މިހާރުގެ އަންދާޒާތަކުން ދައްކާ ގޮތުގައި ރާއްޖޭގައި އަހަރަކު މަރުވާ މީހުންގެ ތެރެއިން 17 އިންސައްތަ މީހުންނަކީ ކެންސަރުބަލީގައި މަރުވާ މީހުން ކަމަށް ހެލްތު މިނިސްޓަރު އަހްމަދު ނަސީމް ވިދާޅުވެއްޖެއެވެ.
ރާއްޖޭގައި ކެންސަރު ބަލި ކޮންޓްރޯލް ކުރުމަށް ފަސް އަހަރުގެ ޕްލޭނެއް އެކުލަވާލައި، އެ ޕްލޭން ބުރަާސްފަތި ދުވަހު އިފްތިތާހުކޮށްދެއްވުމަށްފަހު މިނިސްޓަރު ވިދާޅުވީ ކެންސަރުގެ ތަފާތު ބަލިތައް ޖެހޭކަމަށާއި އޭގެ ސަަބަބުން ދާއިމީ ނުކުޅެދުންތެރިކަމަކަށް ދާންޖެހޭ ފަރާތްތަކާއި އެ ބަލީގައި ދުނިޔެ ދޫކުރަން ޖެހޭ ފަރާތްތައް ރާއްޖޭގައި އަހަރުން އަހަރަށް ދަނީ ގިނަވަމުން ކަމަށެވެ. މިނިސްޓަރު ވިދާޅުވީ ރާއްޖޭގައި އަހަރަކު މަރުވާ މީހުންގެ ތެރެއިން 17 އިންސައްތަ މީހުންނަކީ ކެންސަރުބަލީގައި ދުނިޔެ ދޫކުރާ މީހުންކަމަށާއި މިހާރު ވެސް މި ބައްޔަށް ރާއްޖެ އާއި ރާއްޖޭން ބޭރުގައި ގިނަ ބަޔަކު އަންނަނީ ފަރުވާ ހޯދަމުން ކަމަށެވެ.
ކެންސަރުގެ ހިތްދަތި ވާހަކަތަކުގެ ތެރެއިން އެނގޭ އަނެއް ހަގީގަތަކީ ޒަމާނީ ތަހުލީލުތަކާއި ބޭސްފަރުވާގެ އެހީތެރިކަމާއެކު ގަވާއިދުން ސްކްރީންކޮށް ކެންސަރު ޖެހިފައި ހުރިތޯ ބަލައި ބަލީގެ ކުރީކޮޅުގައި ނުވަތަ ފުރަތަމަ މަރުހަލާގައި ދެނެގަނެވިއްޖެނަމަ ކެންސަރުބަލީގެ ގިނަ ތަފާތު ބަލިތަކަކުން ފަރުވާ ލިބޭކަމަށް މިނިސްޓަރު ނަސީމް ވިދާޅުވިއެވެ. އިތުރަށް މިނިސްޓަރު ވިދާޅުވީ ދުނިޔޭގެ ނިސްބަތުން ކެންސަރުޖެހޭ މީހުންގެ ތިންބައިކުޅަ އެއްބައި މީހުންނަކީ ދިރިއުޅުމުގެ ވަައްޓަފާޅި އާއި އާދަތައް ބަދަލުކުރުމުން ކެންސަރަށް ހުށަހެޅުނު މީހުން ކަމަށެވެ. އެހެންކަމުން، ކެވެނީ ކޮންކަހަލަ އެއްޗިއްސެއްތޯ ބަލައި އެއަށް ފަރުވާ ބަހައްޓައިފިނަމަ ސިއްހަތު މިހާރަށްވުރެ ބޮޑަށް ރައްކާތެރިކުރެވޭނެ ކަމަށް އޭނާ ވިދާޅުވިއެވެ.
މިފަދަ ކަންކަމަށް ނަސޭހަތްތެރިވުމާއެކީ ރާއްޖެއަށް އިމްޕޯޓްކުރާ އެއްޗެހިތޯ ބަލަންޖެހޭ ކަމަށާއި އެއީ ސަރުކާރުގެ ޒިންމާއެއް ކަމަށް މިނިސްޓަރު ވިދާޅުވިއެވެ. ސޮސެޖުފަދަ އެއްޗެހީގައި ބުޅާމަސް ހުރެގެން ނުވާނެ ކަމަށާއި އެފަދަ ކަންކަން ދިމާވަނީ ޓެސްޓުކުރެވޭނެ ނިޒާމުތަކެއް ނެތީމަ ކަމަށާއި އެ ކަމުގެ މަސައްކަތްކުރަމުންދާ ކަމަށް އޭނާ ވިދާޅުވިއެވެ.
މިނިސްޓަރު އިތުރަށް ވިދާޅުވީ ކެންސަރު ބަލި ރާއްޖޭގައި އޮތް މިންވަރުގެ ތަފްސީލީ ރިޕޯޓެއް ހަދައިދިނުމަށް ދުނިޔޭގެ ސިއްހަތު ޖަމިއްޔާގައި އެދިފައިވާ ކަމަށާއި އެ ކަން ވަރަށް އަވަހަށް ވާނެ ކަމަށް އުންމީދުކުރައްވާ ކަމަށެވެ.
