"އާގަލާ" ބޯޓުގެ ތަކެތި އޮޔާދާތީ، ކަނޑުދަތުރުކުރާ ފަރާތްތަކުން ސަމާލުވުމަށް އިލްތިމާސްކޮށްފި
ތަކެތި އޮޔާދަނީ މ އަތޮޅު ކައިރިން އުތުރަށް
އާގަލާ ބޯޓުގައި ރޯވެފައި
އާދިއްތަ ދުވަހުގެ ރޭގެ ވަގުތެއްގައި "އާގަލާ" ބޯޓުގައި ރޯވެ އަޑިއަށް ގޮސްފައިވާއިރު, އެބޯޓުގައި ހުރި ބައެއް މުދާ އޮޔާދާތީ އެކަމަށް ސަމާލުވުމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) ކޯސްޓްގާޑުން އިލްތިމާސްކޮށްފިއެވެ.
އެމްއެންޑީއެފުން ބުނީ، ބޯޓު އަޑިއަށް ދިޔުމާ ގުޅިގެން ބޯޓުން ފެންމައްޗަށް އެރި ބައެއް ތަކެތި އޮޔާދާކަމުގެ މައުލޫމާތު ކޯސްޓް ކާޑަށް ލިބިފައިވާކަމަށެވެ. އަދި މިތަކެތި އޮޔާދަނީ މ އަތޮޅު ކައިރިން އުތުރަށް ކަމަށްވެސް ކޯސްޓްގާޑުން ބުނެއެވެ.
އެހެންކަމުން މިސަރަހައްދުން ކަނޑުދަތުރުކުރާ ފަރާތްތަކުން މިކަމަށް ސަމާލުކަން ދިނުމަށާއި، ވަކިން ޚާއްސަކޮށް ރޭގަނޑު މިސަރަހައްދުން ދަތުރުކުރާ ފަރާތްތަކުން އެކަމަށް ސަމާލުކަން ދިނުމަށް ކޯސްޓްގާޑުން އެދެއެވެ.
އެމްއެންޑީއެފުން ބުނީ އެ ބޯޓުގައި ރޯވެ، ބޯޓު އަޑިއަށް ގޮސްފައި ވަނީ ހޯމަ ދުވަހުގެ 08:20ގައި ކަމަށެވެ.
މާލެ ދަތުކުރަމުންދިޔަ ބޯޓެއްގައި އަލިފާން ރޯވެ އެކަކު ގެއްލިގެން ހޯދަން ފަށާފައިވާކަން އެމްއެންޑީއެފުން ހާމަކޮށްފައި ވަނީ އާދިއްތަ ދުވަހުގެ ރޭ ދަންވަރުގެ ވަގުތެއްގައެވެ.
އެމްއެންޑީއެފުން ބުނީ ބޯޓުގައި ރޯވުމާއެކު އޭގައި ތިބި އެންމެން ކަނޑަށް ފުންމާލާފައިވާކަމަށެވެ.
އޭރު އެ ބޯޓުގައި 15 މީހުން ތިބި ކަމަށާއި، އޭގެތެރޭގައި 5 ދިވެހިންނާއި އިންޑިއާ 5 މީހަކާއި ބަންގްލަދޭޝްގެ 5 މީހުން ހިމެނޭކަމަށް އެމްއެންޑީއެފުން ވަނީ ބުނެފައެވެ.
އެމްއެންޑީއެފުން ބުނީ އެ ބޯޓު ހޯދުމުގެ މަސައްކަތް ސެންޓަރަލް އެރިއާގެ ސިފައިން ކުރަމުން ދަނިކޮށް ކަނޑުވި މީހުންގެ ތެރެއިން 14 މީހަކު ފެނިފައިވާކަމަށެވެ. އަދި މިހާތަނަށް ނުފެނި ގެއްލިގެން ހޯދަމުން އަންނަނީ އިންޑިއާ މީހެއްކަމަށާއި، އެމީހާ އަދިވެސް ފެނިފައި ނުވާކަމަށް އެމްއެންޑީއެފުން ބުނެއެވެ. އެމީހާ ހޯދުމުގެ މަސައްކަތް ކަނޑާއި ވައިގެ މަގުން އަންނަނީ ކުރަމުންނެވެ.
ކަނޑުވި މީހުން ހޯދައި އެމީހުން ސަލާމަތްކޮށްފައިވަނީ ރޭ ފަތިހު 4 ޖެހި ފަހުންނެވެ.
