތައް ހިނގާފައިވަނީ މާލެ ސަރަހައްދުން
ރާއްޖެޓީވީގެ ފަލަސުރުޚީ ޕްރޮގްރާމްގެ ތެރެއިން
މިދިޔަ އަހަރު އަލިފާނުގެ ގިނަ ހާދިސާތައް ހިނގާފައިވާ ކަމަށާއި، ކައްކާ ގޭހުގެ ސަބަބުން އެކަނި ވެސް 49 ހާދިސާއެއް ހިނގާފައިވާ ކަމަށް މޯލްޑިވްސް ޑިފެންސް ފޯސް (އެމްއެންޑީއެފް)އިން ބުނެފިއެވެ.
ރާއްޖެޓީވީގެ ފަލަސުރުޚީގެ ޕްރޮގްރާމްގައި ފަސްޓް ލެފްޓިނެންޓް އިސްމާއީލް ރަޝީދު ވިދާޅުވީ ވޭތުވެދިޔަ އަހަރު ހިނގާފައިވާ އަލިފާނުގެ ހާދިސާތައް ގިނަ ކަމަށާއި، ކައްކާ ގޭހުގެ ސަބަބުން އެކަނި ވެސް ވަރަށް ގިނަ އަލިފާނުގެ ހާދިސާތައް ހިނގާފައިވާ ކަމަށެވެ. އެގޮތުން 49 ހާދިސާއެއް ރިކޯޑު ކުރެވިފައިވާއިރު، ފުރާނައަށް ނުރައްކާތެރި ހާދިސާތައް ހިނގާފައިވާކަން އޭނާ ފާހަގަކުރެއްވިއެވެ.
އިސްމާއީލް ވިދާޅުވީ އަތޮޅުތެރެއަށްވުރެ މާލެ ސަރަހައްދުން ހިނގާފައިވާ އަލިފާނުގެ ހާދިސާތައް ގިނަ ކަމަށެވެ. އަދި ބައެއް ހާދިސާތައް ހިނގާފައިވަނީ ގޭސް އުނދުން ބަހައްޓަން ނުވާވަރުގެ ކުދިކުދި ތަންތަނުގައި ގޭސްފުޅިއާއި އުނދުން ބަހައްޓައި ބޭނުންކުރުމުގެ ސަބަބުން ކަމަށް އިސްމާއީލް ވިދާޅުވިއެވެ.
ކުރިއަށް އޮތް ރަމަޟާން މަހަށް އިޝާރާތް ކުރައްވައި ވޮރަންޓް އޮފިސަރ3 އާސިމް ރަޝީދު ވިދާޅުވީ ގޭބިސީތަކުން ރޯދައަށް ޚާއްސަކޮށް ގެންގުޅޭ ސާމާނުތައް އައު ކުރާ ކަމަށެވެ. އެގޮތުން ބަދިގެ ސާމާނު އައު ކުރާއިރު، ގޭސްފުޅިއާއި، ގޭސްއުނދުނަށް މައްސަލައެއް ދިމާވެފައިވޭތޯ ނުބަލާކަން ފާހަގަކުރެވޭ ކަމަށް އާސިމް ވިދާޅުވިއެވެ.
އާސިމް ވިދާޅުވީ ގޭތެރެއިން ގޭސްވަސް ދުވާކަމަށް ޝައްކުކުރެވޭނަމަ ވެސް ފަޔަރ އެންޑް ރެސްކިއުގެ 118 ނަންބަރަށް ގުޅައި އެހީތެރިކަން ހޯދަންޖެހޭ ކަމަށެވެ. މީގެ އިތުރުން އާސިމް ވިދާޅުވީ ހިނގާފައިވާ ބައެއް އަލިފާނުގެ ހާދިސާތަކުގައި ގޭސްފުޅީގެ ހޮޅިއަށް ވަރަށް އާދައިގެ ހޮޅި ބޭނުންކޮށްފައިވާކަން ފާހަގަކުރެވޭ ކަމަށާއި، ގަހަށް ފެން ޖެހުމަށް ބޭނުން ކުރާ ހޮޅިވެސް ބޭނުންކޮށްފައިވާކަން ފާހަގަކުރެވިފައިވާ ކަމަށެވެ. މިފަދަ ކަންކަމުގެ ސަބަބުން ގިނަ ބަޔަކު ނުރައްކަލަށް ހުށަހެޅިގެންދާ ކަމަށާއި، ކުރިއަށް އޮތްތަނުގައި މިފަދަ ކަންކަމުން ދުރުވެ ސަލާމާތާއި ރައްކާތެރިކަން އިސްކުރުމަށް އޭނާ އެދިވަޑައިގެންނެވިއެވެ.
