ފަހު ވަގުތު އެމްބާލާ އެންޒޮލާ ޖެހި ޕެނަލްޓީއާއެކު ސްޕެޒިއާ އިން އިންޓަ ބަލިކޮށްފި

އިޓާލިއަން ލީގުގައި ސްޕެޒިއާއާ ދެކޮޅަށް ކުޅުނު މެޗުން އިންޓަ މިލާން ބަލިވެއްޖެ އެވެ.

ހުކުރު ދުވަހުގެ ރޭ ސްޕެޒިއާގެ ދަނޑުގައި ކުޅުނު މެޗުން އިންޓަ މިލާން ބަލިވީ 2-1 އިންނެވެ. މެޗުގެ ފުރަތަމަ ހާފުގެ 14 ވަނަ މިނެޓުގައި އިންޓަ އަށް ވަނީ ލީޑު ނަގާނެ ތަނަވަސް ފުރުސަތެއް ލިބިފަ އެވެ. އެ ޓީމަށް ލިބުނު ޕެނަލްޓީއެއްގައި އާޖެންޓީނާގެ ފޯވާޑް ލައުޓާރޯ މާޓިނޭޒް ފޮނުވާލި ބޯޅަ ސްޕެޒިއާގެ ގޯލް ކީޕަރު ވަނީ މަތަކޮށްފަ އެވެ. ދެ ވަނަ ހާފަށް ނިކުމެ ސްޕެޒިއާ އިން ވަނީ ލަނޑު ޖަހައި ލީޑު ނަގައިފަ އެވެ. މެޗުގެ 55 ވަނަ މިނެޓުގައި އެ ޓީމަށް ލީޑު ނަގައިދިނީ ޑަނިއަލް މަލްޑީނީ އެވެ. ބަދަލު ކުޅުންތެރިޔެއްގެ ގޮތުގައި ނިކުމެ އޭނާ ލަނޑު ޖެހީ އެމްބާލާ އެންޒޮލާ ތަނަވަސްކޮށްދިން ފުރުސަތެއްގަ އެވެ. އިންޓަ އަށް މެޗުގެ 83 ވަނަ މިނެޓުގައި ނަތީޖާ ހަމަހަމަކޮށްދިނީ ޕެނަލްޓީއަކުން ރޮމެލޫ ލުކާކޫ އެވެ. އޭގެ ހަތަރު މިނެޓު ފަހުން، މެޗުގެ ފުރިހަމަ ވަގުތު ހަމަވާން ތިން މިނެޓަށްވެފައި ވަނިކޮށް ސްޕެޒިއާ މޮޅުކޮށްދިނީ އެމްބާލާ އެވެ.

މެޗުން ބަލިވި ނަމަވެސް އިންޓަ އޮތީ ކުޅުނު 26 މެޗުން 50 ޕޮއިންޓާއެކު ތާވަލްގެ ދެ ވަނައިގަ އެވެ. އިންޓަ އަތުން މޮޅުވިި ސްޕެޒިއާ އޮތީ 24 ޕޮއިންޓާއެކު 17 ވަނައިގަ އެވެ.