ޑަބްލިއުޑީސީގެ ބައި އިލެކްޝަން މިއަހަރު ބާއްވާނީ ޖޫން މަހު
10 މާރިޗު 2023 | ހުކުރު 12:35އެންމެ ގިނައިން ބާއްވަނީ އަންހެނުންގެ ތަރައްޤީއަށް މަސައްކަތް ކުރާ ކޮމެޓީގައި ބައި އިލެކްޝަންތައް
އިލެކްޝަންސް ކޮމިޝަންގެ ނައިބުރައީސް އިސްމާއިލް ހަބީބް
އަންހެނުންގެ ތަރައްޤީ އަށް މަސައްކަތް ކުރާ ކޮމެޓީ (ޑަބްލިއުޑީސީ) ގެ ބައި އިލެކްޝަން މިއަހަރު ބާއްވާނީ ޖޫން މަހު ކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.
އީސީ އިން ބުނީ އެންމެ ގިނައިން ބާއްވަނީ އަންހެނުންގެ ތަރައްޤީއަށް މަސައްކަތް ކުރާ ކޮމެޓީގައި ބައި އިލެކްޝަންތައް ކަމަށެވެ. އަހަރަކު އެއްފަހަރު ބައި އިލެކްޝަންތައް ބާއްވާ ގޮތަށް މިހާރު ހައްލު ލިބިފައިވާ ކަމަށާއި މިއަހަރު ބައި އިލެކްޝަން ބާއްވާ ތާރީހުގެ ގޮތުގައި ކަނޑައަޅާފައިވަނީ މިއަހަރުގެ ޖޫން މަސް ކަމަށް ވެސް ހަބީބް ވިދާޅުވިއެވެ.
ވ. ތިނަދޫގެ ޑަބްލިއުޑީސީގެ މެމްބަރު ކަމަށް ކުރިމަތިލުމަށް އެތައް ފަހަރަކު ހުޅުވާލައިގެން ވެސް އެއްވެސް މީހަކު މެމްބަރު ކަމަށް ކުރިމަތިލާފައި ނުވާއިރު އެކަމާއި ގުޅޭގޮތުން ހަބީބު ވިދާޅުވީ މިކަމާއި ގުޅިގެން އެލްޖީއޭ އާއި ޖެންޑަރ މިނިސްޓްރީއާއެކު ވެސް ކޮމިޝަނުން ދެފަހަރެއްގެ މަތިން މަޝްވަރާ ކޮށްފައިވާ ކަމަށެވެ. ވ. ތިނަދޫ އާއި ރަކީދޫއަށް ތިން މުއައްސަސާ އެއްކޮށް ޓީމުތައް ފޮނުވައިގެން ހޭލުންތެރިކަން އިތުރު ކުރުމުގެ ޕްރޮގްރާމްތައް ހިންގުމަށް ނިންމާފައިވާ ކަމަށް ވެސް ވިދާޅުވިއެވެ.
ހަބީބް އިތުރަށް ވިދާޅުވީ ރަށު ކައުންސިލްގެ ދައުރާ ކޮމެޓީގެ ދައުރުގައި ކޮންމެވެސް ވަރަކަށް ފުށުއަރާ ކަންތައްތަކެއް އެބަހުރި ކަމަށެވެ. އަދި މިކަމަށް ދިރާސާއެއް ކުރުން މުހިންމު ކަމަށް ވެސް ވިދާޅުވިއެވެ.
އަންހެނުންގެ ތަރައްޤީއަށް މަސައްކަތްކުރާ ކޮމިޓީ (ޑަބްލިއުޑީސީ) ގެ ބައި އިލެކްޝަން އަހަރަކު އެއްފަހަރު ބާއްވާގޮތަށް، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގެ ގަވާއިދަށް ގެނައި އިސްލާޙަށް އަމަލުކުރަން ފަށާފައިވަނީ މިދިޔަ އަހަރުގެ ޑިސެމްބަރުގައެވެ. މި ޤަވާއިދުގައި ބުނެފައިވާ ގޮތުގައި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރެއްގެ މަޤާމު ހުސްވެއްޖެނަމަ، ލޯކަލް ގަވަރމަންޓް އޮތޯރިޓީން، އިލެކްޝަންސް ކޮމިޝަނަށް އެކަން އަންގާތާ، ލަސްވެގެން 365 ދުވަސް (1 އަހަރު) ތެރޭގައި، އެ މެންބަރެއްގެ ބަދަލުގައި ކޮމިޓީއަށް މެންބަރަކު އިންތިޚާބު ކުރަން ޖެހެއެވެ. މީގެ ކުރިން ޤަވާއިދުގައި ބަޔާން ކޮށްފައި އޮންނަނީ 60 ދުވަހެވެ.
އޭގެ އިތުރުން، ކޮމިޓީގެ މެންބަރެއްގެ މަގާމު ހުސްވި އިރު، ކޮމިޓީގެ ދައުރުގައި އެއް އަހަރު، ނުވަތަ އެއަށްވުރެ ކުރު މުއްދަތެއް އޮތްނަމަ އެ ހުސްވި މަގާމަށް، އަލުން މެންބަރަކު އިންތިޚާބު ކުރަން ނުޖެހޭކަމަށްވެސް ޤަވާއިދުގައި ވަނީ ބަޔާންކޮށްފައެވެ.
ޤަވާއިދުގައި ބަޔާން ކޮށްފައިވާ ގޮތުގައި އަންހެނުންގެ ތަރައްޤީއަށް މަސައްކަތްކުރާ ކޮމިޓީއެއްގެ މެންބަރުކަމުގެ މަޤާމު ހުސްވެގެން ލޯކަލް ގަވަރމަންޓް އޮތޯރިޓީން، އިލެކްޝަންސް ކޮމިޝަނަށް އެކަން އެންގުމުގައި، އެ ކޮމިޓީއެއްގެ ބައްދަލުވުން ބޭއްވުމަށް ބޭނުންވާ ޤާނޫނީ އަދަދު ހަމަވާކަން ނުވަތަ ނޫންކަން، 14 ދުވަހުގެ ތެރޭގައި އިލެކްޝަންސް ކޮމިޝަނަށް އަންގަންވެސް ޖެހެއެވެ.
އަދި އެގޮތުގެ މަތިން މެންބަރަކު އިންތިޚާބު ކުރުމަށް ބާއްވާ ބައި އިލެކްޝަން ބާއްވާނެ ތާރީޚު، އިލެކްޝަންސް ކޮމިޝަނުން އާންމުކޮށް އިޢުލާނުވެސް ކުރަން ޖެހެއެވެ.
މިއީ އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ ބައި އިލެކްޝަން ގިނައިން ބާއްވަން ޖެހޭތީ ޚަރަދުތައް އިންތިހާއަށް ބޮޑުވެފައިވާ ކަމަށް އިލެކްޝަންސް ކޮމިޝަނުން ބުނެފައިވާތީ ގެނައި އިސްލާހެކެވެ.
