ކޮންމެ އަހަރަކުވެސް ރަމަލާން މަހާ ދިމާކޮށް އުމްރާގެ އަޅުކަން އަދާކުރުމަށް ގިނަ ބަޔަކު ސައޫދީ އަރަބިއްޔާއަށް ދަތުރުކުރެއެވެ.

މިގޮތުން މިހާރުން ފެށިގެންވެސް އުމްރާގެ އަޅުކަމަށްޓަކައި ދާ މީހުންގެ އަދަދު ވަރަށް ބޮޑަށް ވަނީ އިތުރުވެފައެވެ. މިކަމާގުޅިގެން, ހަރަމްފުޅުގެ ކަންތައް އިންތިޒާމްކުރުމުގައާއި ތަންތަން ފޮޅައި ސާފުކޮށް ބެހެއްޓުމަށް، ކުރިޔަށް އޮތް ރަމަލާން މަހު، ތަމްރީނުވެފައިވާ 12 ހާސް މުވައްޒަފުން ނެރޭނެ ކަމަށް، މަސްޖިދުލް ހަރާމް އަދި މަސްޖިދުއްނަބަވީގެ ކަންކަން ބަލަހައްޓާ ޖެނެރަލް ޕްރެޒިޑަންސީން އިއުލާންކޮށްފައި ވެއެވެ. މީގެ އިތުރުން 10 ދާއިރާއަކުން އިތުރު 8 ހާސް ވޮލަންޓިއަރުން ނެގުމުގެ އިންތިޒާމްވެސް ހަމަޖެހިފައިވާކަމަށް އެފަރާތުން ބުނެފައި ވެއެވެ.

އެންމެ ގިނަ މީހުން ހަރަކާތްތެރިވަނީ ހަރަމްފުޅުތެރޭގައި ރޯދަ ވީއްލުމުގެ އިންތިޒާމްތައް ހަމަޖައްސައިދީ، އަދި ކެއުންތަކަށް އިންސާފުކޮށް ނިމުމުން ސުފުރާ ނަގައި ސާފުކޮށް، އަދި އުމްރާވެރިންނަށް ބޭނުންވާ ފެނާއި ކޮފީފަދަ ތަކެތި ފޯރުކޮށްދިނުމަށެވެ. ރޯދަވީއްލާ ގަޑީގައި ކަދުރާ އެނޫންވެސް ހިކިމޭވާ ބެހުމުގައިވެސް ގިނަ ބަޔަކު ހަރަކާތްތެރިވެއެވެ.

ރޯދަ މަހު ހަރަމް ފުޅުގައާއި އަދި މަސްޖިދުއްނަބަވީގައި އެކި ކަންކަމުގައި ވޮލަންޓިއަރުންގެ ގޮތުގައި މަސައްކަތްކުރުމަށް ގިނަ އަދަދެއްގެ ބަޔަކު އިސްނަގައެވެ. މިކަން ވަނީ އިންތިޒާމް ކުރެވިގެން، އެންމެ ގިނަ މީހުން ވޮލަންޓިއަރުންގެ ގޮތުގައި މަސައްކަތްކުރާ ނިޒާމަށްވެސް ވެގެން ގޮސްފައެވެ.