ރާއްޖޭގައި މިހާރު ކުރިއަށްދާ ފޯ ނޭޝަންސް ކަޕް ވޮލީ ބޯޅަ މުބާރާތުގައި ފަސޭހަކަމާއެކު ސިންގަޕޫރު ބަލިކޮށް ރާއްޖެއިން މުހިންމު މޮޅެއް ހޯދައިފިއެވެ.

ހުކުރު ދުވަހުގެ ރޭ ޒުވާނުންގެ މަރުކަޒުގެ އެތެރޭ ހޯލުގައި އޮތް މެޗަށް ނުކުންނައިރު، ދެ ޓީމުވެސް ވަނީ ކުޅުނު ފުރަތަމަ މެޗުން ބަލިވެފައެވެ. އެ މެޗު ރާއްޖެއިން ކާމިޔާބުކުރީ ފަސޭހަކަމާއެކު، ސީދާ ތިން ސެޓުންނެވެ. މެޗު ފަށައިގެން ފުރަތަމަ ސެޓުގައި ލީޑު ކުރަމުން ދިޔައީ ސިންގަޕޫރުންނެވެ. ސެޓުގައި ރާއްޖޭގެ ހުސައިން ޔޫސުފް (ޓޯއީ) ކުރި ސަރވިސްއަކުންނާއި، އާދަމް ފައިރޫޒްގެ ބްލޮކަކުން ރާއްޖެއިން ވަނީ 19-19ން ނަތީޖާ ހަމަހަމަކޮށްފައެވެ. އޭގެ ފަހުން ސިންގަޕޫރުން ލީޑު ނެގި ނަމަވެސް، ހަސަން ނިލާމް (ޕާޓޭ)ގެ ބާރު ހަމަލާއަކުން ރާއްޖެއިން ނަތީޖާ ހަމަހަަމަކުރިއިރު، ރާއްޖެއަށް ލީޑު ލިބުނީ ސިންގަޕޫރުގެ ހަމަލާ ބޭރަށް ދިޔުމުންނެވެ. އޭގެ ފަހުން ރާއްޖޭގެ ހައިލަމް ހަސަންގެ ސަރވިސް ބޭރަށް ދިޔުމުން އަނެއްކާވެސް ނަތީޖާ ހަމަހަމަވިއެވެ. ނަމަވެސް ރާއްޖެއިން އެއް ޕޮއިންޓުގެ ލީޑެއް ހޯދައި، ދެ ޕޮއިންޓަށް ލީޑު ފުޅާކުރީ ޕާޓޭގެ ކާމިޔާބު ސަރވިންއަކުންނެވެ. ނަމަވެސް ރާއްޖެއަށް އަމިއްލަ ގޯސްތަކެއް ހެދި، ސެޓުގެ ނަތީޖާ ވަނީ 23-23ން އެއްވަރުވެފައެވެ. ސެޓުގައި ރާއްޖެއަށް ގޭމް ޕޮއިންޓު ހޯދައިދިނީ ކެޕްޓަން އަލީ ހުޒާމް (ހުޒަންޓޭ)އެވެ. އޭގެ ފަހުން ސިންގަޕޫރުން ނަތީޖާ ހަމަހަމަކުރިއިރު، ދެ ވަނަ ފަހަރަށް ރާއްޖެއަށް ގޭމް ޕޮއިންޓު ހޯދައިދިނީވެސް ހުޒަންޓޭއެވެ. ރާއްޖެއިން 26-24ން ފުރަތަމަ ސެޓު ކާމިޔާބުކުރީ ކުޅުމުގެ ތެރެއިން ސިންގަޕޫރުގެ ކުޅުންތެރިޔަކު ނެޓުގައި ޖެހުމުން ލިބުނު ޕޮއިންޓާއެކުއެވެ.

ދެ ވަނަ ސެޓު ފަށައިގެން ސިންގަޕޫރުން ލީޑު ނެގި ނަމަވެސް ރާއްޖެއިން ވަނީ ނަތީޖާ ހަމަހަކޮށް، ލީޑު ނަގާފައެވެ. އޭގެ ފަހުން ސިންގަޕޫރުން ވަނީ ނަތީޖާ ހަމަހަމަކޮށް ލީޑުވެސް ނަގާފައެވެ. އޭގެ ފަހުން ރާއްޖެއިން ވަނީ ނަތީޖާ ހަމަހަަކޮށް 10-7ން ލީޑު ނަގާފައެވެ. މި ސެޓުގައިވެސް ރާއްޖޭގެ ހުޒަންޓޭއާއި ޕާޓޭގެ ބާރު ހަމަލާތަކެއް ވަނީ ފެނިފައެވެ. އެއާއެކު ސިންގަޕޫރުން ނެގި ޓައިމް އައުޓަށްފަހު ކުޅެން ނުކުމެ ރާއްޖޭގެ ޓޯއީ ވަނީ މޮޅު ބްލޮކެއް ކޮށް ލީޑު ފުޅާކޮށްދީފައެވެ. އޭގެ ފަހުން ސިންގަޕޫރުން ދެ ޕޮއިންޓަށް ގާތްކޮށްފައި ވަނިކޮށް ރާއްޖޭގެ ޕާޓޭއާއި ހުސައިން ވިސާމް (ބުޅިކޭ)ވެސް ވަނީ މޮޅު ބްލޮކެއް ކޮށްފައެެވެ. ރާއްޖެއިން ވަނީ މި ސެޓުގައިވެސް މުހިންމު ބޯޅަތަކަކަށް މަސައްކަތްކޮށް، ލީޑު ހިފަހައްޓަން މަސައްކަތްކޮށްފައެވެ. ރާއްޖޭގެ ޕާޓޭގެ ބާރު ހަމަލާއަކުން ރާއްޖެއިން ވަނީ 16-12ން ލީޑު ނަގާފައެވެ. އޭގެ ފަހުން ސިންގަޕޫރުން ތިން ޕޮއިންޓު ހޯދިއިރު، ރާއްޖެއިން ވަނީ 18-15ން ލީޑުކޮށްފައެވެ. ސިންގަޕޫރަށް ދެ ޕޮއިންޓަށް ފަރަގު ކުޑަ ކުރި ނަމަވެސް، ހުޒަންޓޭ ވަނީ ރާއްޖެއަށް ލީޑު ފުޅާކޮށްދީފައެވެ. އޭގެ ފަހުން ރާއްޖެއިން ވަނީ 20-17ށް ވެސް ލީޑު ފުޅާކޮށްފައެވެ. އޭގެ ފަހުން ރާއްޖެއިން 22-18ން ލީޑު ކުރަމުން ދަނިކޮށް، ސިންގަޕޫރުން ދެ ޕޮއިންޓަށް ގާތްކުރިއެވެ. ރާއްޖެއަށް 23-20ން ލީޑު ނަގައިދިނީ ޕާޓޭއެވެ. މި ސެޓުގައި ރާއްޖެއަށް ގޭމް ޕޮއިންޓު ހޯދައިދިނީ ހުޒަންޓޭއެވެ. ރާއްޖެއިން 25-20ން ސެޓު ނިންމާލީ ސިންގަޕޫރުގެ ހަމަލާއެއް ބްލޮކްކޮށްގެންނެވެ.

ފުރަތަމަ ދެ ސެޓާ އެއްގޮތަށް ތިންވަނަ ސެޓު ފަށައިގެންވެސް ރާއްޖެއިން ވަނީ ލީޑު ނަގައިގެން ކުޅެފައެވެ. ސެޓުގެ ކުރީކޮޅު ރާއްޖެއިން ވަނީ 6-2ން ލީޑު ނަގައިގެން ކުޅެފައެވެ. މި ސެޓުގައިވެސް ރާއްޖެއިން މުހިންމު ބޯޅަތަކަށް ކުޅެ ހަމަލާތަކެއް އުފެއްދިއިރު، ސިންގަޕޫރުގެ ފަރާތުން ފެނުނީ އާދައިގެ ކުޅުމެކެވެ. ރާއްޖެއިން ވަނީ ސެޓުގައި 13-8ން ލީޑު ނަގާފައެވެ. އެ ލީޑު ނެގުމުގައި ރާއްޖޭގެ ފައިރޫޒްގެ މުހިންމު ބްލޮކުތަކެއް ވަނީ ފެނިފައެވެ. އޭގެ ފަހުން ސިންގަޕޫރުން އެއް ޕޮއިންޓު ހޯދިއިރު، ރާއްޖެއަށް 14-9ން ލީޑު ލިބުނީ ސިންގަޕޫރުގެ ސަރވިސް ނެޓަށް ދިއުމުންނެވެ. ރާއްޖެއިން ލީޑުގައި ކުޅެމުން ދަނިކޮށް، ސިންގަޕޫރުން ވަނީ 17-15ށް ފަރަގު ކުޑަކޮށްފައެވެ. އެއާއެކު ރާއްޖެއިން ވަނީ ޓައިމް އައުޓެއް ނަގާފައެވެ. އެ ޓައިމް އައުޓަށްފަހު ރާއްޖެއިން އަނެއްކާވެސް ވަނީ ކުޅުން ރަނގަޅުކޮށް، ލީޑު ހިފެހެއްޓުމަށް މަސައްކަތްކޮށްފައެވެ. ރާއްޖެއިން މި ސެޓުގައި ލީޑު ހިފެހެއްޓުމުގައި ޕާޓޭގެ ބާރު ހަމާލާ ވަނީ ފެނިފައެވެ. މެދުން ރާއްޖޭގެ ފައިރޫޒްގެ ކުއްލި ހަމަލާއެކު، ރާއްޖެއިން ވަނީ 23-19ށް ލީޑު ފުޅާކޮށްފައެވެ. ސެޓުގައި ރާއްޖެއަށް ގޭމް ޕޮއިންޓު ހޯދައިދިނީ ހުސައިން ރަޒާންއެވެ. އަދި 25-21ން ރާއްޖެއަށް ސެޓު ނިމި، މެޗުން މޮޅުވީ ސިންގަޕޫރުން ފޮނުވާލި ހަމަލާ ބޭރަށް ދިޔުމުންނެވެ.

ރާއްޖެއަށް ދެން އޮންނާނީ އަފްޣާނިސްތާނާ ދެކޮޅަށް ކުޅޭ މެޗެވެ.