މުއިއްޒުއަށް ކުރާ ދައުވާގެ ޝަރީއަތް ފަށައި، ހެކިބަސް ނަގަން ފަށައިފި
މުއިއްޒުގެ ފަރާތުން ބުނެފައިވަނީ، އޭނާ ދައުވާއަށް ކަނޑައެޅިގެން އިންކާރުކުރައްވާ ކަމަށް
ކުރީގެ ހައުސިން މިނިސްޓަރު އަދި މިހާރުގެ މާލެ ސިޓީގެ މޭޔަރު ޑރ މުޙައްމަދު މުއިއްޒު
ނޫމަޑި މައްސަލާގައި ދޮގު ބަޔާނެއް ދެއްވާފައިވާތީ, ކުރީގެ ހައުސިންގ މިނިސްޓަރ އަދި މިހާރުގެ މާލެ ސިޓީގެ މޭޔަރ ޑރ. މުހައްމަދު މުއިއްޒުގެ މައްޗަށް އުފުލާފައިވާ ދައުވާގެ ޝަރީއަތުގެ އަޑުއެހުމެއް ހޯމަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
ހޯމަ ދުވަހު އޮތީ މި މައްސަލައިގެ ޝަރީއަތް ފެށުމެވެ. އެގޮތުން އެންމެ ފުރަތަމަ ދައުލަތުން ވަނީ އިފްތިތާހީ ބަޔާން އިއްވާފައެވެ.
ނޫމަޑި ރިސޯޓްސް އެންޑް ރެސިޑެންސް އޭޖީ (ނޫމަޑި)ން ދިވެހި ސަރުކާރުގެ މައްޗަށް ހުށަހެޅި އާރބިޓްރޭޝަން މައްސަލާގައި އޭރުގެ ހައުސިންގ މިނިސްޓަރ ޑރ. މުހައްމަދު މުއިއްޒު ދޮގު ބަޔާން ދެއްވުމާ ގުޅިގެން ދައުލަތަށް ވަނީ ބޮޑެތި ގެއްލުންތަކެއް ކުރިމަތިވެފައެވެ. އެގޮތުން ހައުސިންގ ޔުނިޓް މަޝްރޫއާ ގުޅިގެން، ނޫމަޑިއާއެކު ދިވެހި ސަރުކާރުން 2011ގައި ވެފައިވާ ފޭސް 1ގެ އެއްބަސްވުމާއި، 2013ގައި ވެފައިވާ ފޭސް 2ގެ އެއްބަސްވުމުގެ މަސައްކަތް އެ ކުންފުނިން ޝެޑިއުލާ އެއްގޮތަށް ލަސްތަކެއްނުވެ ކުރަމުން ގެންދިޔަކަމަށް ވިދާޅުވިކަމަށް ޕީޖީ އޮފީހުން ބުނެއެވެ.
އަދި ނޫމަޑިއަށް ލަގްޒަރީ ވިލާ އެޅުމަށް ދިވެހި ސަރުކާރުން ދޫކޮށްފައިވާ ޅ. ދިއްފުށިމާދޫ، ސަރުކާރުގެ ބޭނުމަށް ނެގުމުގެ މަޝްވަރާގައި ބައިވެރިވެވަޑައިގެންފައި ނުވާކަމަށް ވިދާޅުވެ، އެކަމުގައި ދޮގު ބާޔަނެއް ދެއްވާފައިވާކަންވެސް ޕީޖީ އޮފީހުން ފާހަގަކޮށްފައިވެއެވެ.
އިފްތިތާހީ ބަޔާން އިއްވަމުން މުއިއްޒުގެ ފަރާތުން ބުނެފައިވަނީ، އޭނާ ދައުވާއަށް ކަނޑައެޅިގެން އިންކާރުކުރާ ކަމަށާއި، އެފަދަ ކަމެއް އޭނާ ކޮށްފައި ނުވާނެ ކަމަށެވެ.
ދެން ކުރިއަށްދިޔައީ ދައުލަތުގެ ހެކިންގެ ހެކިބަސް ނެގުމެވެ.
ފުރަތަމަ ހާޒިރުކުރީ ރައީސް އޮފީހުގެ މިހާރުގެ އަންޑަރ ސެކްރެޓަރީ މޫސާ ފަތުހީއެވެ. އޭނާ ވަނީ މީގެ ކުރިން އިކޮނޮމިކް އެންޑް ޔޫތު ކައުންސިލުގެ ސެކްރެޓޭރިއެޓް ބަލަހައްޓަވާފައެވެ. އޭނާ ވަނީ އިކޮނޮމިކް ކައުންސިލުގެ ބައްދަލުވުންތައް ކުރިއަށްދާ ގޮތާއި ގުޅޭގޮތުން މައުލޫމާތު ދެއްވާފައެވެ.
ހެކިވެރިޔާ ވަނީ މިހާރު ބައެއް ކަންކަން އެންމެ ރަނގަަޅަށް ހަނދުމަފުޅު ނެތްކަން ފާހަގަކުރައްވާފައެވެ.
ދައުލަތުން ހެކީގެ ގޮތުގައި ހުށައަޅާފައިވާ އީވައިސީ ޔައުމިއްޔާއާ ގުޅޭގޮތުން ހެކިވެރިޔާ ވިދާޅުވީ، އެއީ ސައްހަ ޔައުމިއްޔާއެއް ކަމަށެވެ. އެ ޔައުމިއްޔާއަކީ މުއިއްޒުވެސް ބައިވެރިވެވަޑައިގެންނެވި އީވައިސީ ބައްދަލުވުމަކާއި ގުޅޭ ޔައުމިއްޔާއެކެވެ.
އެއީ ނޫމަޑިއަށް ލަގްޜަރީ ވިލާ އެޅުމަށް ދިވެހި ސަރުކާރުން ދޫކޮށްފައިވާ ޅ. ދިއްފުށިމާދޫ، ސަރުކާރުގެ ބޭނުމަށް ނެގުމަށް ނިންމަންޖެހޭ ނިންމުންތައް ވީ އެންމެ އަވަހަށް ނިންމުމަށް ކަނޑައަޅާފައިވާ ޔައުމިއްޔާއެކެވެ.
އެހެންނަމަވެސް މުއިއްޒު ވަނީ ނޫމަޑިއަށް ލަގްޜަރީ ވިލާ އެޅުމަށް ދިވެހި ސަރުކާރުން ދޫކޮށްފައިވާ ޅ. ދިއްފުށިމާދޫ، ސަރުކާރުގެ ބޭނުމަށް ނެގުމުގެ މަޝްވަރާގައި ބައިވެރިވެވަޑައިގެންފައި ނުވާނެކަމަށް ވިދާޅުވެފައެވެ.
ހެކިވެރިޔާ ވިދާޅުވީ، އީވައިސީގެ ނިންމުންތައް ނިންމާނީ ކައުންސިލުގެ މެމްބަރުން ކަމަށާއި، ކައުންސިލަށް މައުލޫމާތު ދޭން އަންނަ ފަރާތްތަކުގެ ދައުރެއް ކައުންސިލުގެ ނިންމުންތަކުގައި ނޯންނާނެ ކަމަށެވެ. މުއިއްޒުއަކީ ކައުންސިލުގެ މެމްބަރެއް ނޫންކަމަށް ހެކިވެރިޔާ ވިދާޅުވިއެވެ.
އެ ޔައުމިއްޔާގައި ސޮއިކޮށްފައި ނުވާތީ ދިފާއުން ވަނީ އެކަން ފާހަގަކޮށްފައެވެ. ހެކިވެރިޔާ ވިދާޅުވިގޮތުގައި ބައެއް ޔައުމިއްޔާތަކުގައި ސޮއިނުކޮށްވެސް ހުރެއެވެ.
ދެން ހާޒިރުކުރީ ހައުސިންގ މިނިސްޓްރީގައި ވަޒީފާ އަދާކުރައްވާ، އަދި އޭރު ހައުސިންގ މިނިސްޓްރީގެ ހައުސިންގ ޑިޕާޓްމަންޓުގެ ޑިރެކްޓަރ ޖެނެރަލް މުހައްމަދުއެވެ.
އޭނާ ވިދާޅުވީ، ނޫމަޑި މަޝްރޫއު ޝެޑިއުލާ އެއްގޮތަށް ނުދާކަމަށާއި، އެކަން މުއިއްޒުއަށްވެސް އަންގަވަމުން ގޮސްފައިވާނެކަމަށެވެ.
އާބިޓްރޭޝަނަށް މުއިއްޒު ބަޔާން ދެއްވިކަން އެނގިވަޑައިގަންނަވާ ކަމަށްވެސް ހެކިވެރިޔާ ވިދާޅުވިއެވެ.
ތިންވަނައަށް ހާޒިރުކުރީ ރައީސުލްޖުމްހޫރިއްޔާގެ އޮފީހުގެ އެސިސްޓެންޓް ޑިރެކްޓަރެކެވެ. އިކޮނޮމިކް ކައުންސިލުގެ ސެކްރެޓޭރިއެޓްވެސް އޭނާ ވަނީ ބަލަހައްޓާފައެވެ.
އޭނާވެސް ހެކިބަސް ދެއްވާފައިވަނީ އީވައިސީ ޔައުމިއްޔާއާ ގުޅިގެންނެވެ. އެއީ ސައްހަ ޔައުމިއްޔާއެއްކަމަށް އޭނާ ވިދާޅުވިއެވެ.
ހަތަރުވަނައަށް ހާޒިރުކޮށްފައިވަނީ ރައީސުލްޖުމްހޫރިއްޔާގެ އޮފީހުގައި މިހާރު އެސިސްޓެންޓް ޑިރެކްޓަރ ކަމުގެ މަގާމު ފުރުއްވަމުން ގެންދަވާ ފަރާތެކެވެ. އޭނާ ވިދާޅުވީ، އީވައިސީގެ ބައްދަލުވުންތަކުގައި އޭނާއާ މުއިއްޒުއާ ދިމާވެފައިވާ ކަމަށެވެ. އީވައިސީ ބައްދަލުވުންތަކުގައި ހައުސިންގ މަޝްރޫއުތަކާ ގުޅޭ މަޝްވަރާތައް ކުރިއަށްދާއިރު، މުއިއްޒުވެސް ބައިވެރިވެވަޑައިގަންނަވާކަމަށް އޭނާ ވިދާޅުވިއެވެ.
ފަސްވަނައަށް ހާޒިރުކުރީ ހައުސިންގ މިނިސްޓްރީގައި މިހާރު ޑިރެކްޓަރ ކަން ކުރައްވަމުން ގެންދަވާ ފަރާތެކެވެ. އޭނާ ވަނީ ނޫމަޑި ޕްރޮޖެކްޓު ލަސްވެގެން ދިޔަކަމަށް ވިދާޅުވެފައެވެ. އެ ކުންފުނީގެ ސަބަބުންވެސް ޕްރޮޖެކްޓު ލަސްވެގެން ދިޔަކަމަށް ހެކިވެރިޔާ ވިދާޅުވިއެވެ.
ހެކިވެރިޔާ ވިދާޅުވީ، އޭރު ފުލުުހުންގެ ތަހުގީގަށް ދިން ބަޔާނުގައި ސޮއިކުރެއްވީ އެންމެ ރަނގަޅަށް ބައްލަވާފައި ނޫންކަމަށާއި، ވުމާއެކު، އޭނާ ބުނި ގޮތާ ޚިލާފަށް ބައެއް ވާހަކަ ހުރުންވެސް އެކަށީގެންވާ ކަމަށެވެ.
