ހަތް އަހަރު ފަހުން އިރާނާއި ސައުދީ އަރަބިއްޔާ އާ ދެމެދު އަލުން ސިޔާސީ ގުޅުން ގާއިމުކުރުމަށް އެއްބަސްވުމަކާ ހަމައަށް އާދެވިފައިވާކަމަށް އިރާނާއި ސައުދީ އަދި ޗައިނާއިން ނެރުނު ބަޔާނުގައި ވަނީ ހާމަކޮށްފައެވެ.

އިރާނާއި ސައުދީ އަރަބިއްޔާ އާ ދެމެދު ސިޔާސީ ގުޅުން ކަނޑާލީ 2016 ވަނަ އަހަރުއެވެ. މިލިޔުމުގައި, ސައުދީ އަރަބިއްޔާ އާއި އިރާނާއި ދެމެދު ގުޅުން ކެނޑިގެން ދިޔަގޮތާއި އޭގެފަހުން ދެ ގައުމުގެ ދޭތެރޭ ހިނގާދިޔަ ކަންތައްތަކާއި ދެ ގައުމުގެ ގުޅުން އަލުން ގާއިމުވެގެންދިޔަ ގޮތަށް ބަލާލަމެވެ.

ސައުދީ އަރަބިއްޔާއިން އިރާނުގެ 50 މީހުން ދަންޖައްސާ މަރާލިއެވެ. އޭގެތެރޭގައި ޝީއީންގެ އިސް ދީނީ އިލްމުވެރިއެއްކަމުގައިވާ ނިމްރު އަލް-ނިމްރު ހިމެނެއެވެ. އެއާއެކު ތެހެރާނުގައި ހުންނަ ސައުދީ އެމްބަސީގެ ތެރެއަށް އިރާނުގެ މުޒާހަރާކުރާ މީހުން ވަދެގަތެވެ. އަދި ޝީއީންގެ އެންމެ އިސް ލީޑަރ އާޔަތުﷲ އަލީ ޚާމަނާއީ، ނިމްރު މަރާލުމުގެ ބަދަލު ސައުދީގެ ކިބައިން ވޭންދެނެވި ގޮތަކަށް ހިފާނެކަމަށް ވައުދުވެވަޑައިގެންނެވިއެވެ.

ސައުދީ އަރަބިއްޔާއިން އިރާނާއި އޮތް ސިޔާސީ ގުޅުން ކަނޑާލިއެވެ.

ޔަމަނުގައި ހުރި އިރާނުގެ އެމްބަސީއަށް ވައިގެ މަގުން ދިން ހަމަލާތަކަކީ ސައުދީ އަރަބިއްޔާއިން ދިން ހަމަލާތަކެއްކަމަށް އިރާނުން ތުހުމަތުކުރިއެވެ. ނަމަވެސް ސައުދީގެ އޮފިޝަލުން ވަނީ އެއީ އިރާނުން ފަތުރާ ޕްރޮޕަގެންޑާއެއްކަމަށް ބުނެ އެކަން ދޮގުކޮށްފައެވެ.

އިރާނުގެ ހައްޖުވެރިންނަށް ސަލާމަތާއި ރައްކާތެރިކަން ފޯރުކޮށްދިނުމުގައި ސައުދީ ފެއިލްވެފައިވާކަމަށް ބުނެ އިރާނުގެ ހައްޖާޖީން ސައުދީއަށް ހައްޖުވާން ދިޔުން އިރާނުން މަނާކުރިއެވެ.

ސައުދީ އަރަބިއްޔާއަށް ތެޔޮ ލިބޭ މުހިންމު ތެޔޮވަޅުތަކުގެ ދެބައިކުޅަ އެއްބައި ތެޔޮވަޅަށް ހަމަލާތަކެއް ދީ އެތަންތަން ހަލާކުކޮށްލިއެވެ. ސައުދީން ތުހުމަތުކުރާ ގޮތުގައި އެހަމަލާތައް ދިނީ އިރާނުންނެވެ. އިރާނުން ވަނީ އެކަމުގައި އިރާނުގެ އެއްވެސް އަތެއް ނުވާކަމަށް ބުނެފައެވެ. ޔަމަނުގައި ހަރަކާތްތެރިވާ އިރާނުން ވާގިވެރިވާ ހޫޘީން ހަމަލާތައް ދިނީ އެމީހުންކަމަށް ބުނެ އެކަމުގެ ޒިންމާ ނެގިއެވެ.

އީރާންގެ އެންމެ ވަރުގަދަ ލަޝްކަރު ގުދުސް ފޯސްގެ ވެރިޔާ އަދި އެ ގައުމުގެ ސަލާމަތީ ބާރުތަކުގެ އިސްވެރިޔާ ގާސިމް ސުލައިމާނީ އިރާގުގެ ބަޣްދާދަށް އެމެރިކާއިން ދިން ޑްރޯން ހަމަލާތަކެއްގައި އަވަހާރަކޮށްލިއެވެ.

ދެ ގައުމުގެ ގުޅުން ގޯސްވިފަހުން ދެގައުމުގެ މެދުގައި ފުރަތަމަ ފަހަރަށް ސީދާ ވާހަކަތައް ބަޣްދާދުން އިސްނަގައިގެން ކުރިޔަށްގެންދިޔައެވެ. 2021 ވަނަ އަހަރުގެ އޭޕްރީލް މަހުން ފެށިގެން ސެޕްޓެމްބަރ މަހުގެ ނިޔަލަށް ހަތަރު ބުރަކަށް ދެ ގައުމުގެ ދެމެދު ވާހަކަތައް ކުރިޔަށްގެންދިޔައެވެ. ވާހަކަތައް ކުރިޔަށް ގެންގޮސްފައިވަނީ އިރާގާއި އޮމާނުން މެދުވެރިވެގެންނެވެ.

ފަސް ވަނަ ބުރުގެ ވާހަކަތައް ފެށުމަށް ތައްޔާރުވެފައިވަނިކޮށް އިރާނުން އެއްވެސް ސަބަބެއް ބަޔާންކުރުމެއް ނެތި ވާހަކަތަކުން އެއްފަރާތްވިއެވެ. އިރާނުން މިނިންމުން ނިންމާފައިވަނީ ސައުދީ އަރަބިއްޔާއިން ގިނަ އަދަދެއްގެ ބަޔަކު ދަންޖައްސާ މަރާލިތާ އެއް ދުވަސް ފަހުންނެވެ. އެމީހުންގެ ތެރޭގައި 41 ޝީއީންވެސް ހިމެނެއެވެ.

އިރާނާއި ސައުދީ އާ ދެމެދު ފަސް ވަނަ ބުރުގެ ވާހަކަތައް ކުރިޔަށްގެންދިޔައެވެ.

ދެ ގައުމުގައި އެމްބަސީ އަލުން ހުޅުވުމަށް ޚާމަނާއީގެ އިސް އެޑްވައިޒަރ ގޮވާލެއްވިއެވެ.

ޗައިނާގެ ރައީސް ޝީ ޖިންޕިންގ ސައުދީއަށް ވަޑައިގެން ސައުދީގެ ކްރައުން ޕްރިންސް މުހައްމަދު ބިން ސަލްމާން އާއެކު ވާހަކަތައް ބޭއްވެވިއެވެ.

އިރާނުގެ ރައީސް އިބްރާހީމް ރައީސީ ޗައިނާއަށް ވަޑައިގެން ޗައިނާގެ ރައީސް ޝީ ޖިންޕިންގ އާ ބައްދަލުކުރެއްވިއެވެ.