ބުސްކެޓްސް ހޯދުމަށް އައްނަޞްރުން މަސައްކަތްކުރަނީ

ސްޕެއިންގެ ބާސެލޯނާއަށް ކުޅެމުން އަންނަ އެ ޓީމުގެ ކެޕްޓަން ސާޖިއޯ ބުސްކެޓްސް ހޯދުމަށް، ސައޫދީ ޕްރޯ ލީގުގެ އައްނަޞްރުން މަސައްކަތްކުރާކަމަށް ބޭރުގެ މީޑިއާ ރިޕޯޓުތައް ބުނެފިއެވެ.

އުމުރުން 34 އަހަރުގެ ޑިފެންސިވް މިޑްފީލްޑަރު ބާސެލޯނާއާއެކު ހަދާފައިވާ އެއްބަސްވުމުގެ މުއްދަތު ހަމަވާނީ މި ސީޒަންގެ ނިޔަލަށެވެ. ނަމަވެސް މިހާތަނަށް ބާސެލޯނާއިންވެސް އަދި ބުސްކެޓްސްވެސް ކުރިމަގާމެދު ވަކި ގޮތެއް ނިންމާފައެއް ނުވެއެވެ. ބާސެލޯނާގެ ކޯޗު ޒަވީ ހެނާންޑޭޒް މީގެ ކުރިން ބުނީ، ބުސްކެޓްސްއަކީ ބާސެލޯނާގެ ލެޖެންޑެއް ކަމަށާއި، ކުލަބާމެދު ގޮތެއް ނިންމާނީ ބުސްކެޓްސް ކަމަށެވެ. ޒަވީ ބުނީ މިހާރު ކުރިއަށްދާ ސީޒަންގައިވެސް ބުސްކެޓްސް އަންނަނީ ބާސެލޯނާގައި މުހިންމު ދައުރެއް އަދާކުރަމުން ކަމަށެވެ. ލީގު މެޗެއްގެ ތެރެއިން ލިބުނު އަނިޔާއެއްގެ ސަބަބުން މިވަގުތު ބުސްކެޓްސް ހުރީ ކުޅުމާ ދުރުގައެވެ.

މީޑިއާތަކުގައި ބުނެފައިވާގޮތުން ޖޫން މަހު ބުސްކެޓްސްގެ އެއްބަސްވުން ހަމަވާއިރު، އައްނަޞްރުން އަންނަނީ އޭނާއަށް ފާރަލަމުންނެވެ. އެގޮތުން އެ ކުލަބުން ގެންދަން ބޭނުންވާ ކުޅުންތެރިންގެ ލިސްޓުގައިވެސް ބުސްކެޓްސްގެ ނަން އޮތްކަމަށާއި، އެކަމުގެ މަސައްކަތް އެ ކުލަބުން ކުރަމުން އަންނަ ކަމަށްވެސް ބުނެފައިވެއެވެ. އައްނަޞްރުގެ އިތުރުން އިންޓަ މިއާމީންވެސް އަންނަނީ ބުސްކެޓްސް ހޯދުމުގެ މަސައްކަތް މީގެ މަސްތަކެއް ކުރިން ކުރަމުން ކަމަށް ރިޕޯޓުތައް ބުނެއެވެ.

ބާސެލޯނާއިން ސީނިއާ ކެރިއަރު ފެށި ބުސްކެޓްސް ވަނީ މިހާތަނަށް އެ ކުލަބަށް ކުޅެދިން 707 މެޗުގައި 18 ލަނޑު ޖަހާފައެވެ. އޭނާ ވަނީ އެ ކުލަބާއެކު 31 ތައްޓެއްވެސް ކާމިޔާބުކޮށްފައެވެ.