ދައުލަތަށް ލިބެން ޖެހޭ ފައިސާ ނުލިބުމުން އާއްމުން ތިބީ މާޔޫސްވެފައި ކަަމަށް ހިއުމަން ރައިޓްސް ކޮމިޝަން އޮފް ދި މޯލްޑިވްސް (އެޗްއާރްސީއެމް) ގެ ރައީސް މަރިޔަމް މުނާ ވިދާޅުވެއްޖެއެވެ.
"ކުށްކޮށްގެން ހޯދާ މުދަލާއި ފައިސާ ދައުލަތަށް ނެގުން" ދިރާސާ އާންމުކުރުމުގެ ރަސްމިއްޔާތުގައި ވާހަކަދައްކަވަމުން މުނާ ވަނީ އޭސީސީއިން ކުރަމުންދާ މި މަސައްކަތަށް ތައުރީފްކުރައްވާފައެވެ. "ކުށްކޮށްގެން ހޯދާ މުދަލާއި ފައިސާ ދައުލަތަށް ނެގުން" ނުވަތަ އެ ފައިސާ އޭގެ ހައްގުވެރިންނަށް ހޯދައި ދިނުމަކީ ދައުލަތަކަށް ކުރެވޭނެ އެންމެ މުހިންމު މަސައްކަތް ކަމަށް މުނާ ވިދާޅުވިއެވެ. ސަބަބަކީ އެ މަސައްކަތުގެ ތެރެއިން އެތައް ބައެއްގެ ފަރާތުން ނިގުޅައިގަނެފައިވާ ހަގެއް އަނބުރާ ހޯދައި ދެވުން ކަމަށް އޭނާ ވިދާޅުވިއެވެ. އެ ވާހަކަ އަކީ ވަރަށް އާއްމުކޮށް ދެކެވޭ ވާހަކައަކަށް ވުމާއެކު އެކަމުގެ ބުރަދަން ވަޒަން ނުކުރެވުމުގެ ފުރުސަތު އޮތް ކަަމަށް މުނާ ވިދާޅުވިއެވެ. ވަކި ކޮރަޕްޝަންގެ މައްސަލަތަކެއްގެ ތެރެއިން ވަކި އަދަދަކަށް ފައިސާ ގެއްލިފައިވާ ވާހަކަ އަބަދުވެސް އިވެމުންދާ ކަމަށް ވެސް އެޗްއާރްސީއެމްގެ ރައީސް މުނާ ވިދާޅުވިއެވެ.
އެއިން ކޮންމެ ފަހަރަކު ގެއްލެނީ ރައްޔިތުންގެ ފައިސާކަަމަށް ފާހަގަކުރައްވާ މުނާ ވިދާޅުވީ ކޮރަޕްޝަންގެ ސަބަބުން ދައުލަތުން ފައިސާ ގެއްލުމަކީ އާއްމުންގެ ކަންބޮޑުވުން އިންތިހާއަށް އޮތް ކަމެއް ކަމަށެވެ. އެހެންނަމަވެސް އެ ފައިސާ އަނބުރާ ލިބެމުން ދާތަން ނުފެންނަ ކަމަށާއި އެކަމާމެދު ރައްޔިތުންގެ ހިތްހަމަނުޖެހުން އޮންނަ ކަމަށް މުނާ ވިދާޅުވިއެވެ. އަދި ދައުލަތުން ގެއްލޭ ފައިސާ އަނބުރާ ނުލިބޭ ސަބަބު ހޯދުމަށް އޭސީސީ އިން ކުރާ މަސައްކަތަށް މުނާ ތައުރީފްކުރެއްވިއެވެ.
މީގެއިތުރުން އެސެޓް ރިކަވަރކުރުމަކީ ކޮރަޕްޝަންގެ ކުށްތައް ހޯދައި ފަސޭހައިން އިންވެސްޓު ކުރުން ހުއްޓުވަން މުހިންމު ކަމެއް ކަމަށް އޭނާ ވިދާޅުވިއެވެ. އެފަދަ ނިޒާމެއް ޤާއިމްވުމަކީ ކުށްކުރުން މަދުކޮށް ކުށްކުރުން ނައްތާލަން އެޅޭ ބާރެއް ކަމަށް ވެސް އޭނާ ވިދާޅުވިއެވެ. ކުށްކުރާ ވަސީލަތް ހޯދުމަކީ ގޮންޖެހުމެއް ކަަމަށާއި ކޮރަޕްޝަންގެ ކުށްތައް ހުއްޓުވަން ބައިނަލްއަގުވާމީ ފެންވަރުގައި ކުރަން ޖެހޭ މަސައްކަތްތައް ހުރި ކަމަށް އޭނާ ވިދާޅުވިއެވެ. ޤާނޫނީ ގޮތުން ކުށްކޮށްގެން ހޯދާ މުދަލާއި ފައިސާ ދައުލަތަށް ނެގޭނެ ގޮތެއް ނެތުމަކީ ހައިރާން ވާވަރުގެ ކަމެއް ކަމަށް ވެސް އޭނާ ވިދާޅުވިއެވެ.
