ބްރައިޓްވޭ ކޮޅަށް ރެހެންދިން ދިހަ ލަނޑު ޖަހައިފި

އިންޓަ ސްކޫލް 15 އަހަރުން ދަށުގެ ފުޓުބޯޅަ މުބާރާތުގައި ބްރައިޓްވޭ އިންޓަނޭޝަނަލް ސްކޫލާ ދެކޮޅަށް ކުޅުނު މެޗުން ރެހެންދި ސްކޫލް މޮޅުވެއްޖެ އެވެ.

ގްރޫޕް އީ ގައި ހޯމަ ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު ރެހެންދިން ކާމިޔާބު ކުރީ 10-0 އިންނެވެ. މެޗުގެ ފުރަތަމަ ހާފުގައި ރެހެންދިން ތިން ލަނޑު ޖެހިއިރު، ދެ ވަނަ ހާފުގައި ވަނީ ހަތް ލަނޑު ޖަހައިފަ އެވެ.

މެޗުގައި ރެހެންދިގެ ލަނޑުތައް ޖަހައިދިނީ އާދަމް މައިޝަން މުޙައްމަދާއި، އިބްރާހިމް އަރުޝަން ނަޝާދު އާއި އަޔާން ޙަސަން ޝަރީފު އާއި އަޙުމަދު އަޝާލް އަތީފް އަދި އަލީ މާކިން މަހްމޫދު އެވެ. މީގެ ތެރެއިން މައިޝަން ވަނީ ހަތަރު ލަނޑު ޖަހައިފަ އެވެ. އަރުޝަން އާއި އަޔާން ވަނީ ކޮންމެ ކުޅުންތެރިޔަކު ދެ ލަނޑު ޖަހައިފަ އެވެ. އަޝާލް އަދި މާކިން ވަނީ ކޮންމެ ކުޅުންތެރިޔަކު އެއް ލަނޑު ޖަހައިފަ އެވެ.

މި ގްރޫޕް ގައި އޮތީ ތިން ޓީމެވެ. އެއީ ބްރައިޓްވޭ އާއި ރެހެންދިގެ އިތުރުން މުހްޔިއްދީން ސްކޫލް އެވެ.