ވ. ތިނަދޫ އަންހެނުންގެ ކޮމިޓީއަށް ހަތަރު ފަހަރަށް އިއުލާންކޮށްގެން ވެސް ކުރިމަތިލާނެ މީހަކު ނުވި
ވ. ރަކީދޫ ކައުންސިލްގެ އަންހެނުންނަށް ހާއްސަ ގޮނޑިއަށް ވެސް ކުރިމަތިލާނެ މީހަކު ވަނީ ނުވެފައި
ވ، ތިނަދޫ
ވ. ތިނަދޫ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ހުސްވެފައިވާ ހަތަރު ގޮނޑިއަށް ކުރިމަތިލުމަށް ހަތަރު ފަހަރެއްގެ މަތިން ފުރުސަތު ހުޅުވައިލުމުން ވެސް އެއްވެސް މީހަކު ކުރިމަތިލައިފައި ނުވާ ކަމަށް އިލެކްޝަންސް ކޮމިޝަނުން ބުނެފިއެވެ.
ރައްޔިތުންގެ މަޖިލީހުގެ ލާމަރުކަޒީ ކޮމިޓީގައި ވާހަކަ ދައްކަވަމުން އިލެކްޝަންސް ކޮމިޝަނުގެ ނައިބު ރައީސް އިސްމާއިލް ހަބީބު ވިދާޅުވީ ވ. ތިނަދޫގެ އަންހެނުންގެ ކޮމިޓީއަށް ކުރިމަތިލާން ހަތަރު ފަހަރެެއްގެ މަތިން އިއުލާންކޮށްގެން ވެސް އެއްވެސް ބަޔަކު ކުރިމަތިލައިފައި ނުވާ ކަމަށާއި އަންހެނުންގެ ކޮމިޓީތަކުން މެންބަރުން އިސްތިއުފާ ދޭ މައްސަލަ ވެސް ވަރަށް އާންމުވެފައިވާ ކަމަށެވެ.
ވ. އަތޮޅު ރަކީދޫ ކައުންސިލްގެ އަންހެނުންނަށް ހާއްސަ ގޮނޑިއެއް ހުސްވެގެން ވެސް ދެ ފަހަަރަށް އިއުލާންކޮށްގެން ވެސް ކުރިމަތިލައިފައި ނުވާ ކަމަށް އޭނާ ފާހަގަ ކުރެއްވިއެވެ.
ހަބީބު ވިދާޅުވީ މި ގޮތަށް މި ކަންވާ ސަބަބުތައް ދިރާސާކޮށް މި ކަމަށް ހައްލެއް ގެންނަން ޖެހޭ ކަމަށެވެ. އިލެކްޝަންސް ކޮމިޝަނުގެ ދައުރަކީ އިންތިހާބު އިއުލާންކޮށްފައި ކެނޑިޑޭޓުން ކުރިމަތިލައިފި ނަމަ ވޯޓުން ނެގުން ކަމަށާއި އެ ދައުރު އަދާކުރުމަށް ޓަކައި ވެސް އެތައް ފަހަރެއްގެ މަތިން އެ ކަމަށް އިއުލާންކޮށްފައިވާ ކަމަށް ވިދާޅުވިއެވެ. އެހެން ނަމަވެސް އެއްވެސް ފަރާތަކުން ކުރިމަތިނުލައިފިނަމަ ދެން ކަންތައްކުރަންވީ ގޮތެއް ގާނޫނުގައި ނެތްކަމަށް ހަބީބު ވިދާޅުވިއެވެ.
ހަބީބު ވިދާޅުވީ ކައުންސިލް މެންބަރަކަށްވުމަށް ޓަކައި އެ ރަށެއްގެ ރަށްވެއްސަކަަށްވާން ނުޖެހޭ ކަމަށާއި ނަމަވެސް ޑަބްލިޔުޑީސީގެ މެންބަަރަކަށްވުމަށް ޓަކައި އެ ރަށެއްގެ ރަށްވެއްސަކަށް ވާން ޖެހޭ ކަމަށެވެ. އެހެންކަމުން، އެ ގޮތަށް އޮންނަ އޮތުން ބަދަލުކޮށް އެ ރަށެއްގެ ރަށްވެއްސަކަށް ނޫނަސް އެގޮނޑިއަށް ކުރިމަތިލެވޭ ގޮތް ހެދުމަކީ މި ކަމަށް ހައްލެއް ކަމަށް ދެކިވަޑައިގަންނަވާ ކަމަށް އޭނާ ވިދާޅުވިއެވެ.
ވ. ތިނަދޫ އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބު 10 އޭޕްރީލް 2021ގައި ބޭއްވިއިރު އެ ކޮމިޓީއަށް އޭރު ކުރިމަތިލި ފަސް މެންބަރުން ވެސް އިންތިހާބުވިއެވެ. ނަމަވެސް ކޮމިޓީއަށް އިންތިހާބުވި ހަތަރު މެންބަރުންގެ ހާލަތު ހުރި ގޮތުން އިގުރާރުގައި ސޮއިކުރަން އިންކާރުކުރެއްވުމުން އެ ގޮނޑިތައް ހުސްވީއެވެ. އެ ގޮނޑިތައް ހުސްވުމުން އިންތިހާބަށް ކުރިމަތިލުމަށް ހަތަރު ފަހަރަށް ހުޅުވައިލައިގެން ވެސް އެއްވެސް ފަރާތަކުން އެއިން ގޮނޑިއަކަށް ކުރިމަތިލައިފައެއް ނުވެއެވެ.
ވ. ތިނަދޫގައި ދިރިއުޅެނީ އެ ރަށު 60 މީހުންނެވެ. ކައިރި ރަށްރަށާއި ވަޒީފާ އަދާކުރާ ބިދޭސީންނާ އެކު ތިނަދޫގައި ދިރިއުޅޭ މީހުންގެ އާބާދީ 200އާ ގާތް ކުރެއެވެ.
