ދައުލަތުގެ އިދާރާތަކުގެ މެދުގައި ލިޔުންތައް ބަދަލުކުރަން ގާއިމް ކޮށްފައިވާ ނެޓްވޯކް ކަމަށްވާ ގަވަމެންޓް އީ ލެޓާ މެނޭޖްމަންޓް ސިސްޓަމް (ޖެމްސް)ގައި ސޮއިކުރެވޭ ގޮތަށް އެ ނެޓްވޯކް އަޕްގްރޭޑްކުރުމުގެ މަސައްކަތް ފަށައިފިއެވެ.

އެންވަޔަރުމެންޓް، ކްލައިމަޓް ޗޭންޖް އެންޑް ޓެކްނޮލޮޖީ މިނިސްޓްރީގެ ސްޓޭޓް މިނިސްޓަރު މުހައްމަދު ޝަރީފް "ރާއްޖެއެމްވީ"އަށް ވިދާޅުވީ ޖެމްސްއަކީ 2010ވަނަ އަހަރު ތައާރަފްކުރި ނިޒާމެއް ކަމަށާއި މިދިޔަ 13 އަހަރު ދުވަހު ވެސް ޖެމްސް ކުރިއަށް އެ ދަނީ މާ ބޮޑު އަޕްގްރޭޑަކާ ނުލައި ކަމަށެވެ. އަދި އެ ނިޒާމު މި ޒަމާނަށް ފެތޭގޮތަށް ބަދަލުކުރަން ޖެހޭ ކަމަށާއި އެ މަސައްކަތް މިހާރު ކުރަމުންދާ ކަމަށް އޭނާ ވިދާޅުވިއެވެ.

ޝަރީފް ވިދާޅުވީ މި މަހުގެ ފަހުކޮޅު ޖެމްސް މެދުވެރިކޮށް އިލެކްޓްރޯނިކް ސޮއި ކުރެވޭ ގޮތަށް ހެދުމުގެ މަސައްކަތްކުރަމުންދާ ކަމަށެވެ. އަދި ޖެމްސް މެދުވެރިކޮށް ސޮއިކުރަން ފެށުމުން ޑްރާފްޓްކުރުމާއި، އެޕްރޫވްކުރުމާއި، ފޮނުވުމާއި ވެރިފައިކުރުމައި މިފަދަ ހުރިހާ ކަމެއް ހިނގާނީ އޭގެ ތެރެއިން ކަމަށެވެ. އަދި އޭރުން ކަރުދާހުގެ ބޭނުން މުޅިންހެން ކެނޑޭނެ ކަމަށް އޭނާ ވިދާޅުވިއެވެ.

ޝަރީފް ވިދާޅުވީ ޕްރިންޓުކުރުމަށް ގަންނަ ޓޯނަރ، ޕްރިންޓަރުގެ ރިޕެއާކުރުން، އަދި ސްކޭނަރަށް ކުރާ ހަރަދު ފަދަ އެތައް ހަރަދެއް މި ކަމުގެ ސަބަބުން ކުޑަ ކުރެވޭނެ ކަމަށެވެ. މީގެ ސަބަބުން، އިލެކްޓްރޯނިކް ވޭސްޓް ވެސް މަދުވާނެ ކަމަށް އޭނާ ވިދާޅުވިއެވެ، އަދި މީގެ އިތުރުން ވެސް އިތުރު އަޕްގްރޭޑްތައް މި ނިޒާމަށް ގެންނަން ނިންމައިފައިވާ ކަމަށް ވެސް ޝަރީފް ވިދާޅުވިއެވެ.