އިދިކޮޅުން އީދު ފާހަގަކުރުމަށް "އިންޑިއާ އައުޓް" ބޭނުންކުރާތީ ސަރުކާރުން އެކަން ކުށްވެރިކޮށްފި
މީގެ ސަބަބުން އިންޑިއާއާ ރާއްޖެއާ ދެމެދު އޮތް ގާތް ގުޅުމަށް ބުރޫ އަރާ
އިދިކޮޅުން އީދު ފާހަގަކުރުމުގެ ނަމުގައި ކުރިއަށްގެންދިޔަ ހަރަކާތް
އިދިކޮޅުން އީދު ފާހަގަކުރުމަށް އިންޑިއާގެ ބޮޑުވަޒީރު ނަރެންދްރަ މޯދީގެ ފޮޓޯފުޅާއި، "އިންޑިއާ އައުޓް" ސްލޯގަން ބޭނުންކުރާތީ ދިވެހި ސަރުކާރުން އެކަން ކުށްވެރިކޮށްފިއެވެ.
މިކަމާއި ގުޅިގެން ދިވެހި ސަރުކާރުގެ ފަރާތުން ނެރުނު ބަޔާނެއްގައި ބުނީ އިންޑިއާގެ ޕްރައިމިނިސްޓަރ ނަރެންދްރަ މޯދީގެ ސޫރަފުޅު ފެންނަ ފޮޓޯ ބޭނުންކޮށްގެން ހަދާފައިވާ ފޭސް މާސްކު ބޭނުންކޮށްގެން އިދިކޮޅުން އީދުގެ ހަރަކާތްތައް ކުރިއަށްގެންދާތީ އެކަން ކުށްވެރިކުރާ ކަމަށެވެ. އަދި މިފަދަ ހަރަކާތުގެ ތެރެއިން "އިންޑިއާ އައުޓް" ސްލޯގަން ބޭނުންކޮށްގެން ފަތުރަމުންދާ އެކި ވާހަކަތައް ދޮގުކޮށް ސަރުކާރުން ވަނީ އެކަން ކުށްވެރިކޮށްފައެވެ.
އީދުގެ މަތިވެރި އަދި އުފާވެރި ވަގުތެއްގައި ފިތުނަ އުފެއްދުމުގެ މަގުސަދުގައި އިދިކޮޅުން ހިންގާ މިފަދަ ބޭއަދަބީ ހަރަކާތްތަކުގެ ސަބަބުން ހަމައެކަނި އުފެދެނީ ފިތުނަ ފަސާދަ ނޫން ކަމަށާއި، އިންޑިއާއާ ރާއްޖެއާ ދެމެދު އޮތް ޒަމާންވީ ގާތް ގުޅުމަށްވެސް މިކަމުގެ ސަބަބުން ބުރޫ އަރާ ކަމަށް ސަރުކާރުން ބުނެފައިވެއެވެ.
އިންޑިއާއާ ރާއްޖެއާ ދެމެދު އޮތް ވަރުގަދަ ގުޅުމަކީ ގިނަ ކަންކަމެއްގެ މައްޗަށް ބިނާވެގެން އެކުލެވިފައިވާ ގުޅުމެއް ކަމަށާއި، އިންޑިއާއަކީ އަބަދުވެސް ރާއްޖެއާ އެންމެ ގާތް ގުޅުން އޮންނަ ގައުމު ކަމަށް ސަރުކާރުން ބުނެފައިވެއެވެ. ރާއްޖެއަށް ދިމާވި ކޮންމެ ކަމެއްގައި އިންޑިއާގެ އެހީއާއި އެއްބާރުލުން ލިބޭކަން ސަރުކާރުން ފާހަގަކުރެއްވިއެވެ.
އިންޑިއާއާއި ރާއްޖެއާ ދެމެދު އޮތް ޒަމާންވީ ގުޅުމަށް ފާއިތުވި 5 އަހަރުގެ ތެރޭގައި ބޮޑެތި ކުރިއެރުންތަކެއް ލިބިފައިވާކަން ފާހަގަކޮށް ސަރުކާރުން ބުނީ މިއީ ދެގައުމުގެ ފުރިހަމަ އެއްބާރުލުމުގެ ސަބަބުން ލިބުނު ކުރިއެރުމެއް ކަމަށެވެ. އިންޑިއާއިން ރާއްޖެއާ މެދު ގެންގުޅޭ "ނެއިބަރހުޑް ފަސްޓް ޕޮލިސީ" ސަރުކާރުން ބަލައިގަންނަ ކަމަށާއި، ރާއްޖެއިންވެސް "އިންޑިއާ ފަސްޓް" ޕޮލިސީ" ދެމެހެއްޓުމަށް ބާރު އަޅާ ކަމަށާއި، އިންޑިއާއާއެކު އޮންނަ ގާތްގުޅުން އެގޮތުގައި ބޭއްވުމަށް މަސައްކަތްކުރަމުންދާނެ ކަމަށް ސަރުކާރުން ބުނެފައިވެއެވެ.
ސަރުކާރުން ވަނީ ހުރިހާ ފަރާތްތަކުންވެސް މިކަންކަމަށް އިހުތިރާމުކޮށް ނުރަނގަޅު މައުލޫމާތު ނުފެތުރުމަށް އިލްތިމާސްކޮށްފައެވެ. ވަކިން ޚާއްސަކޮށް ރާއްޖެއާ ގާތް ގައުމުތަކާއެކު އޮންނަ ގުޅުމަށް ބުރޫ އަރާފަދަ ކަންކަން ނުކުރުމަށް ސަރުކާރުން ވަނީ އިލްތިމާސްކޮށްފައެވެ.
