ފަހަތުން އަރައި ސިންގަޕޫރު ބަލިކޮށް، އަފްޣާނިސްތާނުން މޮޅަކުން މުބާރާތް ފަށައިފި

ފޯ ނޭޝަންސް ވޮލީ ބޯޅަ މުބާރާތުގައި ކުޅުނު ފުރަތަމަ މެޗުގައި ފަހަތުން އަރައި ސިންގަޕޫރު ބަލިކޮށް އަފްޣާނިސްތާނުން މޮޅަކުން މުބާރާތް ފަށައިފިއެވެ.

ބުރާސްފަތި ދުވަހުގެ މެންދުރު ޒުވާނުންގެ މަރުކަޒުގެ އެތެރޭ ހޯލުގައި ކުޅުނު މެޗު އަފްޣާނިސްތާނުން ކާމިޔާބުކުރީ, ސިންގަޕޫރުން ފުރަތަަމަ ސެޓު ކާމިޔާބުކޮށްފައި ވަނިކޮށް ފަހަތުން އަރައި ތިން ސެޓު ކާމިޔާބުކޮށްގެންނެވެ. މެޗުގެ ފުރަތަމަ ސެޓުގައި ދެ ޓީމުގެ ފަރާތުންވެސް ފެނުނީ އާދައިގެ، ހަމަހަމަ ކުޅުމެކެވެ. ގާތް ގާތުގައި ޕޮއިންޓުތައް ހޯދަމުން ދިޔަ ސެޓު ސިންގަޕޫރުން ކާމިޔާބުކުރީ 25-22ންނެވެ. ދެ ވަނަ ސެޓު ފަށައިގެންވެސް ސިންގަޕޫރުން ލީޑު ކުރަމުން ދިޔަނަމަވެސް، އަފްޣާނިސްތާނުން ވަނީ ނަތީޖާ ހަމަހަމަކޮށްފައެވެ. ދެ ވަނަ ސެޓުގެވެސް ފުރަތަމަކޮޅު ހަމަހަމަކޮށް ކުޅުން ދިޔަނަމަވެސް، މެދުތެރެއިން ސިންގަޕޫރުން ވަނީ އަނެއްކާވެސް ލީޑު ނަގާފައެވެ. ސެޓުގެ ފަހުކޮޅު ސިންގަޕޫރުން ވަނީ ހަތަރު ޕޮއިިންޓުގެ ލީޑެއް ނަގާފައެވެ. އެއާއެކު އަފްޣާނިސްތާނުނުން ނެގި ޓައިމް އައުޓާއެކު އެ ޓީމުން ވަނީ ކުޅުން ރަނގަޅުކޮށް، ސެޓުގައި ލީޑު ނަގާފައެވެ. އެއާއެކު ސިންގަޕޫރުން އެ ޓީމުގެ ދެވަނަ ޓައިމްއައުޓް ނެގިއެވެ. ފަހަތުން އަރައި އަފްޣާނިސްތާނުން ދެވަނަ ސެޓު ކާމިޔާބުކުރީ 23-25ންނެވެ. އެއީ ސިންގަޕޫރުގެ ކުޅުންތެރިޔަކު ކުރި ސަރވިސްއެއް ބޭރަށް ދިޔުމުންނެވެ.

ފުރަތަމަ ދެ ސެޓާ ޚިލާފަށް ތިންވަނަ ސެޓު ފަށައިގެން ލީޑު ކުރަމުން ދިޔައީ އަފްޣާނިސްތާނެވެ. ސެޓުގެ މެދާ ހަމައިން އަފްޣާނިސްތާން ވަނީ ފަސް ޕޮއިންޓުގެ ލީޑެއް ނަގާފައެވެ. މި ސެޓުގައި އަފްޣާނިސްތާނުން ވަނީ އެ ޓީމުގެ ސްޕައިކްތަކާއި ބްލޮކްތައް ރަނގަޅުކޮށް، އަށް ޕޮއިންޓުގެ ލީޑެއްވެސް ނަގާފައެވެ. ނަމަވެސް ސިންގަޕޫރުން ވަނީ މަޑުމަޑުން ސެޓުގެ ތެރެއަށް ވަންނަން މަސައްކަތްކޮށް، އެއް ޕޮއިންޓަށް ފަރަގު ކުޑަކޮށްފައެވެ. ނަމަވެސް އަފްޣާނިސްތާނުގެ ބާރު ހަމަލާއަކުން އެ ޓީމުން މި ސެޓުވެސް ކާމިޔާބު ކުރީ 23-25ންނެވެ. ހަތަރުވަނަ ސެޓު ދެ ޓީމުންވެސް ފެށީ ތަފާތު ރޫހެއްގައެވެ. ސިންގަޕޫރުން މި ސެޓުގައި ލީޑު ކުރަމުން ދަނިކޮށް، އަފްޣާނިސްތާނުން ވަނީ އެއްވަރުކޮށް، ލީޑު ނަގާފައެވެ. އޭގެ ފަހުން ސިންގަޕޫރުން ނަތީޖާ ހަމަހަމަ ކުރުމާއެކު، އަފްޣާނިސްތާނުން ވަނީ ޓައިމް އައުޓެއް ނަގާފައެވެ. އެއަށްފަހު ސިންގަޕޫރުން ނަތީޖާ ހަމަހަމަ ކުރިނަމަވެސް އަފްޣާނިސްތާނުން ވަނީ އަލުން ދެ ޕޮއިންޓުގެ ލީޑެއް ނަގާފައެވެ. ދެ ޕޮއިންޓުގެ ލީޑު ހިފަހައްޓައި އަފްޣާނިސްތާނުން ސެޓު ކާމިޔާބު ކުރީ 23-25ންނެވެ.

މުބާރާތުގެ ފިިރިހެން ޑިވިޝަންގައި ބުރާސްފަތި ދުވަހުގެ ރޭ ކުޅޭނީ ރާއްޖެއާއި މެލޭޝިޔާއެވެ. އަފްޣާނިސްތާނުގެ ދެވަނަ މެޗުގައި އެ ޓީމުން ނުކުންނާނީ މެލޭޝިޔާއާ ދެކޮޅަށެވެ.