ބާސެލޯނާގެ ކުރީގެ ކެޕްޓަން ލިއޮނަލް މެސީ، އެ ޓީމުގެ މިހާރުގެ ކެޕްޓަން ސާޖިއޯ ބުސްކެޓްސް އަދި ޖޯޑީ އަލްބާއާ ބައްދަލުކޮށްފި އެވެ.
މި ތިން ކުޅުންތެރިންނަކީ ވެސް ކުރިން އެކުގައި ބާސެލޯނާ އަށް ކުޅެ، އެ ޓީމާއެކު ގިނަ ކާމިޔާބީތަކެއް ހޯދި ތިން ކުޅުންތެރިންނެވެ. ބާސެލޯނާ ދޫކޮށް މެސީ ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށް ބަދަލުވި ނަމަވެސް، އޭނާ އާއި ބާސެލޯނާގެ ކުޅުންތެރިންނާމެދު ވަރަށް ގާތް ގުޅުމެއް އޮވެ އެވެ. ޚާއްސަކޮށް މެސީ އަލުން އަނބުރާ އެކުލަބަށް ގެނައުމުގެ މަސައްކަތް ބާސެލޯނާ އިން ކުރަމުން އަންނަ ކަމަށް ވެސް ބޭރުގެ މީޑިއާތަކުގައި ވަނީ ރިޕޯޓުކޮށްފަ އެވެ. މެސީ ވަނީ ބުސްކެޓްސް އާއި އަލްބާއާއެކު ރޭގަނޑުގެ ކެއުމެއްގައި ބައިވެރިވެފައި ކަމަށް ރިޕޯޓުތައް ބުނެ އެވެ. މެސީގެ އަންހެނުން އޭނާގެ އިންސްޓަގްރާމްގައި ޕޯސްޓު ކުރި ފޮޓޯ އަކީ އެ ކެއުމަށްފަހު ނެގި ފޮޓޯއެއް ކަމަށް ވެސް ރިޕޯޓުތައް ބުނެ އެވެ. މެސީ އާއި އޭނާގެ އަންހެނުންގެ އިތުރުން އެ ކައުމުގައި ބުސްކެޓްސް އާއި އަލްބާގެ ލޯބިވެރިން ވެސް ވަނީ ބައިވެރިވެފަ އެވެ.
ދެ އަހަރު ދުވަހުގެ އެއްބަސްވުމެއްގެ ދަށުން މެސީ ޕީއެސްޖީ އަށް ބަދަލުވިއިރު، އެ އެއްބަސްވުމުގެ މުއްދަތު މިއަހަރުގެ ޖޫން މަހުގެ ނިޔަލަށް ހަމަވާނެ އެވެ. ޕީއެސްޖީން އަންނަނީ މެސީގެ އައު އެއްބަސްވުމުގެ ކަންތަކާ ގުޅޭ ގޮތުން އޭނާގެ ބައްޕަ އާއި ވާހަކަ ދައްކައި، މަޝްވަރާ ކުރަމުންނެވެ. ފްރާންސްގެ މީޑިއާތަކުގައި ބުނެފައިވާ ގޮތުން ޕީއެސްޖީން އެދޭ ގޮތަށް މެސީ އެ ކުލަބުގެ އެއްބަސްވުން އައު ކުރާނެ އެވެ. ނަމަވެސް މިހާތަނަށް އެކަމުގައި ރަސްމީ އެއްވެސް ބަހެއް، ޕީއެސްޖީން ވެސް އަދި މެސީ ވެސް ބުނެފައިނުވާއިރު، މެސީ ބާސެލޯނާގެ ކުޅުންތެރިންނާ ބައްދަލުކުރުން ގިނަ ބަޔަކަށް ވަނީ އަޅައިގަނެފަ އެވެ.
