ލައުރެއުސް އެވޯޑުގެ އެންމެ މޮޅު ޓީމަކަށް އާޖެންޓީނާ އާއި ރެއާލް މެޑްރިޑް ވާދަކުރަނީ
21 ފެބުރުއަރީ 2023 | އަންގާރަ 02:40އާޖެންޓީނާ އިން ވަނީ މިދިޔަ އަހަރުގެ ވޯލްޑް ކަޕް ކާމިޔާބުކޮށްފައި، ރެއާލުން ވަނީ ޔުއެފާ ޗެމްޕިއަންސް ލީގު ކާމިޔާބުކޮށްފައި
އެވޯޑަށް ވާދަކުރާ ޓީމުތައް
ލައުރެއުސް ސްޕޯޓްސް އެވޯޑުން ހޮވާ އަހަރުގެ އެންމެ މޮޅު ޓީމަކަށް ވާދަކުރާ ޓީމުގެ ތެރޭގައި އާޖެންޓީނާ އާއި ރެއާލް މެޑްރިޑް ހިމެނިއްޖެ އެވެ.
މިއީ ދުނިޔޭގެ ކުޅިވަރުގެ މައިދާނުގައި ވާދަކުރަމުން އަންނަ ޓީމުތަކާއި، ވަކި ވަކި ކުޅުންތެެރިންގެ އަގު ވަޒަންކުރުމުގެ ގޮތުން ދެމުން އަންނަ އެވޯޑެކެވެ. އަންހެން އަދި ފިރިހެން އެތުލީޓުންނަށް ދޭ މި އެވޯޑު ދޭން ހަމަޖެއްސީ 1999 ވަނަ އަހަރު އެވެ. މިއީ ލައުރެއުސް ސްޕޯޓްސް ފޯ ގުޑް ފައުންޑޭޝަންގެ ފަރާތުން ދެމުން އަންނަ އެވޯޑެކެވެ. މިއަހަރުގެ އެވޯޑުގެ އެންމެ މޮޅު ޓީމަކަށް ވާދަކުރަނީ މިދިޔަ އަހަރު ފީފާ ވޯލްޑް ކަޕް މުބާރާތް ކާމިޔާބު ކުރި ދެކުނު އެމެރިކާގެ އާޖެންޓީނާ އާއި ޔުއެފާ ޗެމްޕިއަންސް ލީގު ކާމިޔާބު ކުރި ސްޕެއިންގެ ރެއާލް މެޑްރިޑުގެ އިތުރުން، އިންގްލެންޑް އަންހެން ފުޓުބޯޅަ ޓީމާއި، ފްރާންސް ފިރިހެން ރަގްބީ ޓީމާއި، އެމެރިކާގެ ބާސްކެޓު ޓީމު ގޯލްޑަން ސްޓޭޓް ވޭރިއާސް އަދި އޮސްޓްރިއާގެ މޮޓީ ރޭސިން ޓީމު އޮރާކަލް ރެޑް ބުލް ރޭސިން އެވެ.
އެންމެ ފަހުން 2021 ވަނަ އަހަރުގެ އެވޯޑު ހަފްލާ ބާއްވާފައި ވަަނީ ސްޕެއިންގެ ސެވިއްޔާގަ އެވެ. އެންމެ ފަހުން މި އެވޯޑުގެ އެންމެ މޮޅު ޓީމަކަށް ހޮވުނީ އިޓަލީގެ ޤައުމީ ފުޓުބޯޅަ ޓީމެވެ.
