ސަރުކާރުގެ ސިޔާސަތުތައް އެމްޑީޕީގެ އަސާސްތަކާއި އެއްގޮތް ކުރުމަށް ގޮވާލާ ގަރާރެއް
20 ފެބުރުއަރީ 2023 | ހޯމަ 13:30ސިޔާސަތުތައް ތަންފީޒު ނުވާކަމަށް ބުނެ އެ ގަރާރުގައި ސަރުކާރަށް ފާޑުކިޔުން އަމާޒުކޮށްފައިވޭ
ރައްޔިތުންގެ މަޖިލީހުގެ ޖަލްސާގެ ތެރެއިން
ސަރުކާރުގެ ސިޔާސަތު، މޯލްޑިވިއަން ޑިމޮކްރެޓިކް ޕާޓީ އެމްޑީޕީގެ ފިކުރާއި އަސާސްތަކާ އެއްގޮތް ކުރުމަށް ގޮވާލައި، ރައްޔިތުންގެ މަޖިލީހަށް ގަރާރެއް ހުށަހަޅައިފިއެވެ.
ހޯމަ ދުވަހު ފުރަތަމަ ކިޔުން އިއްވި އެ ގަރާރު ހުށަހެޅުއްވީ އުނގޫފާރު ދާއިރާގެ އެމްޑީޕީ މެމްބަރު މުޙައްމަދު ވަޙީދެވެ.
އެ ގަރާރުގައި އެމްޑީޕީގެ އަމާޒަށް ސަރުކާރުގެ ސިޔާސަތު ބައްޓަން ކުރުމަށް ވަނީ ގޮވާލާފައެވެ. އަދި ސަރުކާރުގެ ބައެއް އަމަލުތަކަށް އެ ގަރާރުގައި ވަނީ ފާޑުކިޔުން އަމާޒުކޮށްފައެވެ. އެ ގަރާރުގައި ބުނެފައި ވަނީ އެމްޑީޕީގެ އަސާސީ ގަވާއިދުގައި ކަނޑައަޅާފައިވާ އެމްޑީޕީގެ އަމާޒުތަކާ މަގްޞަދުތަކާ އުސޫލުތަކަށް ބަލާއިރު ރައްޔިތުންގެ ކަންކަން ނިންމުގައި އާއި އެފަދަ ކަންކަން ހިންގުމުގައި ރައްޔިތުންނަށް ބާރު އޮންނަން ޖެހޭނެ ކަމަށް ކަނޑައަޅާފައި ވާނެ ކަމަށެވެ. އެހެންކަމުން ރައްޔިތުންގެ ކިބައިގައި އެ ބާރުވެރިކަން ބޭއްވުމަށްޓަކާ ރައްޔިތުންގެ ޚިޔާލާއި، މަޝްވަރާއިން އެކުލަވާލުމަށް ފަހު އެކުލަވާލާފައިވާ ވައުދުތަކާއި ސިޔާސަތުތައް ރައީސުލްޖުމްހޫރިއްޔާގެ އިތުރުން އެހެން އިންތިޚާބީ އަދި ސިޔާސީ އޮފިޝަލުން ހިންގުމަކީ ވަރަށް އަސާސީ ކަމެއް ކަމަށް ވަނީ ބުނެފައެވެ.
އިތުރަށް އެ ގަރާރުގައި ބުނެފައި ވަނީ މި ސަރުކާރުގައި އެންމެ ބޮޑު ހިއްސާއެއް އޮތްބަޔަކީ އެމްޑީޕީ ކަމަށެވެ. އެހެންނަމަވެސް ސަރުކާރުގެ ކަންކަން ބައްޓަން ވެފައިވަނީ އެ ޕާޓީގެ މެނިފެސްޓޯއާއި އެއްގޮތަށް ނޫން ކަމަށް ވަނީ ބުނެފައެވެ. އެކަމާއި މެދު ރައްޔިތުންގެ ކަންބޮޑުވުމާއި ނުރުހުން އޮތް ކަމަށް ވެސް އެ ގަރާރުގައި ވަނީ ބުނެފައެވެ. އެ ގޮތަށް ތަންފީޒު ނުވާ ސިޔާސަތުތަކުގެ ތެރޭގައި ބޯހިޔާވަހިކަމާއި އާމްދަނީ އިތުރުކުރުމަށްޓަކާ މަސްވެރިކަމަށް ގެންނަ ބަދަލުތަކާއި، ފަތުރުވެރިކަމާއި ގެސްޓްހައުސް ވިޔަފާރި ފުޅާ ކުރުން ފަދަ ކަންކަން ހިމެނޭ ކަމަށް އެ ގަރާރުގައިވެއެވެ.
