އިޒްރޭލުގެ ބޮޑުވަޒީރު ރަސްމީ ދަތުރުފުޅެއްގައި އިންޑިއާ އަށް ވަޑައިގެންފި

އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އިންޑިއާ ކުރައްވާ ފުރަތަމަ ދަތުރުފުޅުގައި އާދީއްތަ ދުވަހު އެގައުމަށް ވަޑައިގެންފިއެވެ.

އިޒްރޭލާއި އިންޑިއާ އާ ދެމެދު ޑިޕްލޮމެޓިކް ގުޅުން ގާއިމުކޮށްފައިވާތާ 25 އަހަރުވެފައިވާ އިރު، އިޒްރޭލު ބޮޑުވަޒީރު އިންޑިއާ އަށް ވަޑައިގެންނެވީ ހަ ދުވަހުގެ ރަސްމީ ދަތުރުފުޅެއްގައެވެ. ބޮޑުވަޒީރު ނަތަންޔާހޫ އިންޑިއާ އަށް ވަޑައިގެންނެވީ ދެގައުމުގެ އަސްކަރީ، އިގްތިސާދީ އަދި ސަގާފީ ގުޅުން އިތުރަށް ވަރުގަދަކުރެއްވުުމުގެ ބޭނުންފުޅުގައި ކަމަށް ރިޕޯޓުތައް ބުނެއެވެ.

ބޮޑުވަޒީރު ނަތަންޔާހޫ އަށް އިންޑިއާގެ އިންދިރާ ގާންދީ އިންޓަނޭޝަނަަލް އެއާޕޯޓުން މަރުހަބާ ވިދާޅުވީ އިންޑިއާގެ ބޮޑު ވަޒީރު ނަރެންދުރަ މޯދީ އެވެ.

އިޒްރޭލުގެ ބޮޑު ވަޒީރު ނަތަންޔާހޫ ހިމެނިވަޑައިގަންނަވަނީ 2003 ގައި އިޒްރޭލުގެ އޭރުގެ ބޮޑު ވަޒީރު އޭރިއަލް ޝެރޯން އިންޑިއާ އަށް ވަޑައިގެންނެވި ފަހުން އިންޑިއާ އަށް ވަޑައިގަންނަވާ އިޒްރޭލުގެ ދެވަނަ ލީޑަރަށެވެ.

އިންޑިއާގެ ބޮޑު ވަޒީރު މޯދީ މިދިޔަ އަހަރުގެ ޖުލައި މަހު، އިންޑިއާގެ ބޮޑުވަޒީރަކު އިޒްރޭލަށް ކުރެއްވި ފުރަތަމަ ރަސްމީ ދަތުރުފުޅުގައިވަނީ ވަޑައިގެންފައެވެ.