ޒާތީ މައުލޫމާތު ރައްކާތެރިކުރަން ގިނަ ފިޔަވަޅުތަކެއް ވަނީ އަޅާފައި: މިނިސްޓްރީ
އަންނަ މާޗް މަހު ޑިޖިޓަލް އައިޑީ ލޯންޗު ކުރަނީ އެފަދަ ކަންކަމަށް ލުޔެއް ހޯދައިދިނުމަށް ކަމަށް ސަރުކާރުން ބުނޭ
ޑިޖިޓަލް އައިޑީ
ޑިޖިޓަލް އައިޑީއާއެކު, ޒާތީ މައުލޫމާތު ރައްކާތެރިކުރަން ގިނަ ފިޔަވަޅުތަކެއް ވަނީ އަޅާފައިކަމަށް މިނިސްޓްރީ އޮފް އެންވަޔަރަންމެންޓް ކްލައިމެޓް ޗޭންޖް އެންޑް ޓެކްނޮލޮޖީގެ ސްޓޭޓް މިނިސްޓަރު މުހައްމަދު ޝަރީފް ވިދާޅުވެއްޖެއެވެ.
ރާއްޖެ ޓީވީގެ "ފަލަސުރުޚީ" ޕްރޮގްރާމްގައި ވާހަކަފުޅުދައްކަވަމުން އޭނާ ވިދާޅުވީ، ވަރަށް ގިނަ މީހުން، ޑިޖިޓަލް އައިޑީއާއެކު ޒާތީ މައުލޫމާތު ރައްކާތެރިކުރެވިދާނެތޯ ސުވާލު އުފައްދާ ކަމަށެވެ. ނަމަވެސް ކުރިން ފޯމުގައި ލިޔެގެން ނުވަތަ ސްކޭންކޮށްފައި ފޮނުވައިގެން މައުލޫމާތު ހިއްސާކުރިއިރަށްވުރެ މިހާރު މައުލޫމާތުގެ ރައްކާތެރިކަން ބޮޑުވާނެކަމަށް އޭނާ ވިދާޅުވިއެވެ. ޑިޖިޓަލް އައިޑީގައި ރައްކާކުރާ މައުލޫމާތު ފެންނަން ހުންނާނެ ކަމަށްވެސް އޭނާ ވިދާޅުވިއެވެ. ޑިޖިޓަލް އައިޑީގެ ތެރެއަށް ދެތިން މައުލޫމާތު ފިޔަވައި އިތުރު އެހެން މައުލޫމާތު އެއްނުކުރާނެ ކަމަށާއި، އެހެން މައުލޫމާތު ހުންނާނީ އެ މައުލޫމާތަކާ ގުޅުންހުރި ރަސްމީ މަސައްކަތެއް ކުރާ އިދާރާއެއްގައި ކަމަށް އޭނާ ވިދާޅުވިއެވެ. ނަމާއި އެޑްރެހާއި އައިޑެންޓިފަޔަރ ނޫން އެހެން މައުލޫމާތެއް ޑިޖިޓަލް އައިޑީގައި ރައްކާ ނުކުރާނެކަން އޭނާ ވަނީ ފާހަގަކުރައްވާފައެވެ.
ޚިދުމަތްތައް އޮންލައިންކޮށް ލިބޭނެ އިންތިޒާމް ހަމަޖައްސައި އަންނަ މަހު ޑިޖިޓަލް އައިޑީ ތައާރަފްކުރައްވާނެ ކަމަށް ރައީސް އިބްރާހީމް މުހައްމަދު ސާލިހު ވިދާޅުވެފައި ވަނީ، ރައީސްގެ މި އަހަރުގެ ރިޔާސީ ބަޔާނުގައެވެ. މި ބަދަލާއެކު، ތަކުރާރުކޮށް އައިޑީކާޑަށް ހުށަހަޅަން ޖެހުމަށް ބަދަލު އަންނާނެއެވެ. އަދި ޚިދުމަތްތައް ބޭނުންވެގެން ތަކުރާރުކޮށް އައިޑީކާޑާއި، އެކި ލިޔުންތަކުގެ ކޮޕީ ސަރުކާރަށް ހުށަހަޅަން ޖެހުމަކީ ރައްޔިތުންނަށް ދިމާވާ އުނދަނގުލެއް ކަމަށް ވާއިރު، ޚިދުމަތް ލަސްވެ، އޮޅުންބޮޅުންވުމަށް އޮންނަ ފުރުސަތުވެސް ޑިޖިޓަލް އައިޑީއާއެކު ކުޑަވެގެންދާނެއެވެ. އަންނަ މާޗް މަހު ޑިޖިޓަލް އައިޑީ ލޯންޗުކުރަނީ އެފަދަ ކަންކަމަށް ލުޔެއް ހޯދައިދިނުމަށް ކަމަށްވެސް ސަރުކާރުން ބުނެއެވެ.
