ވެލޯސޯ އާއެކު ކުރި މަސައްކަތުން ފިރިހެން ޓީމު އޮތީ އެހެން ލެވެލެއްގައި: ރަނޭ

ޤައުމީ ފިރިހެން ޓީމުގެ ކޯޗު، ބްރެޒިލްގެ ސާޖިއޯ ވެލޯސޯއާއެކު އެއް އަހަތުގެ ތެރޭގައި ކުރި މަސައްކަތުން ދިވެހި ޓީމު އޮތީ އެހެން ލެވެލެއްގައި ކަމަށް ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ ރައީސް މުޙައްމަދު ރަނޭޝް (ރަނޭ) ބުނެފި އެވެ.

ރަނޭ މިހެން ބުނީ މިހާރު ރާއްޖޭގައި ކުރިއަށްދާ ފޯ ނޭޝަންސް ކަޕްގެ ސެމީ ފައިނަލް މެޗުތަކުގެ ކުރިން ރާއްޖެ ޓީވީގެ ފަށާއިރު ޕްރޮގްރާމްގައި ވާހަކަ ދައްކަމުންނެވެ. ރަނޭ ބުނީ، މުބާރާތުގެ ދެ ވަނަ މެޗުގައި ސިންގަޕޫރާ ދެކޮޅަށް ކުޅުނު މެޗުން ދިވެހިންގެ ފެންވަރު އިނގުނު ކަމަށެވެ. ކުޅުންތެރިން ކުރަމުން އައި މަސައްކަތާއި، މިހާރު ވެސް ކުރަމުން އަންނަ މަސައްކަތް ފެނުނުކަން ފާހަގަކޮށް ރަނޭ ބުނީ، ޤައުމީ އަންހެން ޓީމު ވެސް ދުލެއް ނުދޭ ކަމަށެވެ. އަންހެން ޓީމު މިހާތަނަށް މެލޭޝިޔާއާ ދެކޮޅަށް އަދި ސިންގަޕޫރާ ދެކޮޅަށް ކުޅުނީ ވެސް ވަރަށް ވާދަވެރިކޮށްކަން ފާހަގަކޮށް ރަނޭ ބުނީ، ދިވެހި ދެ ޓީމު ވެސް ފައިނަލް ކުޅޭނެ ކަމުގެ އުންމީދު އޮތް ކަމަށެވެ.

ރަނޭ ބުނީ ފުރަތަމަ މެޗުގައި މެލޭޝިޔާއާ ދެކޮޅަށް ކުޅުމަކީ ވެސް ޕްރެޝަރެއް ކަމަށެވެ. ސަބަބަކީ އަމިއްލަ ސަޕޯޓަރުންގެ ކުރިމަތީގައި ކުޅޭއިރު، ޓީމު މޮޅުވާން އެދޭލެެއް ބޮޑުވާނެ ކަމަށާއި، އެކަމުގެ ޕްރެޝަރު އަންނާނެ ކަމަށެވެ. އެހެންނަމަވެސް، މިހާރު ޓީމުގައި އެ ޕްރެޝަރު ނޯންނާނެ ކަން ފާހަގަކުރަމުން ރަނޭ ބުނީ، ޓީމު މިހާރު އޮތީ ފައިނަލަށް ދާން އެންމެ ފުރިހަމަ އަށް ތައްޔާރަށް ކަމަށެވެ. އިތުރަށް ރަނޭ ވަނީ ސަޕޯޓަރުން ދެމުން އަންނަ ސަޕޯޓު ވެސް ފާހަގަކޮށްފަ އެވެ. އޭނާ ބުނީ ފުރަތަމަ މެޗަށްވުރެ ދެ ވަނަ މެޗުގައި ސަޕޯޓަރުން ގިނަ ކަމަށެވެ. އެ ދެ މެޗަށްވުރެ އަފްޣާނިސްތާނާ ދެކޮޅަށް ކުޅުނު މެޗުގައި ސަޕޯޓަރުން މާ ގިނަކަން ފާހަގަކޮށް ރަނޭ ބުނީ، ސެމީ މެޗުގައި އެދުމަކީ ދިވެހި ކުޅުންތެރިން ކުރަމުން އަންނަ މަސައްކަތުގައި ބައިވެރިވެ، ޤައުމަށް ރީތި ނަން ހޯދުމަށް ވީހާވެސް ގިނަ ރައްޔިތުން ޓީމަށް ސަޕޯޓު ކޮށްދިނުން އެދޭ ކަމަށެވެ.

އިތުރަށް ރަނޭ ބުނީ މިއީ ވަރަށް ދުވަސްތަކަށްފަހު އަމިއްލަ ފަސްގަނޑުގައި މުބާރާތެއް ކުޅުމަށް ދިވެހި ޓީމަށް ލިބުނު ފުރުސަތު ކަމަށާއި، މިއީ ދިވެހި ޓީމުގެ ފެންވަރު ދައްކާލަން ލިބުނު ވަރަށް ރަނގަޅު ފުރުސަތެއް ކަމަށެވެ. ރަނޭ އެދުނީ ކޮންމެ ބޭފުޅަކު ވެސް ރަތް ކުލައިގެ ހެދުމެއްގައި ނުވަތަ ޤައުމީ ވަންތަކަށް ރަމްޒުކޮށްދޭ އެއްޗެއްގައި ވަޑައިގެން ޓީމަށް ބޭނުންވާ ސަޕޯޓު ދިނުމަށެވެ. މީގެ އިތުރުން ބެރު ދުންމާރީގެ އަޑުން މުޅި ޒުވާނުންގެ މަރުކަޒު ގުގުމާލަ ދިނުމަށާއި، އެއީ ޓީމަށް ލިބޭ ވަރަށް ބޮޑު ހިތްވަރެއް ކަމަށް ވެސް ރަނޭ ބުންޏެވެ.

މުބާރާތުގެ ސެމީ ފައިނަލްގައި ރާއްޖެ އިން ނިކުންނާނީ އާދިއްތަ ދުވަހުގެ ރޭ މެލޭޝިޔާއާ ދެކޮޅަށެވެ.