ބްރެޒިލް މީހުން މިރޭ ރެއާލް މެޑްރިޑް ބަލިވާން އެދެނީ ކީއްވެ؟

ޗެމްޕިއަންސް ލީގު ފުޓްބޯޅަ މުބާރާތުގައި އަންގާރަ ދުވަހުގެ ރޭ އެންމެ ފަހުގެ ޗެމްޕިއަން ރެއާލް މެޑްރިޑާއި ފައިނަލުގައި ބަލިވި ލިވަޕޫލް ވާދަކުރާ މެޗަކީ ވަރަށް ފޯރިގަދަވާނެ މެޗެކެވެ. މުބާރާތުގެ ގަދަ އަށަކަށް ދިއުމަށް މިއިން އެއްވެސް ޓީމަކަށް މަގު އަމާންކުރެވޭނީ މި މެޗުގެ ނަތީޖާ އިންނެވެ.

ދެ ޓީމަށް ބަލާއިރު މެޑްރިޑްގެ ކޯޗަކީ އިޓަލީގެ ތަޖުރިބާކާރު ކާލޯ އެންޗެލޯޓީ އެވެ. ޗެމްޕިއަންސް ލީގު ހަތަރު ފަހަރު ހޯދި ކޯޗެއް އޭނާ ނޫނީ ނެތެވެ. އިޓަލީގެ އޭސީ މިލާނާއި ޖަރުމަނުގެ ބަޔާން މިއުނިކާއި ފްރާންސްގެ ޕީއެސްޖީ އާއި އިނގިރޭސިވިލާތުގެ ޗެލްސީގައި އެތަކެއް ކާމިޔާބީތަކެއް ހޯދި އެވެ. އަދި ރެއާލް މެޑްރިޑަށް ދެ ވަނަ ފަހަރަށް އައީ ކުރިން ވެސް މި ކުލަބުގައި ކާމިޔާބު ދުވަސްތަކެއް ހޭދަކުރުމަށްފަހު އެވެ. އެންޗެލޯޓީގެ ތަށި ހަރުގަނޑުގައި ކޯޗެއްގެ ގޮތުން ހޯދި 25 ވަރަކަށް ތަށި އެބަވެ އެވެ. މިހެންވެ ދުނިޔޭގެ ކޮންމެ ކުލަބަކުން ވެސް އެންމެ ބޭނުންވާ އެއްކޯޗަކީ އޭނާ އެވެ.

ނަމަވެސް އުމުރު މަތިވެ، ކުލަބު ފުޓްބޯޅައިން ރިޓަޔަރވާނެ ކަމުގެ އިޝާރާތެއް އޭނާ ދިނީ މިދިޔަ އަހަރު އެވެ. ރެއާލް މެޑްރިޑަކީ އޭނާ ކޯޗުކޮށްދޭނެ އެންމެ ފަހު ކުލަބެވެ. 2024 ވަނަ އަހަރާ ހަމައަށް އެކުލަބާއެކު ހަދާފައިވާ ކޮންޓްރެކްޓް ހަމަވާއިރު އެންޗެލޯޓީގެ އުމުރުން 65 އަހަރުވާނެ އެވެ. މިހެންވެ، މިއީ ކޮންމެ ދުވަހަކު ފަރިތަކުރުންތަކެއް ނުކުމެ ކޯޗުކޮށްދޭވަރަށްވުރެ ދޮށީ އުމުރެއް ކަމަށް އޭނާ ވެސް ގަބޫލުކުރެ އެވެ. ދުނިޔޭގެ މިހާރުގެ ކޯޗުންގެ ޓްރެންޑް ބަދަލުވަމުންދާ ސްޕީޑަށް ބަލާއިރު ޒުވާން ކޯޗުންނަށް ކުލަބުތަކުން ދަނީ އިސްކަންދެމުންނެވެ. މެޑްރިޑުގެ ކޯޗުގެ ވަޒީފާގެ އުއްމީދުގައި އެންޗެލޯޓީގެ ތިން ދަރިވަރަކު މިހާރު ވެސް އެބަތިއްބެވެ. ކުރީގެ ކޯޗު ޒައިނުއްދީން ޒިދާނާއި ޔޫތު ޓީމުގެ ކޯޗު ރައުލް ގޮންޒަލޭޒް އާއި ބަޔާން ލެވަކޫސަންގެ ކޯޗު ޒަބީ އަލޮންސޯ އެވެ. މިއިން ކޮންމެ މީހަކީ ކުޅުންތެރިއެއްގެ ގޮތުގައި މެޑްރިޑުގެ ސަޕޯޓަރުންގެ ލޯބި ހޯދި ބައެކެވެ.

މިހެންވެ ކެރިއަރުގެ ފަހު ދުވަސްތައް ގައުމީ ޓީމެއްގައި ހޭދަކޮށްލައި އެތަޖުރިބާކޮށްލަން އެންޗެލޯޓީ ވެސް ހުރީ ބޭނުންވެފަ އެވެ. އޭނާގެ އެހީތެރިކަމަށް އެދިގެން އުޅެނީ ދުނިޔޭގެ ފުޓްބޯޅައި އެންމެ ބޮޑު ސުޕަސްޓާރު ކަމަށްވާ ބްރެޒިލުންނެވެ. މިދިޔަ ޑިސެމްބަރު މަހު ނިމުނު ވޯލްޑްކަޕަށް ފަހު ކޯޗަކު ހަމަނުޖައްސައި ބްރެޒިލުން އެތިބީ އެންޗެލޯޓީގެ ފަހަތުން މުގޯލި އެޅުމުގަ އެވެ.

ގައުމުން ބޭރުގެ ކޯޗަކު ގެނައުމަކީ ބްރެޒިލްގެ ގިނަ ކޯޗުން ގަބޫލުވާ ކަމެއްނޫނެވެ. އަދި ސަޕޯޓަރުންގެ ތެރެއިން ވެސް ގިނަ ބަޔަކު މިކަމާ ނުރުހެއެވެ. އެމީހުން ގަބޫލުކުރާ ގޮތުގައި ޒަމާނީ އުސޫލުތައް ދޫކޮށްނުލައި ބިދޭސީއަކަށް ލަގަން ދޫނުކޮށްލުމަށްވުރެ މިއީ ބްރެޒިލްގެ ޒުވާން ކޯޗަކަށް ފުރުސަތުދޭންވީ ވަގުތެވެ. ބައެއް މީހުންގެ ނަޒަރުގައި ވަގުތީ ގޮތުން ޓީމާ ހަވާލުވެހުރި 20 އަހަރުން ދަށުގެ ގައުމީ ޓީމުގެ ކޯޗު ރޯމަން މެނެސެސް އަކީ ގައުމީ ޓީމަށް ބަރާބަރުވާނެ ކޯޗެކެވެ.

މި ގޮތަށް ބުނާ މީހުން މިސާލެއްގެ ގޮތުން ދައްކަނީ އާޖެންޓީނާގެ ކޯޗު ލަޔޮނަލް ސްކަލޯނީ އެވެ. މާބޮޑު ތަޖުރިބާއެއްގެ ނެތި އޭނާ އެންމެ ފަހުގެ ވޯލްޑްކަޕް ކާމިޔާބުކުރި ވާހަކަ އެވެ. އެކަމަކު އާޖެންޓީނާއިން ސްކަލޯނީ އަށް ފުރުސަތުދިނީ މަޖުބޫރުވެގެންނެވެ. 2018 ވަނަ އަހަރުގެ ވޯލްޑްކަޕުން ކެޓުމުން ޖޯޖް ސަމްޕޯލީގެ އަގުބޮޑު ކޮންޓްރެކްޓް ބާތިލްކޮށް، އާޖެންޓީނާއިން ސްކަލޯނީ އަށް ފުރުސަތުދިނީ އެވަގުތު ޓީމާ ހަވާލުވާނެ މީހަކު ނެތުމާއި އަގުހެޔޮކޮށް ކޯޗުކޮށްދޭނެ މީހަކީ އޭނާ ކަމަށްވުމުންނެވެ. އާޖެންޓީނާގެ މިހާލަތާއި ބްރެޒިލްގެ ހާލަތު ވަރަށް ތަފާތެވެ.

ފާއިތުވެދިޔަ 20 އަހަރު ބްރެޒިލަށް ވޯލްޑްކަޕް ނުލިބި ދިޔައީ މުޅިން ވެސް އަމިއްލަ ގައުމުގެ ކޯޗުންނާއެކުގަ އެވެ. ކުރީގެ ކެޕްޓަން ކާލޮސް ޑުންގާ އާއި މާރިއޯ ޒަގަލޯ އާއި ލުއިސް ފިލިޕޭ ސްކޮލާރީ އާއި ޓިޓޭ ފަދަ އެތައް ކޯޗުންނެއް ފެއިލްވީ އެވެ. ބްރެޒިލްގެ ފުޓްބޯޅަ ފެޑަރޭޝަނުގެ ރައީސް އެޑްނާލްޑޯ ރޮޑްރިގޭޒް ބިދޭސީ ކޯޗަކަށް ފުރުސަތުދޭން ބޭނުންނުވަނީ ޓެސްޓް ނުކުރެވި ހުރި ތަޖުރިބާކާރު ބްރެޒިލް ކޯޗަކު މިވަގުތު ނެތުމުންނެވެ.

ބްރެޒިލަށް ވޯލްޑްކަޕް ނުލިބި އެންމެ ދިގު މުއްދަތަކަށް ހޭދަވީ 24 އަހަރެވެ. ދެން އަންނަ ވޯލްޑްކަޕެއް އަންނައިރު މިމުއްދަތު އަނެއްކާ ވެސް ތަކުރާރުވާނެ އެވެ. މިހެންވެ ރައީސް އެޑްނާލްޑޯ ގަބޫލުކުރާ ގޮތުގައި ދުނިޔޭގެ ފަންތީގައި ބްރެޒިލް އޮތުމަށް މިއީ އެގައުމުގެ ފުޓްބޯޅަ ޒަމާނީކޮށް، ނިއުޅާލަންވީ ވަގުތެވެ. އައު ޚިޔާލަށް މަރުޙަބާ ކިޔަންވީ ވަގުތެވެ. ޔޫރަޕުގެ ފުޓްބޯޅައިގެ ކުރިއެރުމާއި ވިސްނުން ދަސްކޮށް، އެތަޖުރިބާ އުނގެނިގަންނަވީ ވަގުތެވެ. މިކަމަށްޓަކައި އޭނާ ބޭނުންވާ އެދުރެއްގެ ހުރިހާ ކޮލިޓީއެއް އެންޗެލޯޓީގެ ކިބާގައި އެބަހުއްޓެވެ. އޭނާގެ ކާމިޔާބީތަކާމެދު ސުވާލު އުފައްދަން ޖާގައެއްނެތެވެ. ފުރަތަމަ ފަހަރަށް ބްރެޒިލްގެ ބިދޭސީ ކޯޗަކަށްވެ ޓީމު ގެންގުޅެވޭނެ ގާބިލްކަމާއި އެ ޑިޕްލޮމްސީ އާއި ލީޑަރޝިޕް އެންޗެލޯޓީގެ ކިބައިގައި ހުންނާނެކަން ވެސް ދުނިޔެވަނީ ކަށަވަރުކޮށްފައެވެ. އަދި ބްރެޒިލްގެ އެތައް ކުޅުންތެރިންނަކަށް ކޯޗުކޮށްދީ އެމީހުން މޮޅު ބަޔަކަށް ހެދުމުގައި ފާއިތުވެދިޔަ 22 އަހަރު އެންޗެލޯޓީގެ ދައުރު ވެސް ބޮޑެވެ. މިހެންވެ މިއީ ބްރެޒިލްގެ ރޮނާލްޑޯ އާއި ކަކާ އަދި ކުރި އާއި މިހާރުގެ ކުޅުންތެރިން ގަބޫލު މީހެކެވެ.

އެކަމަކު އެންޗެލޯޓީގެ ފައިތިލަ ބްރެޒިލް ބޭނުންވާހާ އަވަހަށް މެޑްރިޑުން ލުއްސާލެވެން އޮތީ މެޑްރިޑްގެ ނަތީޖާތައް ގޯސްވެގެންނެވެ. ސްޕެނިޝް ލީގު މި ސީޒަނުގައި ލިބުން ދުރެވެ. މިއާއެކު ޗެމްޕިއަންސް ލީގު ނުލިބިއްޖެނަމަ އައު ކޯޗަކަށް ވިސްނައި ޓީމު އެފުށްމިފުށަށް ޖަހާލުމަށް ރައީސް ޕްރޮލެންޓީނޯ ޕްރޭޒް އަވަސްވުން ގާތެވެ. ބްރެޒިލް މީހުން މިރޭ ލިވަޕޫލަށް ސަޕޯޓްކުރަނީ މިހެންވެ އެވެ.