ތިނަދޫ ކައުންސިލަށް ލިބެންޖެހޭ 4.7 މިލިއަން ރުފިޔާ ނުލިބޭތީ ގާނޫނީ ފިޔަވަޅު އަޅަނީ
10 މާރިޗު 2023 | ހުކުރު 07:18ފެބްރުއަރީ މަހުގެ ނިޔަލަށް އެ ކައުންސިލަށް ލިބެން ޖެހޭ 4.7 މިލިއަން ރުފިޔާ ނުލިބޭ
ގދ. ތިނަދޫ
ގދ. ތިނަދޫ ކައުންސިލަށް ބިމު ކުލީގެ ގޮތުގައި ލިބެން ޖެހޭ 4.7 މިލިއަން ރުފިޔާ ނުލިބޭތީ ގާނޫނީ ފިޔަވަޅު އަޅަން ފަށާފައިވާ ކަމަށް އެ ރަށު ކައުންސިލުން ބުނެފިއެވެ.
ތިނަދޫ ކައުންސިލުން ބުރާސްފަތި ދުވަހު ނެރުނު ބަޔާނެއްގައި ބުނީ ތިނަދޫ އިހުތިސާސް ހިނގާ ސަރަހައްދުން ހަރުގެ އެޅުމަށާއި މަސްވެރިކަމާއި ދަނޑުވެރިކަމުގެ އިތުުރުން ސިނާއީ އެކި މަސައްކަތަކަށް ދޫކޮށްފައިވާ ބިންތަކުގެ ކުލީގެ ތެރެއިން ގިނަ އަދަދެއްގެ ކުއްޔާއި ޖޫރިމަނާ ނުދައްކާ އެބަހުރި ކަމަށެވެ. އެގޮތުން މި ނިމުނު ފެބްރުއަރީ މަހުގެ ނިޔަލަށް އެ ކައުންސިލަށް ލިބެން ޖެހޭ 4.7 މިލިއަން ރުފިޔާ އެބަހުރި ކަމަށާއި މީގެ ތެރޭގައި ވަކި ފަރާތަކަށް ނިސްބަތްވާ ގިނަ ބިންތަކުގެ ކުލީގެ ޖުމްލަ މިލިއަނަކަށްވުރެ ގިނަ ކަން ވަނީ ފާހަގަކޮށްފައެވެ. ނަމަވެސް އެއީ ކޮން ފަރާތެއް ކަން އެ ކައުންސިލުން ހާމައެއް ނުކުރެއެވެ.
އެ ކައުންސިލުން ބުނީ ކުއްޔާއި ޖޫރިމަނާ ނުދައްކާ ހުރި ބިންތަކުގެ ތެރެއިން ބައެއް ބިންތަކުން އެ ފައިސާ ދައްކައި، ޚަލާސް ނުކޮށް މުއްދަތު އިތުރު ކުރުމަށް ވެސް ހުށަހަޅަމުންދާ ކަމަށެވެ. މިއީ ވަރަށް ހިތާމަ ހުރި ކަމެއް ކަމަށާއި އޭގެ ސަބަބުން އެ އިދާރާއިން ކަންބޮޑުވާ ކަމަށެވެ.
ކުލި ދައްކަން ޖެހޭ ފަރާތްތަކުގެ ތެރެއިން އެކި ސަބަބުތަކާހުރެ ކުލި ނުދެއްކި ހުރި ބިންތަކަށް 9 މެއި އިން ފެށިގެން ބައިބަޔަށް ބަހާލައިގެން ކުލި ދެއްކޭ އިންތިޒާމު ހަމަޖައްސައިދީ މުއްދަތެއް ކަނޑައަޅައި ސިޓީ ފޮނުވާފައިވާއިރު އެ ސިޓީތަކަށް ވެސް ބައެއް ފަރާތްތަކުން އިޖާބަނުދޭކަން ވެސް ތިނަދޫ ކައުންސިލުން ވަނީ ފާހަގަކޮށްފައެވެ.
މިފަދަ ކަންކަން ދިމާވުމުގެ ސަބަބުން ކުލި ނުދައްކާނަމަ ފައިސާ ހޯދުމަށް ޝަރުއީ މަރުހަލާތަކަށް ފޮނުވައި، އެފަދަ ނިންމުންތަކާ މެދުގެ ގާނޫނީ ގޮތުން އަޅަން ޖެހޭ ފިޔަވަޅުތައް އަޅަން ފަށާފައިވާ ކަމަށް ވެސް އެ ކައުންސިލުން ބުނެއެވެ.
