ފާއިތުވި ހަފްތާގެ ތެރޭގައި ރަޝިއާގެ ސެއިންޓް ޕިޓާރސްބާގްގައި ބޭއްވި އިންޓަރ ޕާލިމެންޓަރީ ޔޫނިއަން (އައިޕީޔޫ) ގެ ބައްދަލުވުމުގައި ބައިވެރިވި އިޒްރޭލުގެ ވަފްދު ލަދުގަންނަވާލައި، އެބައްދަލުވުމުން ބޭރުކޮށްފި އެވެ.

އިޒްރޭލުގެ ޤާނޫނު ހަދާ މަޖިލީހުގެ ވަފްދު ބޭރުކޮށްފައި ވަނީ، ރަޝިއާގައި ބޭއްވި އައިޕީޔޫގެ 137ވަނަ ބައްދަލުވުމުގެ ތެރެއިންނެވެ.

އައިޕީޔޫގެ މެމްބަރު ޤައުމުތަކުގެ ޤާނޫނު ހަދާ މަޖިލީހުގެ މެމްބަރުންގެ މެދުގައި ކޮންމެ އަހަރަކު އެއް ފަހަރު ބާއްވާ އައިޕީޔޫ އެސެމްބްލީގައި ބައިވެރިވި ކުވެއިތުގެ ޤާނޫނު ހަދާ މަޖިލީހުގެ ރައީސް މަރްޒޫގް އަލް-ޤާނިމް ވަނީ ބައްދަލުވުމުގައި ވާހަކަ ދައްކަން ލިބުނު ފުރުޞަތުގައި ފަލަސްތީނަށް އަތްގަދަކޮށްފައިވާ އިޒްރޭލުގެ ޔަހޫދީ ދައުލަތަށް ވަރަށް ބޮޑަށް ފާޑު ވިދާޅުވެފައެވެ. އަދި އައިޕީޔޫގެ މަޝްވަރާތަކުގެ ތެރޭގައި ވާހަކަ ދައްކަވަމުން، އިޒްރޭލުން ފަލަސްތީނުގެ ރައްޔިތުންނަށް ކުރިމަތިކުރުވާ ބޭއިންސާފާ ގުޅިގެން މަރްޒޫގް ވަނީ ވަރަށް ބޮޑަށް ކޯފާ އިސްކުރައްވާ، އެބައްދަލުވުމުގައި ބައިވެރިވެވަޑައިގެންނެވި އިޒްރޭލުގެ ވަފްދު ބައްދަލުވުން ނުކުމެވަޑައިގަތުމަށް ގޮވާލާފައެވެ.

އިޒްރޭލު ލަދުގަންނުވާލި މިބައްދަލުވުމުގައި އިޒްރޭލުގެ ވަފްދުން ވާހަކަ ދައްކަން ފެށުމުން، ބައްދަލުވުމުގެ ބައިވެރިވި ޤާނޫނު ހަދާ މަޖިލިސްތަކުގެ މެމްބަރުން ވަނީ މޭޒުގައި އަތް ޖަހައި، ފުރައްސާރަކޮށް، އިޒްރޭލުގެ ވަފްދުގެ ވާހަކަތަކަށް ހުރަސް އަޅާފައެވެ.

އިޒްރޭލުން ފަލަސްތީނުގެ ޤާނޫނު ހަދާ މަޖިލީހުގެ މެމްބަރުން ހައްޔަރުކޮށްފައިވާ މައްސަލާގައި ބޭއްވި މަޝްވަރާގެ ބައްދަލުވުމުގައި ބައިވެރިވެވަޑައިގެންނެވި އިޒްރޭލުގެ ވަފްދަށް އިޝާރާތް ކުރައްވައި ވާހަކަ ދައްކަވަމުން ކުވެއިތުގެ ޤާނޫނު ހަދާ މަޖިލީހުގެ ރައީސް މަރްޒޫގް އަލް-ޤާނިމް ވިދާޅުވީ، އަނިޔާވެރި އިސްތިއުމާރީ އިޒްރޭލްގެ ޤާނޫނު ހަދާ މަޖިލީހުގެ ވަފްދު ތަމްސީލް ކުރަނީ އެންމެ ނުރައްކާ ބާވަތުގެ ޓެރަރިޒަމް ކަމަށާއި، އެއީ ދައުލަތުން ހިންގާ ޓެރަރިޒަމް ކަމަށެވެ.

"ކަރާމާތުގެ ޒައްރެއްގެ މިންވަރު ހުރި ނަމަވެސް ހަމަ މިވަގުތު މިތަން ދޫކުރައްވާ ވަޑައިގަންނަވާާ! އިސްތިއުމާރީ ބާރާ! ކުޑަކުދިން މަރާ ޤާތިލް!" އިޒްރޭލުގެ ވަފްދަށް ނިސްބަތް ކުރައްވާ މަރްޒޫގް ވިދާޅުވި

އެ އަށް ފަހު އޭނާ ވަނީ، ލަދު އިހުސާސް ނުކުރެވޭ ނަމަ، ހިތް އެދޭހާ ގޮތަކަށް ކަން ކުރުމަށް ބުނެ ދުނިޔޭގެ މަޝްހޫރު މިސާލު ބަހަކުން އިޒްރޭލަށް ހަޖޫ ޖައްސަވާފައެވެ. އަދި ދުނިޔޭގެ ގައުމުތަކުގެ ޤާނޫނު ހަދާ މަޖިލިސްތައް ތަމްސީލްކުރާ މިބައްދަލުވުމުގައި އެހެން ގައުމުތަކުގެ ޤާނޫނު ހަދާ މަޖިލީހުގެ މެމްބަރުންގެ ފަރާތުން ކިޔާފައިވާ ފާޑުކިޔުންތައް އަޑުއިވުނު ނަމަ، ދަބަސްތައް ހިފައިގެން ހޯލުން ނުކުތުމަށް އޭނާ އިޒްރޭލުގެ ވަފްދަށް ގޮވާލެއްވި އެވެ.

"ކަރާމާތުގެ ޒައްރެއްގެ މިންވަރު ހުރި ނަމަވެސް ހަމަ މިވަގުތު މިތަން ދޫކުރައްވާ ވަޑައިގަންނަވާ. އިސްތިއުމާރީ ބާރާ. ކުޑަކުދިން މަރާ ޤާތިލް" އިޒްރޭލުގެ ވަފްދަށް ނިސްބަތް ކުރައްވާ ވަރަށް ބޮޑަށް ކޯފާ އިސްކުރައްވާ އޭނާ ވިދާޅުވި އެވެ.

މަރްޒޫގް އަލް-ޤާނިމްގެ މިވާހަކަތަކަށް އެބައްދަލުވުމުގައި ބައިވެރިވެވަޑައިގެންނެވި ޤައުމުތަކުގެ މަންދޫބުން އެވާހަކަތަކަށް ތާއީދު އޮތްކަން ހާމަކުރުމުގެ ގޮތުން އަތް ޖަހަނިކޮށް، އިޒްރޭލުގެ ވަފްދު ވަނީ ބައްދަލުވުން ބޭއްވި ހޯލް ދޫކޮށް ވަޑައިގަންނަވާފައެވެ. މީގެ އިތުރުން އިޒްރޭލުގެ ވަފްދު ހޯލް ދޫކުރައްވާ ވަޑައިގެންނެވުމުން ވެސް، ހޯލްގައި ތިއްބެވި ޤާނޫނު ހަދާ މަޖިލިސްތަކުގެ މެމްބަރުންގެ ތަރުހީބުގެ އަތްތިލަބަޑީގެ އަޑު އިވިގެންދިޔައެވެ.

މަރްޒޫގް އަލް-ޤާނިމްގެ ވާހަކަފުޅާ ބެހޭ ގޮތުން އައިޕީޔޫގައި ބައިވެރިވެވަޑައިގެންނެވި ފަލަސްތީނުގެ ޤާނޫނު ހަދާ މަޖިލީހުގެ ވަފްދުގެ އިސްވެރިޔާ އައްޒާމް އަލް-އަހުމަދު ވިދާޅުވީ، މަރްޒޫގުގެ ވާހަކަފުޅުން އަރަބި ހުރިހާ ޤައުމެއްގެ ޚިޔާލު ފާޅުވެގެން ދިޔަ ކަމަށެވެ. އަދި ދުނިޔޭގެ ޤާނޫނު ހަދާ މަޖިލިސްތަކުގެ މަންދޫބުންގެ ކުރިމަތީގައި ދެއްކި އެވާހަކަފުޅުން، ފަލަސްތީނުގެ ރައްޔިތުންނަށް ލިބިފައިވާ ޒަޚަމްތަކަށް އަލިކަމެއް ލިބިގެން ހިނގައްޖެ ކަމަށް އޭނާ ވިދާޅުވި އެވެ.

މީގެ އިތުރުން އިޒްރޭލުގެ އަޅުވެތިކަން ނިމުމަކަށް ގެނެސް ފަލަސްތީނުގެ މިނިވަން ދައުލަތެއް އެކުލަވާލުމަށް ކުރާ ކުރާ މަސައްކަތުގައި ހުރި ގޮންޖެހުންތައް، ބައިނަލްއަޤްވާމީ ޤާނޫނު ހަދާ މަޖިލިސްތަކުގެ ސަމާލުކަމަށް ގެނެވިފައިވާ ކަމަށް އޭނާ ވިދާޅުވި އެވެ.

ރަޝިއާގެ ސެއިންޓް ޕީޓަރސްބާގްގައި މިމަހުގެ 14 އިން 18 ވަނަ ދުވަހުގެ ނިޔަލަށް ކުރިއަށްދިޔަ އައިޕީޔޫގެ 137 ވަނަ ބައްދަލުވުމުގައި ދުނިޔޭގެ 176 ދައުލަތެއްގެ ޤާނޫނު ހަދާ މަޖިލިސްތަކުގެ މަންދޫބުން ބައިވެރިވެވަޑައިގެންނެވި އެވެ.