ޔޫކޭގައި ސެލެޑު ހަދާ ތަރުކާރީ ލިބުން ދަތިވެ ސުޕަރމާކެޓުތަކުގެ ވެރިންނާ ބައްދަލުކޮށްފި
28 ފެބުރުއަރީ 2023 | އަންގާރަ 02:24ބައެއް ސުޕަރމާކެޓުތަކުން މިތަކެތި ވިއްކަނީ ލިމިޓެއް ކަނޑައަޅައިގެން
ޔޫކޭ ސުޕަރމާކެޓެއް
އިނގިރޭސިވިލާތުގައި ސެލެޑު ހެދުމަށް ބޭނުންވާ ތަރުކާރީގެ ބާވަތްތައް ލިބުން ދަތިވެ، ސުޕަރމާކެޓުތައް ހިންގާ ފަރާތްތަކާ އެގައުމުގެ ސަރުކާރުން ބައްދަލުކޮށްފިއެވެ.
އިނގިރޭސިވިލާތުން ސެލެޑު ހެދުމަށް ބޭނުންކުރާ ތަރުކާރީގެ ބާވަތްތައް ލިބުން ދަތިވެފައިވާތާ ތިންވަނަ ހަފްތާއަށް އަޅާފައިވާއިރު، ބައެއް ސުޕަރމާކެޓުތަކުން މިހާރު މިތަކެތި ވިއްކަނީ ލިމިޓެއް ކަނޑައަޅައިގެންނެވެ.
މިތަކެތީގެ ސަޕްލައި މަދުވެފައިވަނީ ދެކުނު ޔޫރަޕާއި، އުތުރު އެފްރިކާގައި މޫސުން ގޯސްވުމުގެ ސަބަބުން ކަމަށް ރޮއިޓަރސްގައި ރިޕޯޓުކޮށްފައިވެއެވެ.
މިއާއެކު ބްރިޓިޝް ފުޑް އެންޑް ފާމިން މިނިސްޓަރު މާރކް ސްޕެންސަރ ވަނީ ސުޕަރމާކެޓުތައް ހިންގާ ފަރާތްތަކާ ބައްދަލުކޮށްފައެވެ. އަދި މި ތަކެތީގެ ސަޕްލައި މަދުވެފައިވާތީ މިކަމާ ގުޅިގެން އެފަރާތްތަކުން އަޅަމުންދާ ފިޔަވަޅުތައް ވަނީ އޮޅުންފިލުއްވާފައެވެ.
އަދި ކުރިއަށް އޮތްތަނުގައި މިފަދަ ހާލަތެއް ދިމާވިޔަ ނުދިނުމަށް ވިޔަފާރިވެރިން ދަނޑުވެރިންނާއެކު މަސައްކަތްކުރާ ގޮތް ބަދަލުކުރުމަށް މިނިސްޓަރު އެދިވަޑައިގެންނެވިއެވެ.
