ޒަޔާންގެ މަރުގެ މައްސަލައިގެ ޝަރީއަތް މާދަމާ

ޒަޔާން އަށް ތޫނުއެއްޗަކުން ޙަމަލާދީ މަރާލި މައްސަލާގައި 7 މީހެއްގެ މައްޗަށް ދައުވާ އުފުލާފައިވާއިރު ދައުވާކުރާ މީހުންގެ މައްސަލަ އާދިއްތަ ދުވަހު ފަށަން ތާވަލުކޮށްފިއެވެ.

މައްސަލައިގައި ހަތަރު ކުޑަކުއްޖަކާއި 18 އަހަރުން މަތީގެ ހަތް މީހެއްގެ މައްޗަށް ދައުލަތުން ދައުވާ ކޮށްފައިވެއެވެ. އޭގެ ތެރެއިން ކުޑަކުދިންގެ ބައި ޖުވެނައިލް ކޯޓުގައި ކުރިއަށްދާއިރު މި މައްސަލަ ތާވަލްކޮށްފައިވަނީ އާދިއްތަ ދުވަހުގެ މެންފުރު 01:30 ގައި ކްރިމިނަލް ކޯޓުގައެވެ.

Advertisement

މި މައްސަލައަކީ 2 ޖޫން 2022 ދުވަހުގެ ދަންވަރުގެ ވަގުތެއްގައި، އައްޑޫ ސިޓީގައި ސ. ފޭދޫ، ސޮލިޑް، މުޙައްމަދު ޒަޔާން މޫސާއަށް ތޫނުއެއްޗަކުން ޙަމަލާދީ މަރާލި މައްސަލައެވެ. ޒަޔާނަށް ހަމަލާދިނީ ފޭދޫގެ ދެ ގޭންގެއްގެ ދެމެދުގައި އޮތް މައްސަލައަކާ ގުޅިގެންނެވެ.

އަމިއްލަ ގޭގެ ގޯތިތެރޭގައި ހުއްޓާ ދިން އެ ހަމަލާގައި ލިބުނު ޒަހަމްތަކަށް އައްޑޫ އިކުއަޓޯރިއަލް ހޮސްޕިޓަލުގައި ފަރުވާދެމުން އަންނަނިކޮށް 21 އަހަރުގެ ޒަޔާން މަރުވިއެވެ. ޒަޔާން މަރާލީ ބަދަލު ހިފުމުގެ މާރާމާރީއެއްގެ ތެރެއިން ކަމަށްވެސް ފުލުހުން ވަނީ ބުނެފައެވެ.

އެ މީހުންގެ މައްޗަށް ދައުވާކޮށް ކޯޓަށް މައްސަލަ ހުށަހެޅީ މިދިޔަ އަހަރުގެ ނޮވެމްބަރު 27 ވަނަ ދުވަހުއެވެ. ޕްރޮސެކިއުޓާ ޖެނަރަލް އޮފީހުން 2 މީހެއްގެ މައްޗަށް އުފުލާފައިވަނީ ތޫނުއެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާއެވެ. ބާކީ ތިބި ފަސް މީހުންނަށް ކޮށްފައިވަނީ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގައި އެހީތެރިވުމުގެ ކުށުގެ ދައުވާއެވެ. މީގެ އިތުރުން ޖިނާއީ ކުށެއް ކުރުމަށް ކުޑަކުއްޖަކު ބޭނުންކުރުމުގެ ދައުވާ މި މީހުންގެ މައްޗަށް އުފުލާފައިވެއެވެ.

މި މައްސަލައިގައި 18 އަހަރު ނުފުރޭ 4 ކުއްޖަކަށް ވެސް ދައުވާ އުފުލާފައިވެއެވެ. އޭގެ ތެރެއިން އެކެއްގެ މައްޗަށް ތޫނުއެއްޗެއް ބޭނުންކޮށްގެން ގަސްދުގައި މީހަކު މެރުމުގެ ކުށުގެ ދައުވާ ކޮށްފައިވާއިރު، ދެން ތިބި ތިން ކުދިންގެ މައްޗަށް އުފުލީ ތޫނުއެއްޗެއް ބޭނުންކޮށްގެން ގަސްދުގައި މީހަކު މެރުމުގައި އެހީތެރިވުމުގެ ކުށުގެ ދައުވާއެވެ.

މި މައްސަލައިގައި ތޫނުއެއްޗެއް ބޭނުންކޮށްގެން ޤަޞްދުގައި މީހަކު މެރުމުގައި އެހީތެރިވުމުގެ ކުށުގެ ދަޢުވާލިބޭ 03 (ތިނެއް) ކުދިންގެ ތެރެއިން 02 (ދޭއް) ކުދިން ކުށަށް އިޢުތިރާފުވެ، ޑައިވާޝަން ފުރުޞަތަށް އެދިފައިވާތީ ޤާނޫނު ނަންބަރު 18/2019 (ކުޑަކުދިންގެ ޢަދުލުގެ ޤާނޫނު) ގެ ދަށުން ޑައިވާޝަން އެގްރީމެންޓު ހެދިފައިވާކަން ވެސް ޕީޖީ އޮފީހުން ފާހަގަކުރެއެވެ.

މި މައްސަލައިގައި ހައްޔަރުކޮށްފައިވާ މީހުންނަކީ ތޫނު ހަތިޔާރު ގެންގުޅުމާއި މާރާމާރީގެ ކުށުގެ ރެކޯޑު އޮންނަ މީހުންނެވެ.