ސަރުކާރުގެ އިދާރީ އޮނިގަނޑަށް ގެނައި ބަދަލު ފާސްކުރުމަށް މަޖިލީހަށް ހުށަހަޅައިފި
ޖުމްލަ 13 ބަދަލެއް ވަނީ ގެނެސްފައި
ރައީސް މުއިއްޒު، ކެބިނެޓް ވަޒީރުންނާއެކު
އައު ސަރުކާރުން އުފައްދާފައިވާ ވުޒާރާތަކާއި، އެ ވުޒާރާތަކުގެ މަސައްކަތުގެ ދާއިރާތައް ފާސްކުރުމަށް ރައްޔިތުންގެ މަޖިލީހަށް ހުށަހަޅައިފިއެވެ.
ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 116 ވަނަ މާއްދާގެ (ހ)އިން ރައީސުލްޖުމްހޫރިއްޔާއަށް ލިބިދޭ އިޚްތިޔާރުގެ ދަށުން، 17 ނޮވެންބަރު 2023ގައި އުފައްދަވާފައިވާ ވުޒާރާތަކާއި، އެ ވުޒާރާތަކުގެ މަސައްކަތުގެ ދާއިރާތައް ރައްޔިތުންގެ މަޖިލީހުން ފާސްކުރުމަށްޓަކައި، މަޖިލީހަށް ފޮނުއްވާފައިވަނީ މި މަހުގެ 18 ވަނަ ދުވަހުއެވެ.
އައު ބަދަލުތަކުގެ ތެރޭގައި މޯލްޑިވްސް އިމިގްރޭޝަން، ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން، ނޭޝަނަލް ސެންޓަރ ފޮރ އިންފޮމޭޝަން ޓެކްނޯލޮޖީ، ނޭޝަނަލް ޑްރަގް އެޖެންސީ އަދި ޑިޕާޓްމަންޓް އޮފް ޖުވެނައިލް ޖަސްޓިސް ވަނީ ހިމަނާފައެވެ.
މީގެ ތެރެއިން އިމިގްރޭޝަން މީގެ ކުރިން ހިންގަމުން އައީ ޑިފެންސް މިނިސްޓްރީގެ ބެލުމުގެ ދަށުންނެވެ. އަދި ނެޝަނަލް ސެންޓަރ ފޮރ އިންފޮރމޭޝަން ޓެކްނޮލޮޖީ ހިންގަމުން އައީ މިނިސްޓްރީ އޮފް އެންވަޔަރަމަންޓް ކްލައިމެޓްޗޭންޖް އެންޑް ޓެކްނޮލޮޖީގެ ދަށުންނެވެ. އަދި ނެޝަނަލް ޑްރަގް އެޖެންސީ ހިންގަމުން އައީ ހެލްތް މިނިސްޓްރީގެ ދަށުންނެވެ. މީގެ އިތުރުން ޑީއެންއާރު ބަލަހައްޓަމުން އައީ ހައުސިންގ މިނިސްޓްރީގެ ބެލުމުގެ ދަށުންނެވެ.
މިނިސްޓްރީ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓްގެ ދަށަށް ވަނީ ލޭބަރ ރިލޭޝަންސް އޮތޯރިޓީ އަދި ނޭޝަނަލް ޖޮބް ސެންޓަރު ބަދަލުކޮށްފައެވެ. އަދި ހެރިޓޭޖް މިނިސްޓްރީގެ ދަށުން ކުރިން ބަލަހައްޓަމުން އައި ނޭޝަނަލް ސެންޓަރ ފޮރ ދި އާޓްސްއާއި ނޭޝަނަލް އާޓް ގެލެރީއާއި، ގައުމީ ކުތުބުޚާނާގެ އިތުރުން، ނޭޝަނަލް ބިޔުރޯ އޮފް ކްލެސިފިކޭޝަން އަދި ގައުމީ އަރުޝީފު ވަނީ މިނިސްޓްރީ އޮފް ޔޫތު އެމްޕަވަރމަންޓް، އިންފޮމޭޝަން އެންޑް އާޓްސްގެ ދަށަށް ބަދަލުކޮށްފައެވެ.
