އިޒްރޭލުގެ ބޮޑުވަޒީރުގެ ގެކޮޅުގައި 'އަޅެއް'ހެން ގެންގުޅުނު މީހަކު ދައުވާކުރަނީ!
28 އޮކްޓޯބަރު 2017 | ހޮނިހިރު 15:58މިފަދަ ދައުވާތަކަކާއި ގުޅިގެން މިދިޔަ އަހަރުވެސް 2 މީހަކަށް ބަދަލު ދޭން ޖެހުނު
ނަތަންޔާހޫ އާއި އަނބިކަނބަލުން ސާރާ
އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ ގެކޮޅުގައި މަސައްކަތް ކުރާއިރު، އަޅެއްގެ އިހުސާސްކުރެވުނު ކަމަށް ބުނެ، އެގޭގެ މަސައްކަތު މީހެއްގެ ވަޒީފާ އަދާކުރި ޒުވާން އަންހެނަކު ނަތަންޔާހޫއާއި އޭނާގެ އަނބިކަނބަލުން ސާރާ ނަތަންޔާހޫ އާއި ދެކޮޅަށް ދައުވާކޮށްފިއެވެ.
އިޒްރޭލުގެ ބޮޑުވަޒީރުގެ ރަސްމީ ގެކޮޅުކަމަށްވާ ބައިތު އަޣިއޯންގައި މަސައްކަތު މީހެއްގެ ވަޒީފާ އަދާކުރި އުމުރުން 24 އަހަރުގެ އަންހެން މީހާ ބުނެފައި ވަނީ ގޭތެރޭގެ ސާފުތާހިރުކަމަށް ނަތަންޔާހޫގެ އަނބިކަނބަލުން ސާރާ ބަހައްޓަވާ ސަމާލުކަމުގެ ބޮޑުކަމުން ގޭތެރޭގައި ކެއުމަކީވެސް އޭނައަށް މަނާ ކަމެއްކަމަށެވެ. އަދި ދުވާލަކު 100 ވަރަކަށް ފަހަރު އަތް ދޮންނަން މަޖުބޫރު ކުރުވާކަމަށާއި، ރުޅިއައިސްގެން އޭނައާއި ދިމާއަށް ހަޅޭއްލަވާކަމަށް މިމައްސަލައިގައި ބަދަލު ހޯދުމަށް ކޯޓަށް ހުށަހަޅާފައިވާ ލިޔެކިޔުމުގައިވެއެވެ. އަދި އެގޭގައި މަސައްކަތް ކުރުމަށް ހޯދަނީ މުޅިން ވެސް ހަރުކަށި ފިކުރުގެ ޔަހޫދީންނާއި، ދުވަން ދާ، ހިކި އަންހެނުންކަމަށް ސާރާ ވިދާޅުވާކަމަށް ލިޔެކިޔުންތަކުގައިވެއެވެ. މީގެ އިތުރުން ވަޒީފާގައި އުޅޭއިރު ޗުއްޓީ ނުނަގަން ހުވައި ކުރުވިކަމަށާއި، މަސައްކަތުގައި އުޅޭވަގުތު ހުސްވަގުތުކޮޅެއް ހޯދާލަން ވެސް ފުރުސަތު ނުދޭކަމަށް ޔެދިއޮތު އަހްރޮނޮތު ކިޔާ މި އަންހެން މީހާ ބުނެފައިވެއެވެ. އަދި ސާރާ އާއި އެކު ނަތަންޔާހޫގެ ދަރިކަލުން ޔައިރް ނަތަންޔާހޫވެސް އޭނާއަށް ފުރައްސާރަކުރުމުގައި ބައިވެރިވިކަމަށް އެދައުވާގައި ބުނެފައިވެއެވެ.
މިމައްސަލައިގައި އަންހެން މީހާ އެދިފައިވަނީ އަޅެއް ފަދައިން މަސައްކަތް ކުރުވާފައިވާތީ ބަދަލެއްގެ ގޮތުގައި 63،000 އެމެރިކާ ޑޮލަރު ނަގައި ދިނުމަށެވެ.
މިދައުވާތަކާއި ގުޅިގެން ފޭސްބުކްގައި ޢިބްރީ ބަހުން ލިޔުއްވާފައިވާ ބަޔާނެއްގައި އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވީ މިއީ އޭނާގެ އަގު ވައްޓާލުމަށް ކުރެވޭ މަސައްކަތުގެ ބައެއް ކަމަށެވެ. އަދި އެ އަންހެން މީހާ ބޮޑުވަޒީރުގެ ގެކޮޅުގައި މަސައްކަތް ކޮށްފައިވަނީ އޮގަސްޓް މަހުން ސެޕްޓެމްބަރުގެ ނިޔަލަށް ކަމަށާއި، އެކުޑަ ދުވަސްކޮޅު ސާރާ ނަތަންޔާހޫއަށް އެ އަންހެން މީހާ ފެނިފައިވާނީ މަދު ދުވަހަކުކަމަށް ބުނެފައިވެއެވެ.
މިދިޔަ އަހަރު ވެސް އިޒްރޭލުގެ ބޮޑުވަޒީރުގެ ގެކޮޅު ބައިތު އަޣިއޯން ގައި މަސައްކަތް ކުރި 2 މީހަކަށް ނަތަންޔާހޫގެ އަނބިކަނބަލުންގެ ފަރާތުން ކުރިމަތިވި އުނދަގޫތަކުގެ ބަދަލުގެ ގޮތުގައި 78 ހާސް އެމެރިކާ ޑޮލަރު ދިނުމަށް އިޒްރޭލުގެ ކޯޓަކުން ނިންމިއެވެ.
