ވަޅި ޖަހައި ޒަހަމްކޮށްލި ޒުވާނާ އަދިވެސް ވެންޓިލޭޓަރުގައި، ހާލު ސީރިއަސް

ހުކުރު ދުވަހުގެ ރޭ މާފަންނު ފިހާރައެއްގެ ތެރެއަށް ވަދެ ތޫނު އެއްޗަކުން ހަމަލާދީ ޒަހަމްކޮށްލި ޒުވާނާގެ ހާލަތަށް ބަދަލު ނާންނަކަމަށާއި އަދިވެސް ފަރުވާދެމުންދަނީ އައިސީޔޫގަައި ވެންޓިލޭޓަރުގައި ބާއްވައިގެން ކަމަށް އައިޖީއެމްއެޗުން ބުނެފިއެވެ.

އޭނާއަށް ލިބިފައިވާ އަނިޔާގެ ތަފްސީލު އެ ހޮސްޕިޓަލުން ހާމަކޮށްފައި ނުވާއިރު، އާންމުވެފައިވާ ވީޑީއޯތަކުން ފެންނަ ގޮތުގައި އޭނާގެ ގައިގެ އެތަން މިތަނަށް ވަނީ ވަޅި ޖަހައި ޒަހަމްކޮށްލައިފައެވެ. ވީޑިއޯތަކުން ފެންނަ ގޮތުގައި ފިހާރަ ތެރޭގައި ވެސް ހުސް ލޭ ހުރި އިރު، އޭނާ ލައިގެން ހުރި ގަމީހާއި ޖިންސުގައި ވެސް އޮތީ ލެއެވެ.

ހުކުރު ދުވަހުގެ ރޭ 09:20 ހާއިރު މާފަންނުގައި ހުންނަ ކްރާސާ ނަމަކަށް ކިޔާ ފިހާރައެއްގެ ތެރެއަށް ވަދެ, ވަޅި ޖަހައި ޒަހަމްކޮށްލާފައިވަނީ 30 އަހަރުގެ ޒުވާނެއްކަމަށް ފުލުހުން ބުނެއެވެ. އެނގިފައިވާގޮތުގައި އެ ފިހާރަ ތެރެއަށް އޭނާ ވަނީ ބަޔަކު މީހުން އޭނާ ހޯދަން އަންނާތީ ފިލަން ވެގެންނެވެ. ނަމަވެސް އެ ފިހާރަ ތެރޭގައި އޭނާ ހުއްޓައި ދެ މީހަކު އައިސް އޭނާއަށް ވަޅިން ހަމަލާދިނެވެ.

މި މައްސަލައިގައި ހޮނިހިރު ދުވަހުގެ ރޭ ކޯޓު އަމުރެއްގެ ދަށުން މީހަކު ވަނީ ހައްޔަރު ކޮށްފައެވެ.