ނަހުލާގެ ވާހަކަތައް ސިޓީ ކައުންސިލުން ދޮގުކޮށްފި
4 މާރިޗު 2023 | ހޮނިހިރު 09:52ހުރިހާ ކަމެއްވެސް ކޮށްފައިވާނީ އުސޫލުގެ ތެރެއިންކަމަށް ސިޓީ ކައުންސިލުން ބުނޭ
މާލޭ ސިޓީ ކައުންސިލްގެ ރައްޔިތުންގެ ބައްދަލުވުން
މާލޭ ސިޓީ ކައުންސިލުން, އިއުލާނު ނުކޮށް، އަދި ބިޑު ނުކޮށް، ކޮމިޓީ ތެރެއިން ކަންކަން ކުރަން މަސައްކަތްކުރާކަމަށް ވިލިމާލޭ ދާއިރާގެ ކައުންސިލް މެންބަރު ނަހުލާ އަލީ ކުރެއްވި ތުހުމަތުތައް އެ ކައުންސިލުން ދޮގުކޮށްފިއެވެ.
މާލޭ ސިޓީ ކައުންސިލުން ނެރުނު ބަޔާނެއްގައި ބުނެފައިވަނީ ބުރާސްފަތި ދުވަހުގެ ރޭ އާޓިފިޝަލް ބީޗުގައި ބޭއްވި އެ ކައުންސިލްގެ ރައްޔިތުންގެ ބައްދަލުވުމުގައި، ރިޔާސަތަށް ދެންނެވުނު ސުވާލުތަކުގެ ތެރެއިން، ވިލިމާލޭގައި ހިންގަމުންދާ ޝީޝިއާ ރެސްޓޯރަންޓުގެ މުއްދަތު އިތުރުކޮށްދީ، އަދި ރެޑްވޭވްއަށް ވިލިމާލެއިން ބިމެއް ދޫކޮށްފައިވާކަމަށް ބުނެ ދެންނެވި ސުވާލަކީ އެކަމުގެ ހަގީގަތް އޮޅޭގޮތަށް ދަންނަވާފައިވާ ސުވާލުތަކެއް ކަމަށެވެ.
މިކަމާ ގުޅިގެން ހުކުރު ދުވަހު ނަހުލާ ނެރުއްވި ބަޔާނެއްގައި ވިދާޅުވީ، ޝީޝިއާ ރެސްޓޯރެންޓު ހުރި ބިމުގެ މުއްދަތު އިތުރުކުރީ އުސޫލުގެ ތެރެއިން ކަމަށް ކައުންސިލުން ބުނިނަމަވެސް، އެ މުއްދަތު އިތުރުކޮށްފައިވަނީ އިއުލާނު ކުރެވިގެން ބިޑު ކުރުމަކާނުލައި ކަމަށެވެ. އަދި މިދިޔަ އަހަރުގެ ބޮޑު އީދަށް ވިލިމާލޭގައި ފާޚާނާ ބަރިއެއް އެޅުމަށް ބޭނުންވާކަމަށް އޭނާ ހުށަހެޅުމުން އެކަން ކުރަން ބަޖެޓު ނެތްކަމަށް ބުނެ ކައުންސިލުން އެ ފާހާނާ ބަރި އެޅުމަށް އެއްބަސްވެ، ޝީޝިއާ ރެސްޓޯރެންޓް ހުރި ބިމުގެ މުއްދަތު ބިޑުކުރުމަކާ ނުލައި އަވަސް އަރުވާލައިގެން އިތުރުކޮށްފައިވާ ކަމަށެވެ. ރެޑްވޭވަށް ބިމެއް ދީފައިވޭތޯ ރައްޔިތަކު ދެންނެވި ސުވާލަށް ޖަވާބު ދެއްވަމުން ނަހުލާ ވިދާޅުވީ، އެ މައްސަލަވެސް ކައުންސިލްގެ ރަސްމީ ޖަލްސާއެއްގައި ހުށަހަޅާފައި ނުވާކަމަށެވެ.
އެހެން ނަމަވެސް މި ވާހަކަތައް ކައުންސިލުން ދޮގުކުރެއެވެ. އެ ކައުންސިލުން ބުނީ ޝީޝިއާ ރެސްޓޯރަންޓްގެ މުއްދަތު އިތުކޮށްދީފައިވަނީ، ދެފަރާތުގެ މެދުގައި ވެފައިވާ އެއްބަސްވުމުގެ ދަށުން، މިފަދަ ކަންކަމުގައި އަމަލުކުރަމުންދާ އުސޫލުތަކާއި ގަވާއިދުތަކުގެ ދަށުން ކަމަށެވެ. އަދި މި އެއްބަސްވުމަށް މުއްދަތު އިތުރުކުރުމަށް އެދި ޝީޝިއާ ރެސްޓޯރަންޓުގެ ފަރާތުން ހުށަހަޅާފައިވާ ޕްރޮޕޯސަލްގައި، ވިލިމާލޭގައި ޕާކެއް ތަރައްގީކުރުމާއި، ވިލިމާލޭގެ އިރުމަތީފަރާތުގެ މާލެއާ ވީފަރާތުން ޕިކުނިކު ދާ ފަރާތްތަކަށް ޚާއްސަކުރެވިގެން ހަދާ އޭރިޔާގައި ބަހައްޓަންޖެހޭ ފާޚާނާބަރިއާއި ޝަވަރތަކާއި، ޗޭންޖިންގ ރޫމު ބަހައްޓާގޮތަށް ހުށަހަޅާފައިވާ ހުށަހެޅުން ވިލިމާލޭ ސަރވިސް ކޮމެޓީއަށް ހުށަހެޅުއްވީ ނަހުލާ ކަމަށްވެސް އެ ބަޔާނުގައި ވެއެވެ. އަދި އެ ހުށަހެޅުން ކޮމެޓީން ފާސްކޮށްފައިވަނީވެސް، ނަހުލާ ހުށަހެޅުއްވި ހުށަހެޅުމާއި ޝީޝިއާ ރެސްޓޯރަންޓުގެ ފަރާތުން ހުށަހެޅުއްވި ލިޔުންތައް ކޮމެޓީން ދިރާސާކުރުމަށްފަހު ކޮމެޓީގެ އަޣުލަބިއްޔަތުން ނިމުނުގޮތަށް ކަމުގައިވެސް އެ ބަޔާނުގައި ވެއެވެ.
ވިލިމާލެއިން ރެޑްވޭވަށް ބިމެއް ދޫކުރުމަށް އެއްބަސްވުން ހަދާފައިވަނީވެސް އެފަދަ ކަންކަން ކުރުމަށް އޮންނަ އުސޫލުގެ ތެރެއިން ކަމުގައިވެސް ސިޓީ ކައުންސިލުން ބުނެއެެވެ. އެ ގޮތުން ވިލިމާލޭގައި ދިރިއުޅޭ ރައްޔިތުންނަށް ވީހާވެސް ގާތުން ވިޔަފާރީގެ ޚިދުމަތް ލިބިދިނުމަށް ބޭނުންވެ، ވިލިމާލޭގައި ކޮމަރޝަލް ބިލްޑިންގެއް އެޅުމަށް ބޭނުންވާތީ، އެކަމަށް ޝައުގުވެރިވާ ފަރާތްތަކެއް ހޯދުމަށް މިދިޔަ އަހަރުގެ ފެބްރުވަރީ މަހު އިއުލާންކުރި ކަމަށް އެ ކައުންސިލުން ބުނެއެވެ. އަދި އެ ކަމަށް ޝައުގުވެރިކަން ހުރި ފަރާތްތަކުން ހުށަހަޅާފައިވާ ޕްރޮޕޯސަލްތައް ދިރާސާކުރުމަށްފަހު، ކައުންސިލަށް އެންމެ ފައިދާހުރި ހުށަހެޅުމެއް ހުށަހަޅާފައިވާ ފަރާތެއް ކަނޑައަޅާފައިވަނީ ކައުންސިލުގެ ބިޑުކޮމެޓީން ކަމަށްވެސް ބުނެފައިވެއެވެ.
އެ ޕްރޮޖެކްޓުތައް ކުރިއަށް ގެންގޮސްފައިވަނީ ކައުންސިލްގެ ހަތަރު ބައްދަލުވުމެއްގައި ބަހުސްކޮށް، ބައިވެރިވެވަޑައިގެންނެވި ހުރިހާ ކައުންސިލަރުންގެ އިއްތިފާގުން ކަމަށެވެ. އަދި އެ ބައްދަލުވުންތަކުގައި ނަހުލާ ވެސް ބައިވެރިވެވަޑައިގެން ބަހުސްކުރައްވައި ،އެ ކަންކަން ކުރިއަށް ގެންދިއުމަށް ވޯޓުވެސް ދެއްވާފައިވާކަމަށް ބަޔާނުގައި ބުނެއެވެ.
ބަޔާނުގައި ވަނީ ކަންކަން ކުރިއަށް ގެންގޮސްފައިވަނީ ދެފުށް ފެންނަގޮތަށް ކައުންސިލަށާއި ވިލިމާލޭގައި ދިރިއުޅޭ ފަރާތްތަކަށް އެންމެ ފައިދާހުރި ގޮތަށް ކަމަށެވެ.
