މާފަންނު މަދަރުސާގެ އަހަރީދުވަސް ފާހަގަކޮށްފި
މާފަންނު މަދަރުސާގައި މިހާރު ކިޔަވައިދެނީ ހަމައެކަނި ޕްރީސްކޫލް ކުދިންނަށް
މާފަންނު މަދަރުސާގެ އަހަރީދުވަސް ފާހަގަކުރުން --
މާފަންނު މަދަރުސާގެ 39 ވަނަ އަހަރީ ދުވަސް އެ ސްކޫލުގައި ފާހަގަކޮށްފިއެވެ.
ބުދަ ދުވަހު ހަވީރު މާފަންނު މަދަރުސާގައި އެ ސްކޫލްގެ 39 ވަނަ އަހަރީ ދުވަސް ފާހަގަކުރުމަށް ބޭއްވި ހާއްސަ ޖަލްސާ ޝަރަފްވެރިކޮށްދެއްވީ ދިވެހިރާއްޖޭގެ ގައުމީ ޔުނިވާސިޓީގެ ވައިސް ޗާންސެލަރު ޑރ. މުހައްމަދު ޝަރީފެވެ. މި ރަސްމިއްޔާތުގައި އޭނާ ވަނީ އެ ސްކޫލްގެ ދިދަ ނަންގަވައިދެއްވައި އަހަރީ ދުވަހުގެ ހާއްސަ ކޭކު ވެސް ފަޅުއްވައިދެއްވައިފައެވެ. މި ރަސްމިއްޔާތުގައި އެ ސްކޫލްގެ ދަރިވަރުންގެ ހާއްސަ ނެށުމުގެ އައިޓަމެއް ވެސް އޮތްއިރު ދަރިވަރުންގެ ފަރާތުން ވެސް ކުއްޖަކު ވާހަކަ ދައްކައިފައިވެއެވެ. ދަރިވަރުންގެ ފަރާތުން ވާހަކަ ދެއްކީ މައީޝް މުޖުތަބާއެވެ.
މި ޖަލްސާގައި ވާހަކަ ދައްކަވަމުން އެމްއެންޔޫގެ ވައިސް ޗާންސެލަރު ޑރ. މުހައްމަދު ޝަރީފް ވިދާޅުވީ މާފަންނު މަދަރުސާގައި އޭނާ ނުކިޔެވި ނަމަވެސް އޭނާ ދަންނަ ވަރަށް ގިނަ މީހުން މާފަންނު މަދަރުސާގެ ދޮރާށިން ނުކުމެ ވަރަށް ކާމިޔާބު މީހުންގެ ގޮތުގައި މިއަދު މުޖުތަމައުގައި މަސައްކަަތްކުރަމުންދާ ކަމަށެވެ. ޝަރީފް ވިދާޅުވީ މާފަންނު މަދަރުސާގެ ހުރިހާ ދަރިވަރުންނަކީ ވެސް ވަަރަށް ހާއްސަ ހުނަރުތަކެއް ލިބިފައިވާ ކުދިންތަކެއް ކަމަށާއި ބޮޑުވަމުން އަންނަ ވަރަކަށް އެކަންކަން ތަރައްގީވެ އޭގެ ބޭނުން ހިފުމުގެ ފުރިހަމަ ވަސީލަތް އެ ކުދިންނަށް ލިބިގެންދާނެ ކަމަށެވެ. އަދި މާފަންނު މަދަރުސާގެ އާންޓީންނާއެކު އެ ކުދިން މިއަދު ފަށައިފައި އެ ވަނީ އެ ދަތުރުކަމަށާއި ނިކަން އަވަހަށް މި ގައުމު ބިނާކުރާ ކުދިންތަކަކަށް އެ ކުދިން ވާނެ ކަމަށް ޝަރީފް ވިދާޅުވިއެވެ.
މިއަދުގެ ޖަލްސާގައި ވާހަކަ ދެއްކި ދަރިވަރު މައީޝް ބުނި ގޮތުގައި މާފަންނު މަދަރުސާއަށް 39 އަހަރުވީއިރު ވަރަށް ގިނަ ފަރާތްތަކަކުން އެ ސްކޫލުން ތައުލީމް ހާސިލުކޮށްފައިވާ ކަމަށެވެ. އަދި އެ ސްކޫލުން ކިޔެވި ކުދިން ވަރަށް މޮޅުވާނެ ކަމަށާއި ގައުމަށް ހިދުމަތް ކުރުމުގައި އެކިއެކި ދާއިރާތަކުގައި އެބަ ތިއްބެވިކަމަށް މައީޝް ބުންޏެވެ. އިތުރަށް މައީޝް ބުނީ މާފަންނު މަދަރުސާގެ އަމާޒަކީ އެއްޓީމެއްގެ ގޮތުގައި މަސައްކަތްކޮށް ރަނގަޅު ޖީލެއް ބިނާކޮށް ގައުމަށް ފައިދާހުރި ދަރިންތަކެއް މާފަންނު މަދަރުސާގެ ހިޔާވަހިކަމުން ނެރުން ކަމަށެވެ.
=
މާފަންނު މަދަރުސާއަކީ މާލޭގައި އަވަށު މަދަރުސާތައް ހުޅުވި ދުވަސްވަރުގައި 1984 ވަަނަ އަހަރުގެ ފެބްރުވަރީ 15 ވަނަ ދުވަހު ހުޅުވި މަދަރުސާއެކެވެ. މީގެ ކުރިން ސާނަވީ ގްރޭޑްތަކަށް ވެސް އެ ސްކޫލުގައި ކިޔަވައިިދިން ނަމަވެސް މިހާރު އެ ސްކޫލަކީ ޕްރީސްކޫލްގެ ދަރިވަރުންނަށް ކިޔަވައިދޭ ފެންވަރު ރަނގަޅު ސްކޫލެކެވެ.
