އަންނަ މަހު ރާއްޖޭގެ ގައުމީ ފުޓްބޯޅަ ޓީމާ ދެކޮޅަށް މެޗެއް ކުޅެން ޕާކިސްތާނުގެ ގައުމީ ޓީމު މާލެ އަންނަން ހަމަޖެހިއްޖެ އެވެ.
މިކަން އިއުލާނުކުރީ ޕާކިސްތާން ފުޓްބޯޅަ ފެޑަރޭޝަނުންނެވެ. އެ ގައުމުން ވަނީ މާޗު މަހު ރާއްޖެ އާއި ބޫޓާން އަދި ބުރޫނާއީއާއެކު ކުޅެން ރާވާފައިވާ މެޗުތަކަށް އިއްޔެ ފަރިތަކުރަން ފަށައިފަ އެވެ. ނަމަވެސް މެޗު ކުޅޭނެ ތާރީހު އިއުލާނުކޮށްފައިނުވެ އެވެ.
މިއީ ފާއިތުވެދިޔަ ދެ ތިން އަހަރު ފީފާގެ ސަސްޕެންޝަނުގައި އޮތުމަށްފަހު އެކަމުން އަރައިގަނެ ޕާކިސްތާނުން ގައުމީ ޓީމު އެކުލަވާލުމަށް ކުރާ މަސައްކަތުގެ ބައެކެވެ.
ރާއްޖެ އާއި ޕާކިސްތާން އެންމެ ފަހުން މާލޭގައި އެކުވެރިކަމުގެ މެޗެއް ކުޅުނީ 2013 ވަނަ އަހަރު އެވެ. މި މެޗު ނިމުނީ ދެ ޓީމު އެއްވަރުވެގެންނެވެ.
ސަރަހައްދީ ދެ ޓީމު ގަލޮޅު ދަނޑަށް ނުކުންނަން ތައްޔާރު އަންނަ ޖޫން މަހު ސަރަހައްދީ އެންމެ ބޮޑު ފުޓްބޯޅަ މުބާރާތް ސާފް ޗެމްޕިއަންޝިޕް ވެސް އިންޑިޔާގައި ބާއްވާނެ އެވެ.
ޕާކިސްތާނުގެ ކޯޗު ޝަހުޒާދު އަންވަރު ބުނީ މި މެޗުތަކުގެ ބޭނުމަކީ ކުރިއަށްހުރި ސަރަހައްދީ މުބާރާތްތަކާއި ވޯލްޑްކަޕް ކޮލިފައިންފަދަ މެޗުތަކަށް ވަރުގަދަ ޓީމެއް އެކުލަވާލުން ކަމަށެވެ. އަދި ލާހޯރުގައި ފަރިތަކުރަން ފެށިއިރު ޓީމުގައި ޒުވާން ކުޅުންތެރިންތަކެއް ހިމަނާފައިވާނެ ކަމަށެވެ.
މި މެޗާމެދު ރާއްޖޭގެ ފުޓްބޯޅަ އިދާރާއިން އަދި ވަކި އެއްޗެއް ނުބުނެ އެވެ.
