ބަޔާންއާ ދެކޮޅަށް ނޭމާއަށް ވެސް ނުކުޅެވޭނެ: ކޯޗު

ބުދަ ދުވަހުގެ ރޭ ޗެމްޕިއަންސް ލީގުގައި ބަޔާން މިއުނިކާ ދެކޮޅަށް ފޯވަޑް ނޭމާ ސަންޓޯސް އަށް ވެސް ނުކުޅެވޭނެ ކަމަށް ޕީއެސްޖީން ބުނެފި އެވެ.

ކޯޗު ގްރިސްޓޮފާ ގަލްޓިއާ ބުނީ ފެބްރުއަރީ މަހު ފްރާންސް ލީގުގައި ލިލްއާ ދެކޮޅަށް ކުޅެނިކޮށް ބްރެޒިލްގެ ފޯވަޑްގެ ފައިގެ ކުޑަހުޅަށް ލިބުނު އަނިޔާ އަދިވެސް ރަނގަޅު ނުވާ ކަމަށެވެ. މިހެންވެ ބަޔާން މެޗުގައި ކުރިއަށް ކުޅުވާނީ ފްރާންސްގެ ފޯވަޑް ކީލިއަން އެމްބާޕޭ އާއި އާޖެންޓީނާގެ ފޯވަޑް ލަޔޮނަލް މެސީ ކަމަށެވެ.

މި ދެ ޓީމު ކުޅުނު ފުރަތަމަ މެޗުގައި ޕީއެސްޖީ ވަނީ 1-0އިން ބަލިވެފަ އެވެ. މިހެންވެ ކުއާޓާ ފައިނަލަށް ދިއުމަށް ކޮންމެހެން ވެސް ދެ ލަނޑުން މޮޅުވާން ޖެހިފައިވާ މެޗުގައި ނޭމާފަދަ މުހިންމު ފޯވަޑަކު ނެތުމަކީ ވަރަށް ބޮޑު އުނިކަމެއް ކަމަށް ވެސް ކޯޗު ބުންޏެވެ.

ގަލްޓިއާ ބުނީ މެސީ އާއި އެމްބާޕޭ ތިބީ ފޯމުގައި ކަމަށާއި މިހެންވެ މި ދެ ކުޅުންތެރިންގެ ބޭނުން މެޗުގައި ވަރަށް ހިފާނެ ކަމަށެވެ. އަދި ކޮންމެހެން ނަތީޖާ ނެރެންޖެހޭ މެޗަކަށްވުމުން ޕީއެސްޖީން ކުޅޭނީ އެޓޭކިން ގޭމެއް ކަމަށާއި މެދުތެރެ ވަރުގަދަ ކުރުމަކީ މެޗުގައި ވަރަށް މުހިންމުވާނެ ކަމެއް ކަމަށެވެ.