ރައީސް ނަޝީދުގެ މަންދޫބުން ވެސް ގާސިމާ ބައްދަލުކުރައްވައިފި
ފިކުރެއްގެ ދިރުން ޓީމުގެ ފަރާތުން ރައީސް ނަޝީދުގެ މަންދޫބުންގެ ގޮތުގައި ގާސިމާ ބައްދަލު ކުރެއްވީ ގދ. ގެ ކުރީގެ މެންބަރު މުޙައްމަދު ރަޝާދު ހުސައިން އާއި މަޑަވެލި ދާއިރާގެ ކުރީގެ މެންބަރު ނާޒިމް
ރައީސް ނަޝީދުގެ މަންދޫބުން ގާސިމާ ބައްދަލުކުރައްވަނީ
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ރައީސް، މުޙައްމަދު ނަޝީދުގެ މަންދޫބުން ޖުމްހޫރީ ޕާޓީގެ ލީޑަރު ގާސިމް އިބްރާހިމްއާ ބައްދަލު ކުރައްވައިފިއެވެ.
މިކަން ހާމަކޮށްފައިވަނީ ރައްޔިތުންގެ މަޖިލީހުގެ މަޑަވެލި ދާއިރާގެ މެންބަރު ހުސައިން ފިރުޝާން އާދީއްތަ ދުވަހުގެ ރޭ ކުރެއްވި ޓްވީޓެއްގައެވެ. އެ ޓްވީޓާއެކު އޭނާ ވަނީ ރައީސް ނަޝީދުގެ މަންދޫބުން ގާސިމާ ބައްދަލު ކުރައްވާ ފޮޓޯއެއް ވެސް ހިއްސާ ކުރައްވައިފައެވެ.
ފިރުޝާން ވިދާޅުވީ ފިކުރެއްގެ ދިރުން ޓީމުގެ ފަރާތުން ރައީސް ނަޝީދުގެ މަންދޫބުންގެ ގޮތުގައި ގާސިމާ ބައްދަލު ކުރެއްވީ ގދ. ގެ ކުރީގެ މެންބަރު މުޙައްމަދު ރަޝާދު ހުސައިން އާއި މަޑަވެލި ދާއިރާގެ ކުރީގެ މެންބަރު މުޙައްމަދު ނާޒިމް ކަމަށެވެ. ނަމަވެސް އެ ބައްދަލުވުމާ ގުޅޭ އިތުރު ތަފްސީލެއް ނުދެއްވައެވެ.
ރައީސް ނަޝީދުގެ މަންދޫބުން ގާސިމާ ބައްދަލު ކުރައްވާފައިވާއިރު އެމްޑީޕީގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހުގެ ފަރާތުން ވެސް ދެ މަންދޫބަކު ވަނީ ގާސިމާ ބައްދަލު ކުރައްވައިފައެވެ. އެގޮތުން، ރައީސްގެ ފަރާތްޕުޅުން ޤާސިމް އާއި މަޝްވަރާކުރެއްވުމަށް ވަޑައިގަތީ އެމްޑީޕީގެ ޕާލަމެންޓްރީ ގުރޫޕްގެ ލީޑަރު އަދި ހިތަދޫ އުތުރު ދާއިރާގެ މެންބަރު މުހައްމަދު އަސްލަމާއި ހުޅުމާލެ ދާއިރާގެ މެންބަރު އަލީ ނިޔާޒްއެވެ.
"ރާއްޖެ އެމްވީ" އަށް މައުލޫމާތު ދެއްވަމުން ނިޔާޒް ވިދާޅުވީ އެ ބައްދަލުވުމަކީ ރަސްމީ ބައްދަލުވުމެއް ކަމަށާއި ކުރިއަށް އޮތްތަނުގައި ވެސް މި ފަދަ ސިލްސިލާ ބައްދަލުވުންތަކެއް ކުރިއަށް ދާނެ ކަމަށެވެ. އަދި ގާސިމްއާއެކު ރިޔާސީ އިންތިޚާބުގެ ފުރަތަމަ ބުރުގައި ވެސް ކޯލިޝަން ހެދުމުގެ އުންމީދު ބޮޑު ކަމަށް ވެސް އޭނާ ވިދާޅުވިއެވެ.
