ކުނީގެ ފީ ދައްކަން ދެކޮޅު އެކަމަކު ޚިދުމަތް ބަރާބަރަށް ދޭންޖެހޭ!

ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ)އިން މާލެ ސަރަހައްދުގައި ދެމުންގެންދާ ކުނި މެނޭޖްކުރުމުގެ ޚިދުމަތްތަކަށް ކަނޑައަޅާފައިވާ ފީ, ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ)ގެ ބިލުގައި ހިމަނައިގެން 1 އޭޕްރީލް 2023އިން ފެށިގެން ނެގުމަށް އެންވަޔަރަމަންޓް މިނިސްޓްރީން މިވަނީ ވެމްކޯއަށް ހުއްދަދީފައެވެ. އެހެންކަމުން އަންނަ މަހުން ފެށިގެން ކަރަންޓު ބިލަށް ވެމްކޯގެ ބިލް ވެސް އިތުރުވެގެންދާނެއެވެ. މާލޭ ސަރަހައްދުގައި ފީދައްކަން ޖެހޭ ޖުމްލަ 53,690 (ފަންސާސް ތިންހާސް ހަސަތޭކަ ނުވަދިހަ) ގޭބިސީ ހުރި ނަމަވެސް، ވެމްކޯގެ ޚިދުމަތަށް ރަޖިސްޓްރީކޮށްގެން ބަރާބަރަށް ފީ ދައްކަމުން އަންނަނީ ގާތްގަނޑަކަށް 20,000 (ވިހި ހާސް) ގޭބީސީންނެވެ. މިހާ ގިނަ އަދަދެއްގެ ރައްޔިތުން ބިލް  ނުދެއްކުމުގެ ސަބަބުން ވެމްކޯއަށް މިވަގުތު ދިމާވެފައިވާ އެންމެ ބޮޑު އެއް ގޮންޖެހުމަކީ އެ ކޯޕަރޭޝަނުން ފޯރުކޮށްދޭ ޚިދުމަތްތަކަށް ކަނޑައަޅާފައިވާ ފީ ޚިދުމަތް ލިބިގަންނަ ބައެއް ފަރާތްތަކުން ގަވާއިދުން ނުދައްކާ މައްސަލައެވެ.

މިހެން މިކަން ދިމާވުމުން، ކުންފުނީގެ ކޭޝް ފްލޯ ދަތިވެ ޚިދުމަތް ފޯރުކޮށްދިނުމަށް ބޭނުންކުރަމުންދާ ބައެއް އާލާތްތައް (ކުނި އުފުލާ އުޅަނދުތަކާއި ކުނި ޕްރޮސެސްކުރުމަށް ބޭނުންކުރާ އިކުއިޕްމަންޓްތައް) އެކަށީގެންވާ ގޮތެއްގައި މަރާމާތު ނުކުރެވި، ބޭނުން ނުކުރެވޭ ހާލަތަށް އަންނަކަން ފާހަގަކުރެވެއެވެ. އަދި އެކަން ހައްލުކުރަން ކުރަންޖެހޭ ޚަރަދު އިތުރުވެއެވެ. އަދި މިކަމުގެ ސަބަބުން ގަވާއިދުން ކުނި ނަގައި މެނޭޖްކުރުމަށް ބޮޑެތި ގޮންޖެހުންތައް ކުރިމަތިވެއެވެ.

ކަރަންޓު ބިލަށް ވެމްކޯގެ ބިލް އިތުރުކުރަން ސަރުކާރަށް މި ޖެހުނީ ވެސް ބިލް ނުދައްކާ ތިބި ރައްޔިތުން ސަބަބުންނެވެ. ސަރުކާރުން ފޯރުކޮށްދޭ ހުރިހާ އަސާސީ ހިދުމަތެއް ރައްޔިތުން ބޭނުންވެއެވެ. ބައެއް މީހުން ޝަކުވާ ކުރަނީ ބޯހިޔަވާހިކަން ނުލިބެގެންނެވެ. އެހެންނަމަވެސް ފްލެޓް ލިބުމުން ފީ ދައްކާކަށް ބޭނުމެއް ނުވެއެވެ. ހިޔާ ފްލެޓްގައި ދިރިއުޅެމުންދާ ބައެއް ރައްޔިތުންގެ އަމަލުތައް ވެސް ހުރީ މިފަދައިންނެވެ. ބައެއް މީހުންގެ ފްލެޓްގެ އިންސްޓޯލްމަންޓާއި ޖޫރިމަނާ ހިމެނޭ ގޮތަށް ގާތްގަށޑަކަށް 20،000ރ. ދައްކަން އެޗްޑީސީން އަންގާފައިވެއެވެ. އެވަރުގެ އަދަދެއް އަރާނީ މިހާތަނަށް އެންމެ މަހަކު ވެސް ފައިސާ ނުދައްކާ ނަމައެވެ. އެތަނުގައި ތިބެން އޯކޭއެވެ. އެކަމަކު ފީ ދައްކާކަށް އޯކެއް ނޫނެވެ.

ކުނި މެނޭޖް ނުވުމާއި ކުނި އުކާލުމުގެ އިންތިޒާމް ރަނގަޅަށް ހަމަޖެހިފައިނުވާތީ އެކަމާ ވެސް ބައެއް ރައްޔިތުން ޝަކުވާ ކުރެއެވެ. އެހެންނަމަވެސް ކުނި އުކަން ބަޔަކު އައިސް އެ ޙިދުމަތް ދިނުމުން ފީ ދައްކާކަށް ބޭނުމެއް ނުވެއެވެ. ފީ ދައްކަން ދެކޮޅު އެކަމަކު ހިދުމަތް ބަރާބަރަށް ދޭންޖެހެއެވެ. ކުލި ދައްކަން ދެކޮޅު އެހެންނަމަވެސް ފްލެޓް ދޭން ޖެހެއެވެ. ފެން ބޭނުންވޭ އެކަމަކު ފެން ބިލް ދައްކާކަށް ބޭނުމެއް ނުވެއެވެ. 24 ގަޑިއިރު ކަރަންޓް ލިބެން ޖެހެއެވެ. އެހެންނަމަވެސް ކަރަންޓް ބިލް ދައްކާކަށް ބޭނުމެއް ނުވެއެވެ.

ފީ ދެއްކުމަކީ ފަހަރުގައި އަޅުގަނޑުމެން އެކަކުވެސް އެހާ ހިތްހަމަޖެހޭ ކަމަކަށް ނުވެދާނެއެވެ. އެމީހާގެ އަތުން އެއްވެސް ޚަރަދެއް ހިނގާކަށް އެއްވެސް މީހަކު ބޭނުމެއް ނުވެއެވެ. އެންމެން ވެސް ބޭނުންވަނީ ވެލްފެއަރއެއް ލިބުމަށެވެ. އިންސާނާގެ ދިރިއުޅުން ހަމަޖެހިފައި އޮންނަނީ ހަމައެކަނި ތިމާއަށް އެއްޗެހި ލިބޭ ގޮތަކަށް ނޫނެވެ. އޭގައި ދެކޮޅު ވެސް އޮވެއެވެ. ބައެއް މީހުން އުޅެން ބޭނުންވަނީ ވަނީ ވެލްފެއަރ ސްޓޭޓެއްގައެވެ. ހުރިހާ ކަމެއް ސަރުކާރުން ހިލޭ ކުރެވޭ ގޮތަށެވެ. ދުނިޔޭގައި ހުރިހާ ކަމެއް ހިލޭ ކޮށްދޭ ޤައުމުތައް ވެސް ވަރަށް މަދެވެ. ނެތޭ ބުންޏަސް ދޮގަކަށް ނުވާނެއެވެ. އާދަޔާ ޙިލާފަށް މުއްސަނދި ބުރޫނާއި ދާރުއްސަލާމް ފަދަ ޤައުމުތަކުގައި، އާންމުންނަށް ވަރަށް ގިނަ ކަންކަން ހިލޭ ކޮށްދެއެވެ. އެހެންނަމަވެސް ދުނިޔޭގެ އެންމެ ކުރިއަރާފައިވާ ޤައުމުތަކުގައި ވެސް ހުރިހާ ކަމެއް ހިލޭ ކޮށްދޭގޮތަކަށް ނޯވެއެވެ.

 މި ޒަމާނުގައި ތަކެތީގެ އަގުތަކާއި އަޅާބަލާއިރު ކުނި އުކާލުމުގެ ފީއަކީ އެހާ ބޮޑު އަދަދެއް ވެސް ނޫނެވެ. ކުނި އުކާލުމަށް ވެސް ނަގަނީ އެންމެ 150 ރުފިޔާއެވެ. އެހެންނަމަވެސް ކުނީގެ ފީ ނުދައްކާ މީހުންނަށް މި އަދަދު ދެއްކުން މިވަނީ ބޮޑު ކަމަކަށްވެފައެވެ. ކުނީގެ ފީ ދައްކަމުން ދިޔަ މީހުންނަށް ވެސް އިތުރު އުނދަގުލަކާއި ކުރިމަތިލާން މި ޖެހެނީ އެއްކަލަ ފީ ނުދައްކާ ތިބި ރައްޔިތުންގެ ސަބަބުންނެވެ. މިއަށްވުރެ އަޅުގަނޑުމެން ތަންކޮޅެއް ޒިންމާދާރުވާން ވެއްޖެއެވެ.