ފަސޭހަކަމާއެކު ރާއްޖެ ބަލިކޮށް އަފްޣާނިސްތާން އެއްވަނައަށް

ފޯ ނޭޝަންސް ކަޕްގައި ފަސޭހަކަމާއެކު ރާޢްޖެ ބަލިކޮށް އަފްޣާނިސްތާނުން އެއްވަނާގައި ސެމީ ފައިނަލަށް ދަތުރުކޮށްފިއެވެ.

ހޮނިހިރު ދުވަހުގެ ރޭ ޒުވާނުންގެ މަރުކަޒުގެ އެތެރޭ ހޯލުގައި ކުޅުނު މެޗު އަފްޣާނިސްތާނުން ކާމިޔާބު ކުރީ ސީދާ ތިން ސެޓުންނެވެ. މެޗުގެ ފުރަތަމަ ސެޓު ފަށައިގެން ރާއްޖެއިން ވަނީ ރަނގަޅަށް ކުޅެ ދެ ޕޮއިންޓުގެ ލީޑެއް ނަގާފައެވެ. ނަމަވެސް އަފްޣާނިސްތާނުން ނަތީޖާ ހަމަހަމަކޮށްފައި ވަނިކޮށް، ރާއްޖެއަށް އަލުން ލީޑު ނަގައިދިނީ ހަސަން ނިލާމް (ޕާޓޭ) ފޮނުވާލި ބާރު ހަމަލާއިންނެވެ. އޭގެ ފަހުން ރާއްޖެއިން ހަތަރު ޕޮއިންޓުގެ ލީޑެއް ނެގީ އާދަމް ފައިރޫޒްގެ މޮޅު ބްލޮކަކުންނެވެ. އޭގެ ފަހުން ރާއްޖެއިން މުހިންމު ބޯޅަތަކެއްގައި މަސައްކަތްކޮށް، ފަސް ޕޮއިންޓަށް ލީޑު ފުޅާކުރީ ހުސައިން ޔޫސުފް (ޓޯއީ)ގެ މޮޅު ބްލޮކުންނެވެ. ސެޓުގައި އަފްޣާނިސްތާނަށް ގިނަ މައްސަލަތަކެއް ދިމާވިއިރު، އެ ޓީމުގެ ސަރވިސްތަކެއް ގެއްލުނެވެ. ސެޓުގެ ފަހުކޮޅަށް ދިޔައިރު ވެސް ލީޑު ހިފަހައްޓައި، ރާއްޖެއިން ވަނީ ރަނގަޅަށް ކުޅެފައެވެ. ނަމަވެސް އަފްޣާނިސްތާނުން ވަނީ ދެ ޕޮއިންޓަށް ފަރަގު ކުޑަކޮށްފައެވެ. ރާއްޖެއިން ސެޓުގެ ފަހުކޮޅުގައި ލީޑު ފުޅާކުރީ ޓޯއީ މެދުން ފޮނުވާލި އަވަސް ހަމަލާއިންނެވެ. ނަމަވެސް ރާއްޖެއަށް ހެދުުނު ގޯހެއްގެ ފައިދާ ނަގައި އަފްޣާނިސްތާނުން ވަނީ ނަތީޖާ ހަމަހަމަކޮށް، ސެޓުގެ ގޭމް ޕޮއިންޓު ހޯދާފައެވެ. ސެޓުގައި ރެފްރީގެ ނިންމުމަށް ޝަކުވާކޮށް، ދެކޮޅު ހެދުމުން ރާއްޖޭގެ ކޯޗަށް ވަނީ ރީނދޫ ކާޑެއް ދައްކާފައެވެ. އޭގެ ފަހުން ރާއްޖޭގެ ހުސައިން ރަޒާން ނަތީޖާ ހަމަހަމަކުރި ނަމަވެސް އަފްޣާނިސްތާނުން ވަނީ ފަހު ވަގުތު 26-24ން ސެޓު ކާމިޔާބުކޮށްފައެވެ.

ދެވަނަ ސެޓު ފަށައިގެން ވެސް ރާއްޖެއިން ވަނީ ފުރަތަމަ ސެޓާ އެއްގޮތަށް ރަނގަޅަށް ކުޅެ ލީޑު ނަގާފައެވެ. ނަމަވެސް އަފްޣާނިސްތާނުން ވަނީ ރަނގަޅު ހަމަލާތަކެއްގެ އިތުރުން ރަނގަޅު ބްލޮކްތަކުން ނަތީޖާ އެއްވަރުކޮށް، ލީޑު ނަގާފައެވެ. ސެޓުގެ މެދާ ހަމައިން އަފްޣާނިސްތާނުން ވަނީ ދެ ޕޮއިންޓުގެ ލީޑަކާއެކު ކުޅެފައެވެ. އެ ލީޑު ހިފަހައްޓައި އަފްޣާނިސްތާނުން ސެޓު ކާމިޔާބުކުރީ 25-21ންނެވެ. ރާއްޖެއިން ތިންވަނަ ސެޓަށް ނުކުތީ ޖަވާމް އަލީ، ޒުވާން ކުޅުންތެރިޔާ މާއިޝް އަހުމަދު އަދި ޝުއައިބް އަބްދުއް ލަތީފް ހިމަނައިގެންނެވެ. މި ސެޓު ފަށައިގެން ވެސް ކުރީކޮޅު ރާއްޖެއިން ވަނީ ލީޑު ނަގާފައެވެ. ނަމަވެސް އަފްޣާނިސްތާނުން ވަނީ ކުޅުން ރަނގަޅުކޮށް، ނަތީޖާ ހަމަހަމަކޮށް، ލީޑުވެސް ނަަގާފައެވެ. ސެޓުގެ ފަހުކޮޅު ވަނީ ޒުވާން ކުޅުންތެރިޔާ އަހުމަދު ނާފިއުއަށް ވެސް ފުރުސަތު ދީފައެވެ. ސެޓުގެ ފަހުކޮޅު ރާއްޖެއިން ވަނީ ނަތީޖާ ހަމަހަމަ ވެސް ކޮށްފައެވެ. ނަމަވެސް ރާއްޖެއަށް ކުރި ހޯދޭ ގޮތް ނުވެ، އަފްޣާނިސްތާނުން ސެޓު ނިންމާލީ 25-22ންނެވެ.

މުބާރާތުގެ ސެމީ ފައިނަލްގައި އާދިއްތަ ދުވަހުގެ މެންދުރު ކުޅޭނީ އަފްޣާނިސްތާނާއި ސިންގަޕޫރެވެ. ދެވަނަ ސެމީގައި އާދިއްތަ ދުވަހުގެ ރޭ ކުޅޭނީ ރާއްޖެއާއި މެލޭޝިޔާއެވެ.