ރަނގަޅަށް މީހަކު މަސައްކަތެއް ކޮށްފިނަމަ އެކަން ބަލައިގަންނަން ވާނެ، އަގު ވަޒަން ވެސް ކުރަން ޖެހޭނެ: ނައިބުރައީސް
18 ފެބުރުއަރީ 2023 | ހޮނިހިރު 18:26މެނޭޖިންގ ޑައިރެކްޓަރަކަށް ހުންނަވާ ބޭފުޅަކާއި ޑިޕާޓްމަންޓްތަކުގެ ވެރިންނަށް ތަނުގެ މުވައްޒަފުންގެ ކަންތައްތައް ގާތުން ބެލެންވާނެ
ނައިބުރައީސް ސްޓާފް ނައިޓްގައި ވާހަކަފުޅު ދައްކަވަނީ
ރަނގަޅަށް މީހަކު މަސައްކަތެއް ކޮށްފިނަމަ އެކަން ބަލައިގަންނަވާނެ ކަމަށާ އަދި އެފަދަ މީހުންގެ އަގު ވަޒަންކޮށް ބަލައިގަންނަން ޖެހޭނެ ކަމަށް ނައިބުރައީސް ފައިސަލް ނަސީމް ވިދާޅުވެއްޖެއެވެ.
އައިލެންޑް އޭވިއޭޝަން ސަރވިސަސް ލިމިޓެޑްގެ ސްޓާފް ނައިޓްގައި ހޮނިހިރުދުވަހުގެރޭ ވާހަކަފުޅު ދައްކަވަމުން ނައިބުރައީސް ވިދާޅުވީ މަސައްކަތުގެ މާހައުލުގައި އުޅޭއިރު ކޮންމެ ކަހަލަ މަޤާމެއްގައި އުޅުނަސް ތިމާ ހިތްހަމަ ނުޖެހޭ ދެރަވާ ކަންތައްތައް ދިމާވާނެ ކަމަށެވެ. އެހެންނަމަވެސް ވަޒީފާގައި ގިނަ ދުވަހު ދެމި ތިބެވޭނީ ކެތްތެރިވާން ދަސްކޮށްގެން ކަމަށެވެ.
އެއްވެސް މުވައްޒަފަކާމެދު އިހާނެތިކޮށް ކަންތައްތައް ކުރެވިގެން ނުވާނެ ކަމަށާއި މި ސަރުކާރުން އެއްވެސް ފަރާތެއް ބާކީވެގެންދާން ނެދޭކަމަށް ވެސް ނައިބުރައީސް ވިދާޅުވިއެވެ.
ހުރިހާ އެންމެން ވެސް ގަޑިއަށް ފަރުވާތެރިވުމަށާއި އެހެން މީހުންނަށް އިޙްތިރާމް ކުރުމަށް ނައިބުރައީސް ވަނީ އެދިވަޑައިގެންފައެވެ.
ސްޓާފް ނައިޓުން އެކަނި ވެސް އައިލެންޑް އޭވިއޭޝަން ސަރވިސަސް ލިމިޓެޑްގައި ޓީމް ވާރކް އޮތް މިންވަރު ފެނިގެން ހިނގައްޖެކަން ފާހަގަކުރައްވާ ނައިބުރައީސް ވިދާޅުވީ ކުންފުނީގައި މުވައްޒަފުން އެކަކު އަނެކަކާއި ގުޅިގެން މަސައްކަތް ކުރާކަން ޔަޤީންވާ ކަމަށެވެ. އަދި މިފަދަ ޙިދުމަތްތަކެއް ވަރަށް ރަނގަޅަށް ކޯޑިނޭޓް ކޮށްގެން ނޫން ގޮތަކަށް ނުދެވޭނެކަން ވެސް ފާހަގަކުރެއްވިއެވެ.
ނައިބުރައީސް އިތުރަށް ވިދާޅުވީ ރާއްޖޭގައި އެއަރޕޯޓްތައް ތަރައްޤީކޮށް، ފްލައިޓްތައް ވެސް އިތުރުވަމުން އަންނަ ކަމަށާއި އެހެންކަމުން އައިލެންޑް އޭވިއޭޝަންގެ މުވައްޒަފުންގެ މަސައްކަތް ވެސް އެކަންތައްތަކާއެކު ބުރަވާނެ ކަމަށެވެ. އަދި ރައްޔިތުންނަށް ޚިދުމަތްތައް ފޯރުކޮށްދޭއިރު އޯގާތެރިކަމާއި ހިތްހަމަޖެހުމާއެކު އެ ޙިދުމަތެއް ފޯރުކޮށްދިނުމަށް އިލްތިމާސް ކުރެއްވިއެވެ.
އެކެއްގެ މަސައްކަތުން ކާމިޔާބު ނުލިބޭނެ ކަމަށާއި ކާމިޔާބު ލިބޭނީ ވަރަށް ގިނަ ބަޔެއްގެ މަސައްކަތްތަކުން ކަމަށް ނައިބުރައީސް ވިދާޅުވިއެވެ.
