ޝައުބާންމަހު އަޅުކަމުގައި ހީވާގިވުމަކީ ރަމަޟާންމަހަށް ލިބޭ ތަމްރީނެއް: ޚުތުބާ

މުސްލިމުން މިހާރު ވޭތުކުރަމުންމިދާ ޝައުބާންމަހުގައި ހެޔޮ އަޅުކަމުގައި ހީވާގިވުމަކީ، ރަމަޟާންމަހު އަޅުކަމުގައި މަޝްއޫލުވުމަށް ލިބޭ ތަމްރީނެއް ކަމަށް ހުކުރު ޚުތުބާގައި ބުނެފިއެވެ.

ހުކުރު ޚުތުބާ ޚާއްސަކޮށްފައިވަނީ "ޝައުބާން މަހުގައި ހެޔޮއަމަލު ކުރުން" މި މައުޟޫއަށެވެ.

ޚުތުބާގައި ބުނީ ޝައުބާން މަހަކީ އެތައް ގޮތަކުން ޚާއްސަ މައްސަރެއް ކަމަށެވެ. މިއީ ރޯދަމަހަށް ތައްޔާރުވަމުން އަންނަ މައްސަރަކަށް ވުމުން ޝައުބާން މަހުގެ ހަނދު ފެނުމާއެކު ހެޔޮ އަމަލުތައް ކޮންމެ މުސްލިމެއްގެވެސް ހިތަށް ވަންނަ ކަމަށެވެ. މިއީ ރަމަޟާން މަހު އަޅުކަމުގައި މަޝްއޫލުވުމަށް ލިބޭ ތަމްރީނެއް ކަމަށް ޚުތުބާގައި ބުނެފައިވެއެވެ. އަހަރުމެންގެ ލޮބުވެތި މާތް ނަބިއްޔާ މިކަމުން ޖައްސަވާފައިވާ މިސާލު ޚުތުބާގައި ވަނީ ފާހަގަކޮށްފައެވެ.

އެއްވެސް މީހަކަށް އެމީހެއްގެ އަޖަލު ހަމަވާނެ އިރެއް ނޭނގޭނެކަން ފާހަގަކޮށް ޚުތުބާގައި ވަނީ "ވެހޭތާ ފެންނަގާށޭ" ބުނާފަދައިން ފުރުސަތުގެ ބޭނުން ހެޔޮގޮތުގައި ހިފުމަށް ނަސޭހަތްތެރިވެފައެވެ. ގިނަގިނައިން ހެޔޮ އަމަލުކުރުމަކީ ގަސްދަކާނުލައި ކުރެވޭ ފާފަތަކުން މާތް ﷲ އަހަރުމެން ސަލާމަތްކުރައްވާނެ ކަމެއް ކަމަށާއި، މިފަދަ ބަރަކާތްތެރި މައްސަރެއްގައި މާތް ނަބިއްޔާ އަހަރުމެންނަށް ނަމޫނާ ދައްކަވާފައިވާގޮތަށް ހެޔޮ އަމަލުކުރުންމަތީ ދެމިތިބުން މުހިންމުކަމަށް ޚުތުބާގައި ވަނީ ބުނެފައެވެ.

މީގެ އިތުރުން ރޯދަމަހަށް ތައްޔާރުވަމުންދާއިރު ވޭތުވެދިޔަ އަހަރުގެ ފަރުޟު ރޯދައެއް ގަޟާކުރަން ޖެހިފައިވާނަމަ އެ ރޯދައެއް އަވަހަށް ގަޟާކުރުމަށް ޚުތުބާގައި ވަނީ ނަސޭހަތްތެރިވެފައެވެ. އަދި ރަމަޟާންމަހުގެ އަޅުކަމަށް ވަގުތު ދެވޭގޮތަށް ވަގުތުތައް ރާވާލުމަށް ނަސޭހަތްތެރިވެފައިވެއެވެ.