ލައުރެއުސް އެވޯޑު މެސީ އަށް ޙައްޤު: ނަޑާލް

މިއަހަރު އޮންނަ ލައުރެއުސް އެވޯޑުގައި ހޮވާ އަހަރުގެ އެންމެ މޮޅު ކުޅިވަރު ޝަޚުސިއްޔަތުގެ އެވޯޑު، އާޖެންޓީނާގެ ކެޕްޓަން ލިއޮނަލް މެސީ އަށް ޙައްޤު ކަމަށް ރަފައެލް ނަޑާލް ބުނެފި އެވެ.

މި އެވޯޑަށް މިއަހަރު ނޮމިނޭޓުވި ކުޅުންތެރިންނަކީ މެސީގެ އިތުރުން ފްރާންސްގެ ޒުވާން ކުޅުންތެރިޔާ ކީލިއަން އެމްބާޕޭ އާއި ނެދަލެންޑްސްގެ މޮޓޯ ރޭސިން އެތުލީޓު މެކްސް ވާސްޓެޕަން، ސްވިޑެންގެ މޮންޑޯ ޑުޕްލަންޓިސް، ސްޕެއިންގެ ޓެނިސް ކުޅުންތެރިޔާ ރަފައެލް ނަޑާލް އަަދި އެމެރިކާގެ ބާސްކެޓު ކުޅުންތެރިޔާ ސްޓެފެން ކަރީ އެވެ. މީގެ ކުރިން 2021 ވަނަ އަހަރު މި އެވޯޑު ކާމިޔާބުކޮށްފައިވާ ނަޑާލް އޭނާގެ އިންސްޓަގްރާމްގައި ކުރި ޕޯސްޓެއްގައި ބުނީ، ލައުރެއުސް އެވޯޑަށް އަނެއްކާ ވެސް ނޮމިނޭޓުވުމަކީ ލިބޭ ވަރަށް ބޮޑު އުފަލެއް ކަމަށެވެ. ނަމަވެސް މިއަހަރު އެވޯޑު ލިބެން ވާނީ މެސީ އަށް ކަމަށާއި، މެސީ އަށް އެ އެވޯޑު ޙައްޤު ކަމަށް ވެސް އޭނާ ބުންޏެވެ.

މެސީ ވަނީ މިދިޔަ އަހަރު ޤަތަރުގައި އޮތް ފީފާ ވޯލްޑް ކަޕް މުބާރާތް އާޖެންޓީނާއާއެކު ކާމިޔާބުކޮށްފަ އެވެ. މީގެ އިތުރުން އެ މުބާރާތުގެ އެންމެ މޮޅު ކުޅުންތެރިޔާ އަށް ވެސް ހޮވުނީ މެސީ އެވެ. މެސީ އަދި އާޖެންޓީނާ އިން ވޯލްޑް ކަޕް ކާމިޔާބު ކުރުމާ ގުޅޭ ގޮތުން ނަޑާލް އޭރު ބުނީ، އޭނާ އާޖެންޓީނާ އަށް ސަޕޯޓު ނުކޮށް، މެސީ ވޯލްޑް ކަޕްގެ ތަށި އުފުލާލި މަންޒަރު ފެނުމުން އޭނާގެ ލޮލުން ކަރުނަ އައި ކަމަށެވެ. އޭނާ ބުނީ ވަރަށް މޮޅަށް ކުޅެމުން އައި ކުޅުންތެރިޔަކު އޭނާގެ ކެރިއަރުގައި ހަމައެކަނި މަދުވާ ކާމިޔާބީ ހާސިލްކުރި މަންޒަރު ފެނުން އެއީ ޖަޒުބާތީ ވަގުތު ކޮޅެއް ކަމަށެވެ. މީގެ އިތުރުން ނަޑާލް ވަނީ މެސީ ރިޓަޔާ ކުރަން ބޭނުންނުވާ ކަމަށާއި، އަދިވެސް އިތުރު ކާމިޔާބީ ހޯދުމަށް އެދޭ ކަމަށް ބުނެފަ އެވެ.