އިންޑިއާ ސަރުކާރުގެ ފަރާތުން އިންޑިއަން ކައުންސިލް ފޯ ކަލްޗަރަލް ރިލޭޝަންސް (އައިސީސީއާރް) މެދުވެރިކޮށް 2024-2023 ގެ ދިރާސީ އަހަރަށް 34 ސްކޮލަރޝިޕް ފުރުސަތު ދިވެހިންނަށް ހުޅުވާލައިފިއެވެ. 

އެގޮތުން މި ފުރުސަތުގެ ދަށުން ދިވެހި ކިޔަވާކުދިންނަށް އިންޑިއާގެ ބޮޑެތި ސިޓީތަކުގެ އެންމެ މަތީފަންތީގެ  ޔުނިވަރސިޓީތަކުން އަންޑަރ ގްރެޖުއޭޓް، ޕޯސްޓް ގްރެޖުއޭޓް އަދި ޕީއެޗްޑީ ފެންވަރަށް އަރޓްސް، ސައިންސް، އިންޖިނިއަރިންގ، ބިޒްނަސް، ޓުއަރިޒަމް އަދި އެހެނިހެން ދާއިރާތަކުން ކިޔެވުމުގެ ފުރުސަތު ވަނީ ހުޅުވާލާފައެވެ.

މީގެ އިތުރުން އިންޑިއާގެ ސަޤާފަތުގެ ދާއިރާއިން ކިޔެވުމުގެ ފުރުސަތަށް ބައިނަލައަޤްވާމީ ގޮތުން 100  ސްކޮލަރޝިޕް ސްލޮޓްވެސް ވަނީ ހުޅުވާލާފައެވެ. މީގެ ތެރޭގައި މިއުޒިކް، ޑާންސް، ތިއޭޓަރ، ޕަރފޯމިންގް އަރޓްސް، ސްކަލްޕްޗަރ، އިންޑިއާގެ ބަސްތަކާއި އިންޑިއާގެ ސުފުރާތަށް ހިމެނިގެންވެއެވެ.

މި ސްކޮލަރޝިޕް ފުރުސަތުތަށް ހުޅުވާލާފައިވަނީ އުމުރުން 18 އަހަރާއި 30 އަހަރުގެ ދަރިވަރުންނަށެވެ. އަދި ޕީއެޗްޑީގެ ފުރުސަތަށް ކުރިމަތިލެވޭނެ އެންމެ ދޮށީ އުމުރަކީ 45 އަހަރެވެ. 

މި ސްކޮލަރޝިޕްތަކަށް އޮންލައިންކޮށް ކުރިމަތިލެވޭނެއެވެ. މިކަމަށް ޚާއްސަކޮށްފައިވާ ޕޯޓަލް މެދުވެރިކޮށް 20 ފެބްރުއަރީ އިން 30 އޭޕްރިލް 2023ގެ ނިޔަލަށް ސްކޮލަރޝިޕަށް ކުރިމަތިލެވޭނެއެވެ.